IBRI 4 - AMÜSÜH HÜM CL Bible (BSI)

¹ Jumonü, api sühakhim ching yüzahpü alokhikhi lale, nüsa she lang she mülakphahpü thsüde isanü kümkanganü.

² Tümüde arü kilim nangde thiyusheak atsü isa kilim arü tüshe arünü asokhi yusheaknü arü alü müthsü, tümütüsho arünü akin bede musokhit.

³ Kheakü apinü athakhi nangde isa akinrübonü ju sühakhim ching yüzah, “Inü bukakhiukkhi ching thiyuchihchimkhi nangde, ‘Arü küyimkishe I sühakhim ching müyüzah.’ ” Tütüshe api rhimo a alomi thrünchokinü bana lakheah.

⁴ Tümüde apinü dang khürü ching nimung thüne dünkheak hanangde thaa lah, “Tüsho Thrünpuhnü nimung thüne nipü api rhimobo alala chingnü sühakhim.”

⁵ Tüsho kheaküshe ha dangpung ching apinü tha, “Arünü küyimkishe I sühakhim ching müyüzah.”

⁶ Jumonü ju sühakhim ching khürü yüzahpü kheaküshe aninga lah, tüsho sherünü akhuhlim thiyusheakatsü leangkhikheanü arü mihyumanikhi hode müyüzah,

⁷ kheaküshe Thrünpuhnü, “Khihni” de nimung püpü zojih. Kam ahihkhüh dunglim apinü David hode asukkhi amüsühyu ching thaa lah; “Khihni nüsanü api yu sochoki, nüsa mulongbo dümüküp.”

⁸ Tümüde Jihusuanü arü kilim sühakhim jihkhülaa, Thrünpuhnü ashulim nimung püpü dünkheak masuka labah.

⁹ Junangde Thrünpuh mihtsürübo thsungkheak amuni sühakhim aninga lah;

¹⁰ tümüde shepünü Thrünpuh sühakhim ching yüzahchonü Thrünpuhnü arhimokhi nangde nihbuh rhimobo zokheamchoh.

¹¹ Jumonü isa sheshe ju ruk mihyumanikhinü mülakphahpü thsüde ju sühakhim ching yüzahpü isanü müranganü.

¹² Tümüde Thrünpuh yu ju arhang tüsho adukathri, khülim khülim ahüyuk nukshang kheaknü ayukbe, rhangdung le me chamnakkhi tüsho amüchinbo le khiuk khiungde achinkhitkhi, tüsho lümkhibo le mulong ching lümkhibo mütsankhitbe lah.

¹³ Tüsho api miki thrüna lakhi tümü she rama müla, tüshe isanü api ki rhimopü thsüde alala api mükbo ki khimshuh-a tüsho aleangkheak lah.

Jisu Achangbe Amükeamrü Ato

¹⁴ Jumonü yinmibo hode ayükhi Thrünpuh tsührü Jisu isa achangbe amükeamrü ato lale, isanü akinkhi kheak düküngde ramrihanü.

¹⁵ Tümüde isa achangbe amükeamrü lakhi ju isa reangmüzahkhi ching mümuzhokhukbe yung, tüshe lüpdükhi ching isa nangde rükakikhi, tüshe neak mülakhi lah.

¹⁶ Jumonü isanü yihnüpü kim ching mihmüthsüm leangkhipü tüsho mihmuzho ngüpü thsüde amüthsüm kiulongthsü-binkiu thüninde isanü mulongram lade yüanü.