ISAIA 27 - AMÜSÜH HÜM CL Bible (BSI)

¹ Ju nimung Atungpuhnü abukakhiukde, ato tüsho amürang nukshangnü aphinkhi ke-rimri ahingkhulukkhi phuruto thsümüchibah tüsho apinü keto ching lakhi ke-phuru laksahbah.

² Ju nimung: Aso-asokhi kurungasolu khülang dünkheak khün thsang!

³ I Atungpuhnü ha neakchoh; kim abande inü ke duhchoh. Inü azhing ayin aheangchoh, junangde shenü müthsümünim;

⁴ I bukakhiukkhi müla. Hanü ayangbo tüsho khingphu I kilim jihsho, inü ha azhihde keochihpü tsahmusubah. Inü takabahbah.

⁵ Yungsho hanü I kheak jikpü kapkihshang, junangde apinü I kheak mungtsü thsübah; tüsho apinü I kheak mungtsü thsübah.

⁶ Arübe nimung ching Jakobnü aying chinbah, Israelnü adübit chinde abün pungbah tüsho alomiküp athrünkhi sangasonü amibah.

⁷ Anihbe shikrü apinü ashikkhi nangde apinü anihbe shikdo de? Yungsho anihbe laksahrü laksahkhi nangde anihbe laksahdo de?

⁸ Yankhita bahde, ramtso hode nünü arü azhihde thirithsü; abukakhiukde apinü arü aniakhiuklim pung yünkhi nimung lahkhita bah.

⁹ Jumonü hanü Jakob amülim dün shaklobah tüsho ha api neak yihkhita bahkhi sangaso labah: Küyimki apinü lung kingaün sadambo alala athrütbe-lung nangde adütre kamde züthünakbanü, Ashera sangthsü yungsho rhümthüneabe kingaün sadambo tümü aninga müzhip.

¹⁰ Tümüde chipi ayünkhi kiuto zhikrangkhündo lah, sunglo nangde lapung bahkhitdo tüsho bahyukdo; moshi nunubonü ju ching apheanchoh, arünü ju ching yapchoh tüsho akhahbo ajangsahchoh.

¹¹ Küyimki akhahbo muwubanü azoberübonü arübah atakpü yihchoh. Tümüde ha anikhitkhi mülakhi mihtsürü ah; jumonü arü Thrünrünü arü kheak amuzho müla, yungsho arü ki mihmüthsüm muhuh.

¹² Ju nimung Atungpuhnü Euphra ke bukpung kheaknü Ijip Ayung khiungde anitbah, tüsho nüsa khülang khülangnü bemukhungbah, O Israel mihtsürü.

¹³ Tüsho ju nimung Asiria tüsho Ijip ching larü Israelrü ramtsorü alala jilopü hulipungpung mütbah. Arünü arübah tüsho Jirusalem ching amüsüh wung kheak Atungpuh kingaünbah.