ISAIA 43 - AMÜSÜH HÜM CL Bible (BSI)

Israel Rhokhitrü

¹ Tüshe kheakü Atungpuhnü ha thachoh, shepünü nü thrünkhea, O Jakob, shepünü nü kamshihkhea, O Israel: Dütre, tümüde inü nü rhokhit; inü nü mungnü ji, nü I yo.

² Küyimki nü ke hode yübanü, I nü lung labah; tüsho ayungbo hode yüchoki nü müzhido: küyimki nü mo tsahhobanü nü mütak tüsho motrunü nü maniu.

³ Tümüde I Atungpuh nü Thrünpuh, Amüsüh Israel Thrünpuh, nü Khümkhitbuh. Inü nü rhokhitpü Ijip, nü müthri Ethiopia tüsho Seba jihchoh.

⁴ Tümütüsho nü I miki shoto lah, tüsho akinashu lah, tüsho inü nü muzholah, inü nü müthri mihtsürübo, nü rhangdung müthri trükshihbo jihchoh.

⁵ Dütre, tümüde I nü lung lah; inü nü tsührübo aniakhiuklimnü bedarübah, tüsho aniyüzahlimnü inü nüsa bemukhungbah.

⁶ Inü dukulim thabah, “Tsoshang,” tüsho düjinglim, “Dütholo; I tsührübo limshu chingnü tüsho I tsührübebo alomi akheam chingnü bedarang–

⁷ Sherübo I mung chingnü jia la, sherü I müretahpü inü thrün, sherü inü kamshih tüsho thrün.”

Israel Atungpuh Thiyumütsan

⁸ Müktukrü mihtsürübo bedarang, tütüshe sherü mükbo la, sherü nükhün peanga la, tütüshe nükhünbo kihla!

⁹ Trükshih alala rukhüh mukhungshang tüsho mihtsürübo mukhungshang. Arü bolung shepünü ha khipkhitkhukba tüsho atsokhibo thakhukba? Arünü mütsanmükhipü arü thiyumütsanbo hande arüshang, tüsho arünü soshang tüsho thashang, “Ha thiyuro.”

¹⁰ Nüsa I yumütsan thsürübo, Atungpuhnü thachoh, tüsho inü mokhitkhi I yamlarü, junangde nüsanü mükheahbah tüsho I kinbah tüsho I api ah de anikhitbah. I müngüh thrünpuh sheshe mükamde alakheah, yungsho I dunglim sheshe müla.

¹¹ I, I Atungpuh ah, tüsho I hobah akhümkhitrü she müla.

¹² Inü khipkhit, khümkhit tüsho zhiyukjih, küyimki khiungkerü thrünpuh nüsa lung mülakhea; tüsho nüsa I yumütsan thsürübo, Atungpuhnü thachoh, I Thrünpuh ah.

¹³ I Thrünpuh ah, tüsho kheakünü rünbah I api ah; I khah chingnü abekhitkhukrü she müla; inü rhimochoh tüsho shenü ju zhipdopü kukla?

Babilon chingnü Tsokhit

¹⁴ Nü Rhokhitrü Israel Amüsüh Thrünpuh Atungpuhnü thachoh: Nü dünkheaknü inü bonungrü Babilon ching yüshihbah tüsho sangkaplakbo alala yihshakbah, tüsho Kaldearü ahokhi ju atüzhokhi kambah.

¹⁵ I Atungpuh nü yo Amüsüh Thrünpuh, Israel Thrünrü, nü kiulongthsüpuh.

¹⁶ Atungpuhnü ha thachoh, shepünü keto ching limro thsücho tüsho ke amülak ching tsahpung thsücho,

¹⁷ Shepünü khora-lolungbe tüsho khora bekhitcho, bonungrü tüsho thirithsürü; arü yaplah, arü masürükhuk, arübo zümüta lah, moke-liu nangde kunga lah:

¹⁸ Akhuhlim dünjikhibo dülümkhit yungsho awünbo lümadükheah.

¹⁹ I a aso rhimopü thsüchoh; kheakü mukhuhde akhiukchoh, nünü ju manikhit de? Inü limro aso khülang sunglo ching thsübah tüsho loshelo ching ayungbo lashihbah.

²⁰ Mütüm shiwühbonü I ki wüntre jihbah, shirungbo tüsho kewühtopübo; tümüde inü mokhitkhi mihtsürü kilim ayungpü thsüde inü sunglo ching ke jihchoh, loshelo ching ayungbo jihchoh,

²¹ mihtsürü sherü I thsungkheak kamshihkhea, junangde arünü I mung shikhi khipkhitbah.

Israel Neak

²² Tütüshe nünü I ki müji, O Jakob; tüshe nünü I khia lakheah, O Israel!

²³ Nünü taka kingaünpü thsungkheak nü yo namfimihnu I kilim hande marü, yungsho nü yo laksah-a kingaünkhinü I wüntre müjih. Inü hi kingaün kheangde nü ki hahmülang müjih, yungsho rhümthüneabe kheangde nü mükhishih.

²⁴ Nünü I khilim shonü niungyidung muthulojih, yungsho nünü alaksahkhi müdangnü I reangmükeamshih. Tüshe nü neakbonü I hah mülangshihdo; nü amülimbonü I khishihdo.

²⁵ I, I api shepünü I mung chingnü nünü alakmihkhibo nankhita bahjih, tüsho inü nü neakbo mülümkhit.

²⁶ I ki lümkhitshang, isanü mahkhappung yüanü; nüsa lümkhi jihang, junangde nüsa alim mütsanbah.

²⁷ Nüsa jipürü akhuhbuhnü neak yihbeak, tüsho nüsa limberünü I azhihde neak yihbeak,

²⁸ jumonü inü arüngyam yakzanshuhrü ki mümüsühkhi khejih, inü Jakob muthrumüneanpü tüsho Israel luhmünepü jih.