IBRI 12 - AMÜSÜH HÜM CL Bible (BSI)

Thrünpuh Isa Abuh

¹ Jumonü boto ato thiyumütsanbonü isa mükamdoa lale, isa kheak kapkihde arükhi limkhudo tüsho neak bahkhianü, tüsho mikhuh lümkihbah alihanü.

² Isanü isa akin putungpuh tüsho khiukchimshihbuh Jisu kheak mük kheahkihanü. Api müngüh asühpü lakhi hode sangkim kheak shepü mungchih ah de mülüm, tüsho kheakü Thrünpuh kiulongthsübinkiu tsülim binlah.

³ Aneak mihtsürünü api azhihde mukthsükhi apinü arümkheamkhi lümakheahang, junangde nüsa müyiuhyiuh tüsho mulong müdükheak.

⁴ Neak bede shochihkhi ching nüsanü thiyih bukpü khiungde mazhihyi.

⁵ Nüsa ki tsührübo jide atuthsukyu thakhi nüsanü mihdü de? “I tsah-a, Atungpuhnü adanyukkhi süpsüpde dülüm, yungsho apinü nü thsümüchichoki mulong dünini.

⁶ Tümüde apinü shepü muzholanü Atungpuhnü danchoh, tüsho apinü aleangkhikhi tsührü aban thürühchoh.”

⁷ Adanyukrü thsungkheak nüsanü arümkheambeah. Thrünpuhnü nüsa ki tsührübo nangde rhimochoh; tümütüsho abuhnü müdanyukkhi tsührü ju tümü a?

⁸ Shihcham lukhi alala ching nüsa müdanyuka lasho, nüsa ju tsührü tsütsü yungde aleangkheak tsührübo ah.

⁹ Alomi ching isa danyukpü buhrübo lah, tüsho isanü arü ki wüntre jihchoh, isanü küdükhüh she mebo tüsho arhang Thrünpuh ki wüntre jihbea?

¹⁰ Tümüde arünü kim akhihkhüh thsungkheak arü künkhinü isa danchoh, tüshe isanü api amüsüh ching shihcham lupü thsüde apinü atsü thsungkheak isa danchoh.

¹¹ Adanyukkhi ju anükhühkheak asühpü yungde thsünükhi lah; ju dunglim judürünü adanyukrü kilim thiyuro-lungki mungtsü sangaso akhiukshihchoh.

Thsangdankhi tüsho Atünadoyubo

¹² Jumonü nüsa bin keahkhikhi shuhkihang tüsho nüsa mukhung süh keakeakhi düküngshang.

¹³ Limro arihkhibo kheak tsahang, junangde nü jing nüpkhi müphülapkhit, tüshe athsüngubah.

¹⁴ Mihtsürü alala kheak mungtsü tüsho amüsüh rhangdung lapü mürangang, tüsho ju mübedüa shenü she Atungpuh müngü.

¹⁵ Sheshe Thrünpuh amüthsüm mülakphahpü tüsho akhüh sangrung asürübah ahihkhüh küpkhuk jihde amüneanjihpü lakhi atünadoang.

¹⁶ Sheshe müzammüram mülapü yungsho jim phuru khülang dün nihbuh adüjirü alim yinabahkhi amükinrü Esau nangde mülapü kurhangang.

¹⁷ Tümüde ju dunglim apinü müngühmühi yamrüplurüp lupü künchoki api bahyukkhi nüsanü mükheahlah, tümüde apinü chike bukde yimyim she mulong müthripü kim müngüdebah.

¹⁸ Nüsanü aqiupü thsüde mo trukhi, amiting, akhüpdokhi, tüsho chinthrüm ching marü,

¹⁹ hulipungpung lim yungsho asorünü mushubah arü ki müthalopü düsheak lim,

²⁰ tümütüsho, “Shiwühnü she awung qiusho lungnü arusahbah,” de thiyukhüm jihkhi arünü marümkhuk.

²¹ Kheah-a khide atrebe lakhinü Mosanü tha, “Atrekhinü I ajanchoh.”

²² Tüshe nüsa Zion Müzüng, yinmi Jirusalem arhang Thrünpuh kiuto ching, tüsho mükhebinkhi yunirü mukhungpung arüa lah,

²³ tüsho yinmi ching adüjirü mung thrüta lakhi mukhungpung, tüsho alala Thrünpuh mahkhaprü tüsho thiyurolungkirü khiukdahde akamshihkhi mebo kilim,

²⁴ tüsho aso tangzüng limburü Jisu kilim, tüsho Abel thiyih kheaknü alü muzhode athakhi arhakkihkhi thiyih kilim.

²⁵ Shepünü asukchonü, api ki müreanglopü atünadoang. Alomi ching akin yusheak jihrü ki sherünü reanglokheanü mutsokhide lado. Dale tüsho yinmi chingnü asukrü kheaknü isanü rholode tsosho isanü atsokhipü küdükhüh achak laba?

²⁶ Ju kim ching api düsheaknü alomi ajanshih, tüshe kheakü apinü alokhido: “Inü kheaküshe khülangki alomi lang yung tüshe thüningbo she ajanshihbah.”

²⁷ “Kheaküshe khülangki” de athakhi yubo amütsan thrüna lakhi ju aniukbah tüsho alahkhitbah, junangde müniukkhukkhi a aninga labah.

²⁸ Jumonü isanü müniukkhukpü lakhi kiulongthsü leangkhikhi thsungkheak asühanü, tüsho junangde isanü wüntre tüsho trede Thrünpuh kilim aleangkhikhukbe kingaünanü;

²⁹ tümüde isa Thrünpuh a aniuabahbe mo ah.