ISAIA 24 - AMÜSÜH HÜM CL Bible (BSI)

Atungpuhnü Alomi Thsümüchibah

¹ Kheakü Atungpuhnü alomi akeangkeang lashihbah tüsho abahkhitshihbah, tüsho ami rhophülapbah tüsho ju ching larü hiumüzütbah.

² Tüsho ha mihtsürübo kheak labah, junangde amükeambuh kheak labah; azhorü kheak lakhi nangde, api putungrü kheak she alabah; yamlaberü kheak lakhi nangde, anihbe putungbe kheak she alabah; athulorü kheak nangde, ayinrü kheak she alabah; anip-jihrü kheak nangde azüng-lurü kheak she alabah; shozüng-jihrü kheak nangde, mah-larü kheak she alabah.

³ Alomi ju shahde akeangkeang kamshihbah tüsho shahde athsümünimbah; tümüde Atungpuhnü ha yu asukdo.

⁴ Alomi kungabahchoh tüsho yiuhabahchoh, alomiküp thsünüchoh tüsho yiuhabahchoh; thüning ju alo lung rukhüh thsünüchoh.

⁵ Mihtsürübonü alomi müneando; tümüde arünü yakzanbo lakmihdo, thiyuzüngbo thsümünimdo, akheam mülakhi tangzüng yihshakdo.

⁶ Jumonü muthrumünean khülangnü alomi tsühabahchoh, tüsho ju ching larü arü amülim dünkheak thsünüchoh; jumonü lomi ching larü nükde kamdo, tüsho mihtsürü anükbe aningdo.

⁷ Yukhu kungabahchoh, kurungaso yiuhabahchoh, mulong asühkhi alala phüthsaksümchoh.

⁸ Züpzüppü düsheak kheamdo, asühachihkhi düsheak tuklodo, bingkhung kingkhi düsheak tuklodo.

⁹ Kheaküa arünü khün thsüde yukhu muyung; ayungrü ki ayungbe amüküp ju khühlah.

¹⁰ Kumünikhi kiuto thsümünima lungdo, thüyam abande rihdoa lah, junangde shenü müyüzahkhuk.

¹¹ Yukhu mülakhinü kiudunglimrobo ching azhikhi lah; asühachih alala zhuhmanglangdo kamdo; alomi asühakokhi tsoabahdo.

¹² Kiuto ching zhikrangkhündo lah, chipiripitbo thsümünimde mütrütthünaka lah.

¹³ Tümüde ha ruk alomi kheak tüsho trükshih bolung, oliv sangdung aniungkhi nangde, kurungaso yimlubah momukhungkhi nangde alabah.

¹⁴ Arünü arü düsheak shuhkihchoh, arünü asühde khün thsüchoh; arünü aniyüzahlimnü Atungpuh wüntre-müretah dünkheak zhichoh.

¹⁵ Jumonü aniakhiuklim Atungpuh ki müretah jihang; keto yean lomibo ching Atungpuh Israel Thrünpuh mung müretahshang.

¹⁶ Alomi akheam chingnü isanü mungshikhünbo, Thiyuro-labuh Khülang müretahkhi shikhün isanü sochoh. Tüshe inü thachoh, I mülatsan, I mülatsan, I are! Mülapmüjirünü mülapmüjichoh, atsütsü mülapmüjirünü khide mülapmüjide rhimodo.

¹⁷ Mihtrebe tüsho shingkung, tüsho qimürip nüsa kheak lah, O lomi mihtsürübo!

¹⁸ Mihtrebe düsheak sobah sherü tsochonü shingkung ching keamyukbah; tüsho sherü shingkung chingnü künkhitchonü qimürip ching phuhbah. Tümüde thüning ayinripitbo khimshuhlah, tüsho alomi khimtan ajanchoh.

¹⁹ Alomi shahde thsümünimdo, alomi züngrüpabahdo, alomi thsümünimde niukdo.

²⁰ Alomi ju amüshangrü nangde yingyinglah, yünshim nangde laplapchoh; amülim-rhimokhi ju kheak mülangde ajaplah, tüsho lungchoh tüsho alode masürü.

²¹ Ju nimung Atungpuhnü yinmi ching aputungrübo tüsho alomi kiulongthsürübo thsümüchibah.

²² Arübo shingkung ching aramrü nangde rukhüh bemukhungbah; arübo rihyam ching rihdobah, tüsho nimung ahihdo dunglim thsümüchibah.

²³ Judüki khinu mitingdo akambah, tüsho aninü ayin mütah; tümüde Wuto Atungpuhnü Zion Müzüng kheak tüsho Jirusalem ching kiulongthsübah, tüsho api yo azothsürü miki api müretahkhi akhiukbah.