ISAIA 16 - AMÜSÜH HÜM CL Bible (BSI)

Moab Apungani Mütsükhi

¹ Lomi ching yakzanshuhrü kilim namfimihnunubo, Sela chingnü loshelo limro hode, Zion tsührübe wung lim yüshihchoh.

² Yüla arüla de aphinkhi wuhnubo nangde, asap hiumüzütkhi nangde, junangde Moab tsührübebo Arnon keyean kheak lah.

³ “ Lümthiyan jihang, thiyuro lungki mülüjang; animuro nü me azhing nangde kamshang; yankhitatsahrü jikshang, tsotsahrü dümülapyuk;

⁴ Moabrü yankhita-tsahrü nüsa lung lashang; athsümünimrü kheaknü arü jikpung thsang.” Küyimki ajunorü mülade akambanü, tüsho athsümünim kheambanü, tüsho jangkhijangrarü lomi chingnü akheambanü,

⁵ judüki kiulongthsübinkiu khülang mihmuzho ching David khimyam ching thsakhambah, tüsho ju kheak athülünkhi yakzanshuhrü khülang thiyuro lungki yimrü tüsho alungki rhimopü niokheamrü binbah.

⁶ Isanü Moab kükheangkhi sodo– api küdükhüh she kükheangla!–api bukakhiukkhi, api kükheangkhi, tüsho api mulong zhipzhipkhi; tüshe api kükheangkhi akeangkeang lah.

⁷ Jumonü Moab tripde tüzhoshang, mihbüm abannü Moab thsungkheak tripshang. Kir-heres ching yikhap-mukuhkhi lümkhitkhinü shahde lüm dükheakang.

⁸ Tümüde Heshbon lubo yiuhabahdo, tüsho Sibma kurungasobo, khülang ki adüchibonü trükshih putungrübo müshangshih, Jazer khiungde yü tüsho loshelo khiungde chinde yü; akhahbo khülang ki khiungke lim phüde yü tüsho keto hoa lakheah.

⁹ Jumonü Jazer mitripkhi nangde inü Sibma kurungaso thsungkheak tripchoh; inü I chikenü nü pangchoh, O Heshbon tüsho Eleale; tümüde nü aso yimlukhi tüsho nü hi yimlukhi arün thsüdo.

¹⁰ Asühachihkhi tüsho asüharabe aso-asokhi lu chingnü hande tsodo; tüsho kurungasolu ching khünbo müthsü, azhikhi düsheak müla; anitpung ching anitrünü yukhu münit; asühachihde azhikhi akheam thsüdo.

¹¹ Jumonü Moab thsungkheak bingshang nangde, tüsho Kir-heres thsungkheak I me nangde mulong rozhakchoh.

¹² Küyimki Moabnü ayübanü, küyimki api achang dangpung kheak keaksahbanü, küyimki apinü arüng-yam ching tamkhüntamnüpü arübanü, ju atsü mükam.

¹³ Ha Atungpuhnü Moab dünkheak ahokhi kim ching asukkhi yu lakheah.

¹⁴ Tüshe kheakü Atungpuhnü thachoh, Muloa-rhimoshihrü kambo nangde kam mahsam dükeak chingnü mih hihde lalashe Moab müretahkhi ju abahyukkhi kambah; tüsho sherü aninga labanü khide anükbah tüsho arü reangmüzahde alabah.