ISAIA 23 - AMÜSÜH HÜM CL Bible (BSI)

Phoenikia dünkheak Thiyusheak

¹ Tair dünkheak müchityu. Mulong rozhakde zhiang, O Tarshish sangkungbo, tümüde nü thsümünimdo. Küyimki arü Saipra chingnü azahkheanü arünü ju mükheahdo.

² Zhikde laang, O keyean larübo, O Sidon yinzüyindorübo, nüsa yunithsürübo keto hode

³ tüsho ke atobo kheak lakheah; nüsa shothsümolopü ju Nile chingnü yimlukhi Sihor hi lakheah, nüsa ju trükshihbo yo yinzüyindorü lakheah.

⁴ Achihang, O Sidon, tümüde ketonü asukdo, keto chipinü tha: “ Inü müthsünü yungsho müzübe, inü athunu mihtsürübo mümütrükhit yungsho aliberü athunu mübemusu.”

⁵ Küyimki thiyusheak Ijip chingnü arüchonü, arünü Tair yusheak dünkheak thsünübah.

⁶ Tarshish lim hode yüang–tüzhode tripang, O keyean larübo!

⁷ Ha nü asühachihkhi kiuto, küpü ying awün nimungbo chingnü la, shepü jingnü anihbe limshu ching lashihpü bekheanü ju a shi?

⁸ Shenü Tair azhihde ha lümkhi thsükhea, kuthran yihkhi kiuto, shepü yinzüyindorübo ju yakzanshuhrü lakhea, shepü shothsümolorü alomi wüntrekhi lakhea?

⁹ Wuto Atungpuhnü müretah kükheangküyang alala khenopü tüsho alomi wüntrekhi alala bahyukpü ha lümkhi thsüdo.

¹⁰ Nüsa nihbuh lomi ching hode yüang, O Tarshish tsührübebo; kheaküa ku alampung müla.

¹¹ Api khah keto lim chungkihdo, apinü kiulongthsübo niukdo; Atungpuhnü Kanan dünkheak chipi thsümünimpü thiyukhüm jihdo.

¹² Apinü tha: Nü kheakü masühachih, O ajunokhi atsangkhitkhi Sidon tsührübe; asürang, Saipra hode yüang–ju ching she nü sühakhim mülade alabah.

¹³ Kaldearü lomi kheahang! Ha mihtsürü kheakü mükheyukde lah; ha Asiriarünü mütüm shiwühbo khilim akhukheah. Arünü ayanpü aheangpungbo thsüa zhipshih, arünü anihbe kiulongthsürü-yambo thokheam, arünü anihbe athsümünimkhi kamshih.

¹⁴ Tüzhode tripang, O Tarshish sangkungbo, tümüde nüsa chipi thsümünimdo.

¹⁵ Ju nimung Tair ju kiulongthsürü khülang rhangdung lokhüh kam nerü mihabahbah. Kam nerü akheam ching, müzammüramrü khün thsükhi ching lakhi nangde Tair kheak dünjibah:

¹⁶ Bingshang khülang luang, kiuto mükamde yüang, mihabahkhi nü müzammüramrü! Düsheak aniung thsang, khün ahihdo thsang, junangde nü alümkhitbah.

¹⁷ Kam nerü akheam ching, Atungpuhnü Tair rhuakheahbah, tüsho anihbenü nihbe mulomüthsüpü lim rholobah, tüsho anihbenü lomi kiulongthsübo alala ki mulomüthsübah.

¹⁸ Anihbenü shothsümolokhi tüsho mihkhah mulokhibo Atungpuh kilim müsühkhitbah; anihbenü alü thsükhibo ju muzomukhung yungsho rama muzo, tüshe anihbenü amulokhi ju Atungpuh miki larü thsungkheak tsühyungpü tüsho khimmih suhdahde ahiuh-a jihbah.