IBRI 9 - AMÜSÜH HÜM CL Bible (BSI)

Alomi tüsho Yinmi Kingaün

¹ Kheakü akhuhbe tangzüngkhi ju kingaün yuzüngbo tüsho alomi arüngakopung lakheah.

² Arüngkhimyam ju thsü. Akhuhbe khiungshak ching tsünpung-zopung, dükhüm tüsho müsühkhitkhi yikhap lakheah; ha Amüsüh Dangpung de ji.

³ Mahnepü zhindokhim dunglim ju Khide Amüsüh Dangpung de ajikhi khiungshak khülang lakheah.

⁴ Ju ching rhümthünea takbe suna kingaün sadam tüsho sunanü alüpdokhi tangzüng sangdan lakheah. Ha sangdan ching ju manna zahkhi suna pangjiphüh, apungkhi Aron tso, tüsho tangzüng lungbeakbo lakheah;

⁵ ju kumung mihmüthsüm binkiu alamdode müretahkhi cherubim lakheah. Harü dünkheak kheakü isanü mütsanmükhide athapü mukuk.

⁶ Küyimki harü tsanglungkhi banbanü, amükeamrübonü arü tankih rhimopü mutuklode aleangbe khiungshak ching yüzah;

⁷ tüshe achangbe amükeamrü lang alungbe khiungshak ching kam ching khülangki yüzah, tüsho api le mihtsürübonü mümükheahde ayihbeakkhi neak dünkheak jihkhi thiyih muludüa müyüzah.

⁸ Ha hode aleangbe arüngkhimyam zhip khiungdüa arüngakopung ching yüzahpü limro mükhimshuh de Amüsüh Menü huhchoh.

⁹ Thsambahbo tüsho laksah-a kingaünkhinü kingaünrü lümkhi mümüsühkhuk dükhi huhde ha lün thsungkheak haju amütsan khülang lah,

¹⁰ tümütüsho arünü jim, ayungbe, tüsho atsangkhitbe aphuaphu arüngako thsungkheak lang amüthrilokhi khiungde arhimokhukpü lakhi akhualokhi lah.

¹¹ Tüshe ha ching lakhi atsübo dünkheaknü, atobe tüsho khide athülün, mihtsürü khahnü müthsükhi, ha thrüta lakhi ching mübekhi arüngkhimyam hode Khrista ju achangbe amükeamrü thsüde arü.

¹² Mihnubo tüsho moshipungbo thiyih hode yung tüshe anihbuh thiyih hode lünnü isa rhokhitpü rüpde khülangkinü lang Amüsüh Dangpung ching yüzah.

¹³ Mümüsühkhi mihtsürü kheak mihnubo le moshipungbo thiyih rhakkhi tüsho moshinunu takkhi wahbonü arü shih mümüsühkhi tsangkhitchosho,

¹⁴ lün lakhi Me hode areak mükihde Thrünpuh kilim anihbuh jihkhi Khrista thiyihnü ashekhi rhimo chingnü arhang Thrünpuh tankihpü nüsa lümkhi küdükhüh she atsangkhitba!

¹⁵ Jumonü api ju aso tangzüng limburü ah, junangde sherü jia lanü alokhikhi lün yamrüplurüp leangkhibah, tümütüsho akhuhbe tangzüng bukkhüp thsümünimkhi chingnü arü rhokhitpü ashekhi dünji.

¹⁶ Küching tangzüng lanü tangzüng-jihrü shekhi mütsanpü yihnüpü labeah.

¹⁷ Tangzüng ju ashechoki lang tankihchoh, tümütüsho athsübuh arhang la khiungde ju marü.

¹⁸ Jumonü akhuhbe tangzüng she thiyih ahorikhi hodü lang atankihkheah.

¹⁹ Tümüde küyimki yakzan yukhüm Mosanü mihtsürü alala ki khipkhitkhea, apinü ke bede moshinunu le mihnubo thiyih lubah alamlam-hing mürüm tüsho monam sangkhah kheaknü küpqiu le mihtsürübo alala kheak rhakkih.

²⁰ Apinü tha, “Ha Thrünpuhnü nüsa ki thiyukhüm jihkhi tangzüng thiyih ah.”

²¹ Tüsho ju ruk apinü arüngkhimyam le kingaün ching ahoribe kukrukbo alala kheak thiyih rhakkih.

²² Dükde, yakzan bukkhüp lüpdükhi thiyihnü atsangkhitpü lah, tüsho thiyih mübukkihdüa neak bahkhi müla.

Khrista hode Neakbo Lude Tsochoh

²³ Hanangde yinmi kukrukbo kheahkhikhi ju atsangkhitpü yihnüpü lakheah, tüshe yinmi kukrukbo a harü kheaknü atsüdakbe shuhmülanga jihkhibo lah.

²⁴ Tümüde Khrista ju atsütsübe kheahkhikhi, khahnü athsükhi arüngakopung ching yungde, kheakü isa thsung thsüde Thrünpuh miki yüpü yinmi ching yüzahkheah.

²⁵ Yungsho achangbe amükeamrünü nihbuh yo yungkhi thiyih lubah kam aban Khide Amüsüh Dangpung ching yüzahkhi nangde alochode api kingaünpü yinmi ching yüzahkhi yung;

²⁶ dükhülaa alomi thrünchoki Khrista ahihdo ki thsünüa labah. Tüshe kheakü lün akheam ching anihbuh shuhmülanga jihkhinü neak hande atsopü thsüde rüpde khülangki lang api arüdo.

²⁷ Tüsho mihtsürübo khülangki shebah jushu thiyukhap arüpü lakhi nangde,

²⁸ ahihkhüh neak hanpü Khrista khülangki jihkhi ju, neak phüpü yung tüshe mulong dukde api aleangrü khümkhitpü mahne kipü arübah.