ISAIA 39 - AMÜSÜH HÜM CL Bible (BSI)

Babilon Yunithsürübo

¹ Ju kim ching Baladan tsührü Merodak-baladan Babilon kiulongthsüpuhnü kihümbo le thsambahbo mühahbah yunithsürübo Hezekia kilim yüshih, tümüde api tukthsübah angukhi apinü so.

² Hezekianü arübo leangkhi; apinü arü ki api rahpung-yam, shotoyinchi, suna, thüneathürabe, shoto müdangke, thsühnuk alala, api kukruk-zowupung ching lakhi alala huh. Api yam ching yungsho api kiulongthsü alala ching Hezekia nü arü ki muhuhkhi tümü mülakheah.

³ Judüki wukihbuh Isaianü kiulongthsüpuh Hezekia kilim arü tüsho api ki tha, “Harü mihtsürübonü tümü thakhea? Arübo küchingnü nü kilim arükhea?” Hezekianü alo, “Arübo limshu lomi Babilon chingnü I kilim arükheah.”

⁴ Apinü tha, “Arünü nü yam ching tümü ngüde?” Hezekianü alo, “Arünü I yam ching lakhi alala ngüdo; inü arü ki muhuhkhi I yam ching tümü müla.”

⁵ Judüki Isaianü Hezekia ki tha, “ Wuto Atungpuh yubo aniang:

⁶ Nü yam ching lakhi alala, tüsho nüsa jipürünü ha nimung khiungde zomukhungkhi Babilon ching hande ayüpü nimung arüchoh; tümü she maning, Atungpuhnü thachoh.

⁷ Nü tsührübo khürü bede atsobah; arübo Babilon kiulongthsüpuh yam ching dukha labah.”

⁸ Judüki Hezekianü Isaia ki tha, “ Nünü asukkhi Atungpuh yu atsü ah.” Tümüde apinü lüm, “ I nimungbo ching mungtsü tüsho thiyuro labah.”