ISAIA 38 - AMÜSÜH HÜM CL Bible (BSI)

Hezekia Kutsüp Shuhakhinkhi

¹ Ju nimungbo ching Hezekia tukthsüde kam tüsho ashepü thsüde alakheah. Amoz tsührü wukihbuh Isaia api kilim arü tüsho tha, “Atungpuhnü ha thachoh: Nü yam tsüde tsanglunga zoang, tümüde nü ashebah; nü müngu.”

² Judüki Hezekia nü amiro rhü lim anguh, tüsho Atungpuh ki tamkhüntamnü:

³ O Atungpuh , inü nü ki mushuchoh, künangde I mulong athrünkhinü thiyuro lade nü miki tsahkhea, tüsho nü miki atsü rhimokhi kheakü lümkhitang. Tüsho Hezekianü düsüknimde trip.

⁴ Judüki Atungpuh yu Isaia kilim arü:

⁵ “ Yüang tüsho Hezekia ki thaang, Atungpuh , nüsa jipürü David Thrünpuhnü ha thachoh: Inü nü tamkhüntamnü sodo, inü nü chike ngüdo; inü nü rhangdung ching kam 15 yuklojihbah.

⁶ Nü tüsho ha kiuto Asiria kiulongthsüpuh khah chingnü bekhitbah tüsho ha kiuto tsunglojihbah.

⁷ “Ha Atungpuhnü alokhikhi rhimopü nü thsungkheak Atungpuh kilimnü amütsan lah:

⁸ Kheahang, Ahaz yo animüchit kheak ani me jingdükü 10 atrütloshihbah.” Junangde ani me ju jingdükü 10 atrütlo.

⁹ Hezekia tukthsübah angu dunglim apinü ha thrüt:

¹⁰ Inü tha: I rhangdung amuro kheaknü I kambo aningkhi dükheakde I Ashe-lomi chipiripit ching yüshihdo.

¹¹ Inü tha, rhangdung lakhi lomi ching inü Atungpuh müngü; alomiküp ching larü bolung kheaküa inü mihtsürü müngü.

¹² I sangkhik tsoabahdo tüsho mihnu neakrü khimyam nangde I kheaknü luakhindo; khim-keakrü nangde inü I rhangdung lukdo; apinü I hingpungdungpü kheaknü rhipshakdo; animungnü azhing lim nünü I akheam kamshihdo;

¹³ Inü arung thsungkheak yapsu khiungde zhi; kekhüzünü nangde apinü I robo alala yihshak; animungnü azhing lim nünü I akheam kamshih.

¹⁴ Kiurürüt yungsho kewüh nangde inü khungchoh, müthrithrümpü nangde inü ashechoh. Akulim kheahkhinü I mükjibo keahdo. O Atungpuh , I junoa lah; I khümkhitang!

¹⁵ Tüshe inü tümü thakhea? Tümüde apinü I ki asukdo, tüsho apinü ha rhimokheah. I me khühkhi hode I ayapnepü alala tsoabahdo.

¹⁶ O Atungpuh , ha hode mihtsürü lachoh, tüsho harü alala ching I rhangdung lah. O, I phü tsüloshang tüsho I rhangdung lashang!

¹⁷ Tsükjide ha I sühakhimpü thsungkheaknü I tode akhühkhi lado; tüshe athsümünimrü shingkung chingnü nünü I me bekhit, tümüde nünü I neak alala nü dunglim bahjih.

¹⁸ Tümüde Ashe-lominü nü ki makshe müjihkhuk, ashekhinü nü müshikkhuk; sherü shingkung ching yüzahchonü nü thiyuro dünkheak mulong mülamkhuk.

¹⁹ Arhang larünü nü ki makshe jihchoh, inü khihni rhimokhi nangde; buhrübonü tsührübo ki nü thiyuro dünkheak mükheahshihchoh.

²⁰ Atungpuhnü I khümkhitbah tüsho isa rhangdung amuyung, Atungpuh yam ching küngküngrarabe kingde khün thsübah.

²¹ Kheakü Isaianü tha, “Arünü khubaso jinjinlak lushang, tüsho phanjakkhuh kheak mujushang, junangde api angubah.”

²² Hezekianü tha, “ Inü Atungpuh yam ching wutupü thsüde amütsan tümü a?”