ISAIA 10 - AMÜSÜH HÜM CL Bible (BSI)

¹ Nüsa shepünü thiyuro mülakhi yakzan thsüchonü are, shepünü ajunobe yuzüng thrütcho,

² küpkhukrü thiyuro chingnü beakhinpü tüsho I mihtsürü zhochihrü alim bephülappü, junangde khimoberübo nüsa yo ayankhikhi kukruk thsübah, tüsho mürerübo nüsa shih thsübah!

³ Thsümüchi nimung ching, limshunü arüpü lakhi thsümütsü ching nünü tümü rhimoba? Shepü ki arung thsungkheak nü shande ayüba, tüsho nü lakhit kükheak bahba?

⁴ Nüsa keochih ching laksahbah yungsho aramrü nangde thobah ayübah. Ha alala thsungkheak api bukakhiukkhi rholode mutso; api khah kheakü khiungde chungkih-a lah.

Asiria kheak Thrünpuh Mahkhap

⁵ Are, Asiria, I bukakhiukkhi tso–arü khah ching lakhi shitso ju I mulong zhipzhipkhi!

⁶ Thrünpuh mümükheahkhi trükshih azhihde inü api yüshih tüsho I bukakhiukkhi mihtsürü azhihde inü api ki thiyukhüm jih, kukruk yankhia lupü tüsho ahühpü, tüsho kiudunglimro akhimniuhniuh nangde arü kheak jungpü lah.

⁷ Tüshe apinü alümkhi ha yung, yungsho api lümkhi ching ha müla; tüshe athsümünimpü tüsho anükhüh yungde trükshihbo dükheakshihpü ha api mulong ching lah.

⁸ Tümüde apinü tha: “ I yo limthorübo alala kiulongthsürü yung de?

⁹ Kalno ju Karkemish ruk yung de? Hamath ju Arpod ruk yung de? Samaria ju Damaska ruk yung de?

¹⁰ I khahbonü sangthsü kiulongthsübo khiunglah, küpü Jirusalem tüsho Samaria sangthsübo kheaknü akibea,

¹¹ inü Samaria tüsho anihbe sangthsü kheak tümü rhimodünü Jirusalem tüsho anihbe sangthsübo kheak inü mürhimobea de?”

¹² Küyimki Atungpuhnü Zion Müzüng tüsho Jirusalem kheak arhimo alala banbanü, apinü Asiria kiulongthsüpuh bukakhiukde kükheangkhi dünkheak thsümüchibah.

¹³ Tümüde apinü tha: “ I khah sühmüh tüsho I lümlungnü inü ha rhimodo, tümüde I anikhitkhi lah; inü mihtsürübo yo aredungbo lahakhindo, tüsho rahpungbo ludo; moshipung nangde inü kiulongthsübinkiu kheak binrü thokhido.

¹⁴ I khahnü mihtsürübo lakhit wuhnu sap nangde ngükhitdo; tüsho khürünü abahyukkhi wuhnuke momukhungkhi nangde, inü alomi alala momukhung; tüsho shenü she aghi maphap, yungsho mün müka, yungsho mukhung.”

¹⁵ Awünü alangzü achebuh kumung yükihba de, yungsho sangrhütbenü arhütbuh azhihde kükheangba de? Shitso khülangnü mihtsürü khülang mushuhkih; mihtsürü khülangnü shitso shuhkihchoh!

¹⁶ Jumonü Wuto Atungpuhnü athrih tukthsü adüküng thirithsürübo kilim yüshihbah, tüsho api müretahkhi bukkhüp mo takkhi nangde atakpü takkihbah.

¹⁷ Israel ayin ju mo khülang kambah, tüsho api Amüsüh Khülang motru kambah; ju atakbah tüsho api yangbo le khingphubo nimung khülangnü aniuabahbah.

¹⁸ Api müretahkhi murung tüsho sangaso lo Atungpuhnü me tüsho pang ane chido thsümünimbah, tüsho ju ashebe tukthsünü mihtsürü thsümünimkhi nangde alabah.

¹⁹ Api sangdungbo aningkhi khide anükbah, junangde azürü khülangnü arü thrüta zokhukbah.

Anükbe Alodarübah

²⁰ Ju nimung aningkhi Israel tüsho Jakob yamkhün rhangdung larübonü kheaküa arü shikrü kheak düthsün mangükih, tüshe Israel yo thiyuro Amüsühbuh kheak angükihbah.

²¹ Jakob yamkhün aningkhi Wuto Thrünpuh kilim alodarübah.

²² Tümüde nü mihtsürü Israel keto loyi nangde lalashe arü aningkhi lang alodarübah. Adükheakshihpü ju thiyuro-lungkinü mide yakzan thsakhamlah.

²³ Tümüde Wuto Atungpuhnü yakzan thsükhi nangde alomi alala ching akheam tsütsü kamshihbah.

Atungpuhnü Asiria Thsümüchibah

²⁴ Jumonü Wuto Atungpuhnü ha thachoh: O Zion ching lakhi I mihtsürü, Ijiprünü arhimokhi nangde Asiriarünü nüsa tsonü alakkhi tüsho nüsa azhihde shitso shuhkihkhi dütre.

²⁵ Tümüde anükhüh kheaknü nüsa azhihde I mulong zhipzhipkhi arün thsübah tüsho arü thsümünimpü I bukakhiukbah.

²⁶ Wuto Atungpuhnü Oreb Lungto kheak Midiarü shikkhi nangde arü azhihde rhaptso shuhkihbah; api shitso keto mikheak labah, tüsho Ijip ching rhimokhi nangde apinü ashuhkihbah.

²⁷ Ju nimung arü hahmülang nü dubuh kheaknü ashuhkhibah tüsho nü shih kihkhinü arü sangkaplak nü hung kheaknü athsümünimbah.

²⁸ Arü Ai ching arüdo; arü Migron hode yüdo, Mikmash ching arü hah zolah;

²⁹ arübo alakshak-limro hode yüdo, Geba ching arü tsüngrekhüh thsungkheak binkheamlah; Rama ajanchoh, Saul yo Gibea tsodo.

³⁰ Achangnü zhiang, O Gallim tsührübe! Aniang, O Laish! Anihbe ki alojang, O Anathoth!

³¹ Madmena ashankhi ching lah, Gebim ching larü tsoyukpung yimchoh.

³² Ha nimungnü api Nob ching labah, apinü Jirusalem awung, Zion tsührübe Müzüng kheak akhah zhimpungkhi niukbah.

³³ Kheahang, Wuto Atungpuhnü atrebe wunü sangkhahbo ngamshakbah; sangdung ashangshangbo kiushakbah, tüsho achangbo ju abobe kamshihbah.

³⁴ Apinü murung akheah ju awünü akiukheambah, tüsho Lebanon atsüdak sangdungbo she akeambah.