ISAIA 28 - AMÜSÜH HÜM CL Bible (BSI)

Ephraim Ayokhe

¹ Ayokhe, Ephraim amüshangrü kükheangkhi kuthran, tüsho ha müretah akheahakham yiuhabahkhi sangbün, küpü amüdanglo dükhün ku kheak la, sherü yukhunü zhidoa la!

² Kheahang, Atungpuh lung Wuto tüsho sühmüh lakhi khülang lah, tsüngpungtsüngpung aru nangde, athsümünimbe chinthrüm nangde, amüküp tsüngpungtsüngpung nangde, zhikhiukde abukkhi kebo; api khahnü arübo alo kheak jipkhia bahbah.

³ Ephraim amüshangrü kükheangkhi kuthran ju müphü khüp junakbah.

⁴ Tüsho ha müretah akheahakham yiuhabahkhi sangbün, küpü amüdanglo dükhün ku kheak lanü, yimlupü müngüh akhuh münkhi khubaso nangde alabah; sherünü ha ngübanü, khah ching arüakede tsühabahchoh.

⁵ Ju nimung Wuto Atungpuh ju müretah kuthran khülang labah, tüsho aningkhi api mihtsürü kilim akheahakham zhingzhing labah;

⁶ tüsho mahkhap ching binbuh kilim thiyuro me khülang, tüsho chipiripit ki keochih khamlorü kilim sühmüh labah.

Amüshangrü Wukihrübo

⁷ Harü she yukhunü amülim kamdo tüsho phapkenü ayingyingshihkhi lah; amükeamrü tüsho wukihrü phapkenü amülim kamchoh, arü yukhunü yingyingabahdo, arü phapkenü yingyingshihchoh; arünü michih ching lakmihchoh, arünü mahkhapkhi ching jing mükhechoh.

⁸ Dükhüm alala amülümkhi tüsho amüneannü mide lah, amüsüh dangpung müla.

⁹ Apinü she ki mükheahmudu thsangyuba, tüsho she ki apinü thiyusheak anikhitshihba? Jurü niuh chamrü, kheakü niuh kheaknü shukkhia bahrü a shi?

¹⁰ Tümüde ha thsangdankhi kheak thsangdankhi, thsangdankhi kheak thsangdankhi, athürün kheak athürün, athürün kheak athürün, ha ching anikhüh, ju ching anikhüh labeah.

¹¹ Tsükjide, mulo duhduhrü tüsho khiungkerü yuthanü apinü ha mihtsürübo ki asukbah,

¹² shepü ki apinü tha, “Ha sühakhim; akhirü kilim sühakhim jihang; tüsho ha atsungkheampung”; tütüshe arünü musode alabah.

¹³ Jumonü arü kilim Atungpuh yu ha labah, “Thsangdankhi kheak thsangdankhi, thsangdankhi kheak thsangdankhi, athürün kheak athürün, athürün kheak athürün, ha ching anikhüh, ju ching anikhüh”; junangde arünü dunglim yübah angakbah, tüsho azhakbah, tüsho aphuhbah, tüsho arambah.

Zion ching Amühit-lung

¹⁴ Jumonü nüsa lülüshishirübo, sherü Jirusalem ching ha mihtsürü yakzan shuhchonü, Atungpuh yu aniang.

¹⁵ Tümütüsho nüsanü tha, “ Isanü ashekhi kheak tangzüng khülang thsüdo, tüsho Ashe-lomi kheak thiyuchihchim khülang lah; küyimki thsümütsü arübanü, ju isa kheak marü; tümüde isa jikpung isanü akeangyu thsakhamdo, tüsho akeangyu ching isa jika lah”;

¹⁶ jumonü Atungpuh Thrünpuhnü ha thachoh, Kheahang, inü Zion ching khimtan lung khimchoh, amüzhak lung, shoto amühit-lung, mütsandakkhi khimtan: “Shepünü akinbanü müshungnim.”

¹⁷ Tüsho inü akebe-liu thiyuro kamshihbah, tholang-liu thiyuro-lungki kamshihbah; arübonü arükchih tsoyukpungbo phüta bahbah, tüsho kebonü jikpung zhidobah.

¹⁸ Judüki nüsanü ashekhi kheak tangzüngkhi dükheakbah, tüsho Ashe-lomi kheak thiyuchihchimkhi müzhip; küyimki thsümütsü arübanü junü nüsa thrümmülünbah.

¹⁹ Hanü kheakü kheakü hochoki nüsa shikbah, nimung aban tüsho tsüngre aban; tüsho thiyusheak sokhi aban atrebe labah.

²⁰ Tümüde mihtsürü khülangnü achunglangpü thsüde yapkiu khide khihlah, tüsho ahinglopü thsüde phuyap-khim khide ninilah.

²¹ Tümüde Atungpuhnü Perazim wung kheak nangde asürübah, apinü Gibeon jindükhün ching nangde bukakhiukbah–junangde müdünjia kheahkhi amüyinsahbe api rhimo rhimobah.

²² Jumonü kheakü nüsanü luhmünekhi tukloang, jude yungsho nüsa rhükbe liu müküpshihbah; tümüde alomi alala kheak athsümünimpü yakzan thsükhi Wuto Atungpuh T H RÜ NPU H kilimnü inü sodo.

Thrünpuh Lümlung

²³ Aniang, tüsho I düsheak soang; tsüde aniang, tüsho I yu thakhi soang.

²⁴ Wochakrünü mükheanpü mutukzhakde wochakcho de? Apinü mutukzhakde api lo kiuphülapcho de tüsho kheanthünakcho de?

²⁵ Küyimki apinü amiküp wochakarihbanü, apinü ningpürang mühiu de, khiungün müyang de, tüsho wheat hi aru thsüde mükhim de, tüsho barli hi ayangpung ching müyangcho de, tüsho are yean lim hi püpü müyangcho de?

²⁶ Tümüde apinü thiyuro mahkhap anihbuh ki thsangdanchoh; anihbuh Thrünpuhnü api thsangyuchoh.

²⁷ Ningpürang kheak anitbenü münitchoh, yungsho lolungbenü khiungün kheak mulungchoh; tüshe ningpürang ju shiksangnü tüsho khiungün ju shitsonü rhapkhitchoh.

²⁸ Hi ju yikhap thsüpü zünakchoh, tüshe ju lünnü münitchoh; khürünü ju kheak lolungbe jing lungchoh tüsho khorabo bechoh, tüshe mühiumüzüt.

²⁹ Ha she Wuto Atungpuh kilimnü arüchoh; api ju lümthiyanpü ching amüyinsahbe, tüsho lümlung ching hodaklah.