ISAIA 1 - AMÜSÜH HÜM CL Bible (BSI)

¹ Juda tüsho Jirusalem dünkheak, Juda kiulongthsürübo Uzzia, Jotham, Ahaz tüsho Hezekia kim ching ngükhi Amoz tsührü Isaia michih.

Thrünpuhnü Api Mihtsürübo Thürühkhi

² Aniang, O yinmibo, tüsho aniang O alomi; tümüde Atungpuhnü asukdo: Inü tsührübo mütrükhit tüsho arübo zübemusu, tüshe arünü I azhihdo.

³ Moshipungnü atungrü mükheahlah, tüsho donkinü aputungrünü yimkippung mükheahlah; tüshe Israelnü mümükheah, I mihtsürünü manikhit.

⁴ Ah, neak lakhi trükshih, amülimkhinü mihtsürübo ajapbah lah, amütsü rhimokhi münü, athsümünim rhimorü tsührü, shepünü Atungpuh bahyuk, shepünü Israel Amüsühbuh Khülang mükhemükim, sherübo shahde chamkhibah la!

⁵ Tümüde nüsanü kheaküshe laka lupü yimcho? Tümüde nüsanü mutuklode azhihcho? Ku abümnü tukthsülah, tüsho mulong abümnü keahkhichoh.

⁶ Jinglung chingnü, thangphülang khiungde, ju ching atsü müla, tüshe areakbo le mübo tüsho mübo thiyihkhi lah; jurübo mümüsühabah yungsho mürüm, yungsho müdangke mumujude lah.

⁷ Nüsa lomi zhikrangkhündo lah, nüsa kiutobo monü taka lah; nüsa mikinü khiungkerünü nüsa lo thsümünimdo; khiungkerünü lahyuka bahkhinü zhikrangkhündo lah.

⁸ Tüsho Zion tsührübe lang kurungasolu ching yün nangde, liuheak lu ching yünshim nangde, azündokhi kiuto nangde aninga lah.

⁹ Wuto Atungpuhnü isa anükhüh aninga mülashihkhülaa, isa Sodom nangde alabah, tüsho Gomorra nangde akambah.

¹⁰ Atungpuh yu aniang, nüsa Sodom yakzanshuhrübo! Isa Thrünpuhnü thsangyukhi aniang, nüsa Gomorra mihtsürübo!

¹¹ Nüsanü hihdakde laksah-a kingaünkhibo I ki tümü la? Atungpuhnü thachoh; namfimihnupungbo tüsho yimkipkhi shiwühbonü I suhdahde taka kingaündo; inü moshibo yungsho namfimihnunu, yungsho mihnubo thiyih ching masüh.

¹² Nüsa I miki arüchoki, I mahkhappung thrümpü thsüde shepünü ha nü khah chingnü akheangkhea?

¹³ Kingaünbo handarükhi yihnüpü müla; arhümthüneakhi inü thraneanlah. Khinu aso tüsho amuni tüsho mukhungmüdan– amülim kihde arüngako mukhungmüdankhi inü marümkhuk.

¹⁴ Nüsa khinu asobo tüsho akhukhitkhi thüniobo I menü thraneanlah; arübo I hahmülang khülang kamdo, arü hankhinü I khiabahdo.

¹⁵ Küyimki nüsanü nüsa khah chungkhitbanü, nüsa kheaknü I mükbo jikabahbah; nüsanü khide tamkhüntamnünü she, inü mani; nüsa khahbo thiyihnü milah.

¹⁶ Nüsa müsühang; nüsa müsühde kamang; nüsanü amütsü rhimokhibo I mük kinü yihkhita bahang; amütsü rhimo arün thsang,

¹⁷ atsü rhimopü anikhitang; thiyuro yimang, junoa larü bekhitang, mürerü tsungloang, khimoberü thsungkheak mushujang.

¹⁸ Kheakü arang, isa rukhühnü lümakheahanü, Atungpuhnü thachoh: nüsa neakbo mürümdo lalashe, jurübo phürüm nangde alabah; jurübo neakrümde mürümrüm she, shihnam nangde akambah.

¹⁹ Nüsanü mulongsho tüsho mihyu anisho, nüsanü alo ching yo atsü tsühbah;

²⁰ tüshe nüsanü reanglosho tüsho azhihsho, nukshangnü nüsa muyubah; tümüde Atungpuh münnü asukdo.

Neak Lakhi Kiuto

²¹ Küdükhüh she athülünkhi kiuto müzammüramrü kama la! Anihbe kheak thiyuro lakheah, thiyuro-lungki anihbe kheak lakheah, tüshe kheaküa mihlaksahrü ah!

²² Nü yo shotoyinchi ju yinchikhih kamdo, nü yukhu ju ke lung dungrudo.

²³ Nü yo yakzanshuhrübo azhihrü tüsho ahührü müyamrübo lah. Mihbüm abannü buknim muzhochoh tüsho thsambahbo dunglim alihchoh. Arünü mürerü mutsunglo, tüsho khimoberü dünkheak arü miki marü.

²⁴ Jumonü Wuto Atungpuh , Israel yo Wutonü thachoh: Ah, inü I riribo kheak I bukakhiukkhi dungkihbah, tüsho I riri kheak I royimbah!

²⁵ Inü nü azhihde I khah rholobah; yinchikhih tsangkhitkhi nangde nü münean alala yihkhita bahjihbah.

²⁶ Tüsho inü nü yo mahkhaprübo akhuhlim nangde akamshihbah, tüsho nü yo lümthiyan-jihrübo atankih nangde akamshihbah. Ju dunglim nü thiyuro-lungki, athülünkhi kiuto de ajibah.

²⁷ Zion ju thiyuronü rhokhitbah, tüsho ju ching larü thiyuro lakhinü müthrirübo rhokhitbah.

²⁸ Tüshe azhihrü tüsho aneakrübo rukhühnü adükheakbah, tüsho sherünü A TU N GPU H bahyukchonü muyuabahbah.

²⁹ Tümüde nünü kingaünkhi thülamdung dünkheak nü achih ngübah; tüsho nünü amokhitkhi ayündo dünkheak mi zhinbah.

³⁰ Tümüde nü a ayü sheabahkhi thülamdung nangde, tüsho ke mülakhi ayündo nangde alabah.

³¹ Sühmüh larü ju mojim nangde akambah tüsho arü rhimo modübin nangde alabah; arü le arü rhimo rukhühnü shenü müyihmütde atakbah.