IBRI 3 - AMÜSÜH HÜM CL Bible (BSI)

Jisu Mosa kheaknü Atobe

¹ Jumonü, yinmi limnü ajikhi ching shihcham lurü amüsüh keoniorübo, Jisu ju isanü alokhikhi amüsüh-thsangyurü tüsho achangbe amükeamrü de lümang.

² Api ju Mosanü Thrünpuh yam ching thiyuro lakhi nangde alakheah.

³ Tütüshe thüyam kheaknü athsürü alü wüntre lakhi nangde, Mosa kheaknü Jisu alü müretah athülün khejih.

⁴ Tümüde thüyam aban khürünü thsü, tüshe kimkethürü thsübuh ju Thrünpuh ah.

⁵ Kheakü Mosa a ashulim asukpü lakhi thiyumütsan thsüpü Thrünpuh yam ching tankihrü thsüde alala ching thiyuro larü lakheah,

⁶ tüshe Khrista a tsührü thsüde Thrünpuh yam kurungkheak thiyuro larü lakheah. Tüsho isanü mulong tokhi tüsho isanü kükheangkhi mulonglam ching düküngde ramrihsho, isa ju api yam ah.

Thrünpuh Mihtsürü thsungkheak Sühakhim

⁷ Jumonü, Amüsüh Menü athakhi nangde, “Khihni, küyimki nüsanü api düsheak sobanü,

⁸ sunglo ching rükakheahkhi nimung, azhihkhi ching nangde nüsa mulong dümüküp,

⁹ küching nüsa jipürübonü I rükakheah tüsho kam yirü I rhimo ngü.

¹⁰ Jumonü inü ju lün kheak I bukakhiuk, tüsho tha, ‘Arünü arü mulong ching kamruhroro tsophülapchoh; arünü I limrobo mümükheah.

¹¹ I bukakhiukkhi ching inü thiyuchihchimkhi nangde, arübo küyimkishe I sühakhim ching müyüzah.’ ”

¹² Keoniorübo, kümkangang, jude yungsho nüsa bolung mükinkhi mulong khürünü nüsa arhang Thrünpuh kheaknü bekhide atsobah.

¹³ Tüshe neak rükakikhinü nüsa sheshe mulong mümüküpshihpü thsüde “Khihni” de ajikhi la khiungde nimung aban nüsa khülangnü khülang tuthsukachihang.

¹⁴ Tümüde isanü akhuhbe mulongram lakhi ju akheam khiungde düküngde ramrihsho, isanü Khrista lung shihcham luchoh.

¹⁵ Amüsühyunü ha thachoh, “Khihni, nüsanü api düsheak sochoki azhihkhi ching nangde nüsa mulong dümüküp.”

¹⁶ Sobahle azhihrübo ju sherü lakhea? Ijip chamkhirü alala Mosa yakzan shuhkhi bukkhüp lakhi yung de?

¹⁷ Tüsho kam yirü apinü she ki bukakhiukkhea? Neak yihbeakkhi, pangbo sunglo ching keamrü ki yung de?

¹⁸ Tüsho api sühakhim ching küyimkishe müyüzah de sherü ki apinü thiyuchihchimkheanü ju mihyumanirübo ki yung de?

¹⁹ Jumonü mükinkhi hode arünü ayüzahpü mukukkheah de isanü ngüchoh.