ISAIA 18 - AMÜSÜH HÜM CL Bible (BSI)

Atungpuhnü Ethiopia Thsümüchibah

¹ Ah, Ethiopia ayungbo hobahle aghi adankhi,

² limburü Nile chingnü, sangküp-sangkung ching kenü kheaknü arüshihchoh! Yüang, nüsa athrikhi yunithsürübo, ashang tüsho küp-shahshah trükshih kilim, aphüni tüsho limshu ching trede alakhi mihtsürü kilim, wu-sühmüh lakhi tüsho akuk ngükhi trükshih kilim, shepü lomi ayungbonü chamnakbah la.

³ Nüsa alomiküp ching larü alala, nüsa sherü alomi kheak lacho, küyimki amütsan riphin khülang awungbo kheak shuhkihbanü, kheahang! Küyimki hulipungpung mütbanü, aniang!

⁴ Tümüde Atungpuhnü I ki ha thado: Inü I lapung chingnü, ani thsükhi ching müsürido atakkhi nangde, yimlu kim atak ching ayinke-amo nangde malande akheahbah.

⁵ Tümüde yimlu müngüh, küyimki abün pungkhi hoba tüsho apungkhi ju amünkhi kurungaso kamba, apinü adübitbo ju arhütbenü ayihshakbah tüsho akhahbo chinkhi apinü lipshaka bahbah.

⁶ Arü alala awung shihtsüh wuhnubo kilim tüsho alomi shiwühbo kilim zojihbah. Tüsho muzhu ching shihtsüh wuhnubonü jurü tsühbah, tüsho lomi shiwüh alalanü tsüngkam ching jurü tsühbah.

⁷ Ju kim ching Wuto Atungpuh kilim, mihtsürü ashang tüsho küpshahshah, trede alakhi mihtsürü aphüni tüsho limshu, wulakhi tüsho akuk ngükhi trükshih, ayungbonü chamnakbah alakhi lomi ching larünü Wuto Atungpuh mung lapung Zion Müzüng ching thsambahbo handarübah.