ISAIA 25 - AMÜSÜH HÜM CL Bible (BSI)

Mungshi Khün

¹ O Atungpuh , nü I Thrünpuh ah; inü nü shuhkihbah, inü nü mung shibah; tümüde nünü adüsonü lüma zokhi thülünde tüsho tsükjide amüyinsahbe rhimodo.

² Tümüde nünü kiuto amujung kamshihdo, chipi ayünkhi kiuto thsümünimdo; khiungkerü yo kiulongthsürü yambo lakhi kiuto kheaküa müla, ha küyimkishe müthsülo.

³ Jumonü sühmüh lakhi mihtsürübonü nü müretahbah; mihbukmuyuk trükshih kiutobonü nü trebah.

⁴ Tümüde nü a zhochihrü tsoyukpung lakheah, küpkhukrü lümthsünüchoki tsoyukpung, tsüngpungtsüngpung chingnü kurampung tüsho atak chingnü alamme lah. Tsüngkam tsüngpungtsüngpung nangde mihmukhiuh sheak amütchoki,

⁵ khiungkerü alankhi akung dangpung ching atak nangde lachoki, nünü atakkhi ju amobo menü rüngabahshih; mihmukhiuhrü khün tukloshih.

Thrünpuhnü Thünio Thsakhamchoh

⁶ Ha wung kheak Wuto Atungpuhnü mihtsürü alala thsungkheak ala-tsühyungpü thünio, ashuh-yukhu, alütlüt-shih, düshihde achangkhi yukhu-thünio khülang thsakhambah.

⁷ Tüsho apinü ha wung kheak mihtsürü alala khüpdokhi, trükshih alala kumung phudokhi thsümünimjihbah; apinü ashepü lünnü muyuabahbah.

⁸ Judüki Atungpuh Thrünpuhnü alala miro kheaknü chike nanjihbah, tüsho api mihtsürü masühkhi alomi alala chingnü lude atsobah, tümüde Atungpuhnü asukdo.

⁹ Ju nimung thabah, Kheangang, ha isa Thrünpuh ah; isa khümkhitshihpü thsüde isanü api aleangkheah. Ha isanü aleangkhi Atungpuh lah; isanü api akhümkhit ching asühanü tüsho asühachihanü.

Thrünpuhnü Moab Thsümüchibah

¹⁰ Tümüde Atungpuh khah ha wung kheak keambah. Moabrü ju arü lapung ching khih-shingkung ching müneang junakkhi nangde ajunakbah.

¹¹ Ju bolung arü khah chungkihkih she, kephungrünü arü khah ayitkhi nangde, arü khah ayityit she arü kükheangkhi keamkhishihbah.

¹² Api chipi achangnü ayünkhi thokheambah, akeamshihbah, alo kheak asungthulung ching thokhibah.