ISAIA 11 - AMÜSÜH HÜM CL Bible (BSI)

Mungtsü Kiulongthsü

¹ Jesse sangme kheaknü adübit khülang chinbah tüsho api yingbo kheaknü akhah khülang akhiukbah.

² Atungpuh me api kheak labah, lümlung tüsho anikhitkhi me, lümthiyan tüsho Wuto me, mükheahmudu tüsho Atungpuh wüntrekhi me.

³ Api asühkhi Atungpuh wüntrekhi ching labah, apinü amüknü angükhinü mahmükhap, yungsho anükhünnü asokhinü mükhikzhak;

⁴ tüshe thiyuro lungkinü apinü zhochihrü mahkhapbah tüsho alomi ching azhihayihrü thsungkheak alungkinü khikzhakbah; apinü api mün tsonü alomi shikbah, tüsho amün sheaknü apinü mihbukmuyuk laksahbah.

⁵ Thiyuro-lungki api shahmo-rümbe thsübah, tüsho athülünkhinü api chimrümbe thsübah.

⁶ Rimrenü namfimihnunu lung labah, sangtsungnü mihnu nunu lung yapbah, moshi nunu tüsho kekhüzü nunu nungde yimtsühbah, tüsho azürü nunu khülangnü arü bebah.

⁷ Moshi tüsho kuto nungde yimtsühbah, arü nunu nungde ayapbah; tüsho kekhüzünü moshipung nangde hineang tsühbah.

⁸ Niuh yungrü khungarünü jingto khün ki ahoribah, tüsho azürü nununü lokung khün ching akhah chungyukbah.

⁹ Arü I yo amüsüh wung alala kheak müyuri yungsho müthsümünim; tümüde kenü keto zündokhi nangde Atungpuh mükheahkhinü alomi mide akambah.

Ramtso Mihtsürü Alodarübah

¹⁰ Ju nimung Jesse ying kheaknü mihtsürübo kilim amütsan khülang nangde alabah; trükshihbonü api ki shomukhungbah, tüsho api lapung müretahde alabah.

¹¹ Ju nimung Asiria, Ijip, Pathros, Ethiopia, Elam, Shinar, Hamath, tüsho keto kekunglo chingnü aninga larü khümkhitpü mahne kipü Atungpuhnü akhah chungbah.

¹² Apinü trükshihbo thsungkheak amütsan riphin khülang shuhkihbah, tüsho müzüta lakhi Israel tüsho hiumüzüta lakhi Juda alomi mühit phüyi chingnü bemukhungbah.

¹³ Ephraim mükthsükhi chamachihbah, Juda mükzahlungzah arün thsübah; Ephraimnü Juda kheak mükmüthsü, tüsho Judanü Ephraim kheak mülungkhang.

¹⁴ Tüshe anenü aniyüzahlim Filistiarü düthsün kheak phinde yükibah, anenü thsürubah aniakhiuklim mihtsürü yankhia lubah. Anenü ane khah Edom tüsho Moab azhihde achungbah, tüsho Amonrünü arü ki mihyu anibah.

¹⁵ Tüsho Atungpuhnü Ijip keto ngahshihbah; tüsho api pung atak bede keto kheak akhah ayitbah; tüsho keru thüne chamnakbah, tüsho jingnü ahopü limro khülang kamshihbah;

¹⁶ junangde Asiria chingnü limto khülang api mihtsürü aningkhi thsungkheak, Israelrü Ijip lomi chingnü atuchoki lakhi nangde alabah.