ISAIA 17 - AMÜSÜH HÜM CL Bible (BSI)

Siria tüsho Israel Thsümüchipü

¹ Damaska dünkheak müchityu khülang. Kheahang, Damaska ju kiuto thsüpü arün thsübah, tüsho athsümünimkhi mujung kambah.

² Anihbe kiutobo lünnü bahyuka labah; arübo mihnu boto yimtsühpung labah, küpü zuhyuka yapba, tüsho shenü she arü mütreshih.

³ Ephraim chingnü chipi dükheakbah tüsho Damaska chingnü kiulongthsü dükheakbah; tüsho Siria aningkhi ju Israel tsührü müretahkhi nangde alabah, Wuto Atungpuhnü thachoh.

⁴ Ju nimung Jakob müretahkhi abobe kamshihbah, tüsho shih kihkhi trukabahbah.

⁵ Tüsho ju yimlurünü dubuh kheaknü buhmukhungkhi tüsho hi ye yimlukhi kim nangde alabah, tüsho khürünü Rephaim jindükhün ching hi ye tsüka lukhi kim nangde alabah.

⁶ Ju ching yimlu aninga labah, oliv sangdung anitchoki nangde–sangaso mahne yungsho mahsam amuyu khah ching, phüyi yungsho phüngü sangasodung khahbo kheak kihbah, Atungpuh Israel Thrünpuh nü thachoh.

⁷ Ju nimung mihtsürübonü arü Thrünrü akinashu jihbah, tüsho arü müknü Israel yo Amüsühbuh Khülang kilim kheahbah;

⁸ arünü arü khahnü athsükhi kingaün sadambo mükheah, tüsho arünü arü yingkhingbonü athsükhi, Ashera sangthsü yungsho rhümthüneabe kingaün sadam wüntre müjih.

⁹ Ju nimung sühmüh lakhi arü kiutobo Hiv tüsho Amorrü lapung Israel tsührü hode abahkhitkhi nangde alabah, tüsho ju ching zhikrangkhündo alabah.

¹⁰ Tümüde nüsanü nüsa khümkhitbuh Thrünpuh mihabahdo, tüsho nüsa tsoyukpung Lung mülümkhit; jumonü, nüsanü sangdung atsü khimkhim she tüsho khiungke lim yo kurungasobo khimkhim she,

¹¹ nüsanü akhimkhi nimungnü jurü chinkihshihshih she, tüsho nüsanü mükheankhi yapsunü pungkhitshihshih she, tütüshe mulong tukthsü tüsho müthsüngube thsünükhi nimung khülang ching yimlupü mülade akambah.

Thiriri Trükshihbo Kukkhi

¹² Ah, mihtsürü ahihdo arhunganimkhi, arünü keto ahuhkhi nangde alanchoh! Ah, trükshihbo arungkhi, arünü ke ato ahukkhi nangde ahukchoh!

¹³ Trükshihbonü ke ahihdo ahukkhi nangde ahukchoh, tüshe apinü arü müdanbah, tüsho arü awungbo kheak müneang apung müngüh yünkhi nangde tüsho chinthrüm müheankhi asungthulung nangde limshude atsobah.

¹⁴ Arelim kim ching kheahang, atrebe! Yapsu mükikde arübo müla. Ha isa thsümünimrü kuhi lah, tüsho isa yanrü shihcham lah.