IBRI 13 - AMÜSÜH HÜM CL Bible (BSI)

Künangde Thrünpuh Asühshihba

¹ Keoniorübo khülangnü khülang muzhoachihde laang.

² Hanrü beyukpü dümih, tümüde jude athsükhinü khürünü mümükheahde yunirübo beyukrhaka lachoh.

³ Rihyam ching arü lung lakhi nangde, rihyam ching larü lümkhitang; tüsho nüsa she arü nangde thsünükhi ruk thsünürü lümkhitang.

⁴ Alalanü yamkhün thsükhi wüntre labeah, tüsho yamkhün thsükhi yappung amümüsüh dükamshih; tümüde Thrünpuhnü yüliyüra tüsho müzammüram mahkhapbah.

⁵ Sho muzhokhi chingnü nü rhangdung zuzu laang, tüsho nü tümü lanü ju kheak reangkeamang; tümüde apinü tha, “Inü küyimkishe nü müdükhe yungsho nü mübahyuk.”

⁶ Jumonü isanü mulongram lade thachoh, “Atungpuh ju I rungrü ah, inü mütre; mihtsürünü I ki tümü thsükhukpü?”

⁷ Nüsa ki Thrünpuh yu tharü nüsa limberübo lümkhitang; arü rhangdung ching akuk ngükhi lümakheahang, tüsho arü akin kheahkhiang.

⁸ Jisu Khrista ju yini, khihni tüsho lünnü rukhüh ah.

⁹ Aphuaphu tüsho aso thsüde thsangyukhibonü dübephülapshih; sherünü tsühchonü arü ki alü mülakhi arüngako tsühyungbenü yungde amüthsümnü isa mulong düküngshihkhi ju atsü ah.

¹⁰ Arüngkhimyam ching tankihrünü ju kheaknü atsühpü alim mülakhi isa kingaün sadam khülang lah.

¹¹ Tümüde achangbe amükeamrünü neak kingaün jihpü arüngakopung ching hande arükhi thiyih yo shiwüh pang binpung aleanglim takabah.

¹² Junangde Jisu she api thiyih hode mihtsürü tsangkhitpü thsüde chipiripit aleanglim thsünü.

¹³ Jumonü isanü binpung aleanglim api kilim yüanü, tüsho apinü arümkheamkhi mungchih hananü.

¹⁴ Tümüde ha ching isa kiuto rünkhiungbe müla, tüshe isanü arüpü lakhi kiuto yimchoh.

¹⁵ Jumonü isanü Jisu hode api mung alokhikhi münnü Thrünpuh kilim mutukzhakde mungshi kingaün jihanü.

¹⁶ Atsü rhimopü tüsho nü lakhi chamachihpü amümürang düthsü, tümüde hadürü shuhmülanga jihkhinü Thrünpuh asühshihchoh.

¹⁷ Nüsa limberübo ki mihyuaniang tüsho arü yukhüm yanang; tümüde arünü me mütsanmüküh-a jihpü thsüde nüsa me kurungkheak aheangchoh. Arünü mulong tukthsüde yungde asühde rhimoshang, tümüde ju nüsa thsungkheak alü mülade akambah.

¹⁸ Isa thsungkheak tamkhüntamnüjang, tümüde lüpdükhi ching wüntre lade arhimopü mulongde isa lümkhi müsühlah de isanü mütsanlah.

¹⁹ I nüsa kilim nahde arülopü thsüde khide shuhmülanga jihde tamkhüntamnüpü inü nüsa ki tuthsukchoh.

Akheam Tamkhüntamnü

²⁰ Lün tangzüng thiyih hode namfimihnu neakrü ato, Atungpuh Jisu Khrista ashe chingnü arhang kamloshihbuh Thrünpuh mungtsünü,

²¹ api lümkhi rhimopü atsü lüpdükhi ching nüsa ayuk lashang, tüsho apinü amulongkhi Jisu Khrista hode isa kheak rhimoshang; lünnü lün api müretahshang. Amen.

Akheam Yubo

²² Keoniorübo, inü tuthsukde athakhi yu arümde anipü nüsa ki mushuchoh, tümüde inü nüsa kilim akhihkhühnü thrütdo.

²³ Isa keoniorü Timothi dükhedo de nüsanü mükheahshihnelah. Api nahde arü khiungsho, nüsa shorupü api bebah arübah.

²⁴ Nüsa limberübo tüsho Thrünpuh mihtsürübo alala ki salüm jihang. Itali ching larünü nüsa kilim salüm mühahchoh.

²⁵ Nüsa alala lung amüthsüm laang.