ISAIA 19 - AMÜSÜH HÜM CL Bible (BSI)

Atungpuhnü Ijip Thsümüchibah

¹ Ijip dünkheak müchityu. Kheahang, Atungpuh ju ashankhi amo kheak binlah tüsho Ijip lim arüchoh; Ijip sangthsübo api miki ajanbah, tüsho arü bolung Ijiprü mulong niuthünakbah.

² Inü Ijiprü azhihde Ijiprü thsurangmusubah, tüsho arü khülangnü püpürü azhihde, yamhingrünü yamhingrü azhihde, kiutonü kiuto azhihde, kiulongthsünü kiulongthsü azhihde keochihbah;

³ arü bolung Ijiprü me mülade akambah, tüsho inü arü lümkhibo akeangkeang kamshihbah; arünü sangthsübo tüsho ashekhi mebo tüsho mesherü le mebo ki keokhibah;

⁴ inü Ijiprü ju amüküp aputungrü khah ching jihbah; bukmüke kiulongthsürünü arü kurungkheak yakzan shuhbah, Wuto Atungpuhnü thachoh.

⁵ Nile kebo ngahbah, tüsho ayung ju kungdrangdo akambah;

⁶ kerubo müneanbah tüsho Ijip yo Nile khah chamnakkhibo akheambah tüsho ngahabahbah, khiukbo tüsho pheangbo yiuhabahbah.

⁷ Nile yean ayung mün ki khiukbo tüsho Nile yeande mükheankhi yiuhabahbah, yünde atsobah, tüsho mülade akambah.

⁸ Sherünü thüngüh ramchonü atüzhobah; Nile ching khoyang yukrü mulong rozhakbah, tüsho sherünü ke kheak keang jipkihchonü sühzhakbah.

⁹ Hing-keakpung rhimorü tüsho hing-keaksorü achih ngübah.

¹⁰ Khim-keakrübo lümchihyuk ngübah, tüsho mulomüthsürü alala mulong tukthsübah.

¹¹ Zoan limberübo shahde makhalah; lümlung larü Pharao lümthiyan-jihrünü azhazha lümkhi jihchoh. Küde thsah nünü Pharao ki thakhukpü, “ I lümlung larü khülang, adüso kiulongthsürü tsühsoniuso ah”?

¹² Kheakü nü yo lümlung larü küching la? Wuto Atungpuhnü Ijip azhihde lümkhi tümü lanü arünü nü ki thashang tüsho mükheahshang.

¹³ Zoan yakzanshuhrübo makharü kamdo, tüsho Memphis yakzanshuhrübo mülapyuka lah; sherübo trükshih yo amühit lungbo lakheanü arünü Ijip bephülapdo.

¹⁴ Atungpuhnü arü kheak ayingying me dungyukjihdo; tüsho amüshangrünü mülümde ayingyingkhi ruk arünü Ijip rhimo alala ching yingyingshihdo.

¹⁵ Ijip ching lakhi alarü yungsho zhochihrü, adungto yungsho mükheyukrü shenü she arung müjihkhuk.

Ijipnü Atungpuh Kingaünbah

¹⁶ Ju nimung Ijiprü ju azoberü nangde alabah, tüsho Wuto A TU N GPU H khah arü azhihde ashuhkihkhi müngüh ajande atripbah.

¹⁷ Tüsho Juda lomi ju Ijiprü ki atrebe kambah; Wuto Atungpuh nü arü azhihde lümkhi thsükhi Juda dünkheak thakhi sorü abannü atrebah.

¹⁸ Ju nimung Ijip lomi ching kiuto phüngünü Kanan yutha thabah tüsho Wuto Atungpuh ki thiyuro thiyuchihchimbah. Arü bolung kiuto khülang Ani kiuto de ajibah.

¹⁹ Ju nimung Ijip lomi phulung ching Atungpuh kingaün sadam khülang labah, tüsho aredung kheak Atungpuh lung-dungjing khülang labah.

²⁰ Ha Ijip lomi ching Wuto Atungpuh kilim amütsan tüsho thiyumütsan khülang labah; küyimki ajunorü dünkheaknü arünü Atungpuh ki zhibanü, apinü arü kilim akhümkhitrü khülang yüshihbah, tüsho atsungdobah tüsho arü bekhitbah.

²¹ Atungpuhnü anihbuh Ijiprü ki mükheahshihbah; tüsho ju nimung Ijiprünü Atungpuh mükheahbah, tüsho shuhmülanga jihde taka kingaünbah, tüsho arünü Atungpuh ki thiyuchihchimbah tüsho jurü rhimobah.

²² Atungpuhnü Ijip shikbah tüsho athsüngubah; arünü Atungpuh kilim rholobah tüsho apinü arünü mushukhibo anibah tüsho arü thsüngujihbah.

²³ Ju nimung Ijip chingnü Asiria khiungde limto khülang labah, tüsho Asiriarünü Ijip ching arübah, tüsho Ijiprünü Asiria ching yübah, tüsho Ijiprünü Asiriarü lungnü kingaünbah.

²⁴ Ju nimung Israel ju Ijip tüsho Asiria lung asampü labah, alomi bolung müngühmühi khülang,

²⁵ sherübo ki Wuto Atungpuhnü müngühjihde tha, “ I mihtsürü Ijip müngühmühi thsang, tüsho I khahnü rhimokhi ju Asiria, tüsho I yamrüplurüp ju Israel.”