ISAIA 15 - AMÜSÜH HÜM CL Bible (BSI)

Moab Thsümünimpü

¹ Moab thsungkheaknü müchityu khülang. Tümütüsho Moab ching Ar tsüngrekhühnü thsümünima lah; tümütüsho Moab ching Kir tsüngrekhühnü thsümünima lah.

² Dibon mihtsürübo arüngyam lim, achang dangpungbo ching atrippü wutudo; Nebo tüsho Medeba kurungkheak Moabnü tüzhochoh. Mihbüm aban ku hütdo, mükhühnam nipdo;

³ kiudunglimrobo ching arünü shungliukhim phuyuchoh; thüyam kumungbo tüsho wungdobo kheak mihbüm abannü chike bukde tüzhochoh tüsho düsüknimchoh.

⁴ Heshbon tüsho Elealenü zhichoh, arü düsheakbo Jahaz khiungde solah; jumonü Moab thirithsürübonü zhichoh, tüsho arü mulong keamkhia lah.

⁵ I mulongnü Moab thsungkheak tripchoh; anihbe mihtsürü Zoar ching, Eglath-shelishiya ching tsodo. Tümüde Luhith mutuh kheak arü tripde wutuchoh; Horonaim limro ching arünü athsümünimkhi dünkheak zhichoh;

⁶ Nimrim kebo zhikrangkhündo lah; rim mukuh-a lah, wokephüyak müla tüsho rimrhang tümü müla.

⁷ Jumonü arü suhdahde alü thsükhi tüsho arünü azomukhungkhi hanbah Ayung ching keyeansang hode hanbah yüchoh.

⁸ Tümüde azhikhi khülang Moab lomi mükamde yüdo; atüzhokhi düsheak Eglaim khiunglah, atüzhokhi düsheak Beer-elim khiunglah.

⁹ Tümüde Dibon kebo thiyihnü milah; tütüshe Dibon kheak kheaküshe inü atsorü Moab thsungkheak, lomi ching aninga larü thsungkheak kekhüzü khülang handarübah.