IBRI 11 - AMÜSÜH HÜM CL Bible (BSI)

Akin

¹ Kheakü akin ju mulonglamde alakhi mütsankhi, müngüde alakhi mütsandakkhi ah.

² Tümüde ha hode adüso mihtsürübonü Thrünpuhnü amülüjihkhi leangkhi.

³ Thrünpuh yu hode alomiküp thrünkheah de akin hode isanü anikhitchoh, junangde tümü ngülanü amülakhi kukruk chingnü thrünkhit.

⁴ Akin hode Abelnü Kain kheaknü atsübe laksah-a kingaünkhi Thrünpuh kilim jih, ju hode Thrünpuhnü api thsambah leangkhikhinü thiyumütsan thsüde thiyuro-lungki mülükhi ngü; api shedo, tüshe api akin hode kheakü khiungde asukchoh.

⁵ Akin hode apinü ashekhi müngüde Enok bekih-a lu; tüsho api müngü, tümütüsho Thrünpuhnü api bea lu. Api bea muluyichoki api ju Thrünpuh asühshihrü khede alakheah.

⁶ Tüsho akin mübedüa Thrünpuh asühshihpü mukuk. Tümütüsho shepünü Thrünpuh thüninde yüchonü api lah tüsho api yimrü thsambahbo jihchoh de akin labeah.

⁷ Akin hode Noanü adünjipü lakhi müngüyia lalashe Thrünpuhnü athakhi yande api yamkhün khümkhitpü sangkung khülang thsü; ha hode apinü alomiküp bahyuk tüsho akin hode arükhi thiyuro-lungki yamrüplurüp lurü kam.

⁸ Akin hode Abrahamnü apinü yamrüplurüp lupü dangpung ching yüpü jichoki mihyuani; tüsho apinü küching yübeanü mümükheahde wukhiuk.

⁹ Akin hode apinü alokhikhi, khiungkerü lomi ching api ki ju rukhüh alokhikhi yamrüplurüp lurü Isak le Jakob büne lungnü khimyam ching la.

¹⁰ Tümüde apinü Thrünpuhnü akhude thrüna lakhi khimtanbo lakhi kiuto mikhuh kheahde alakheah.

¹¹ Akin hode Saranü anihbe ashinshu she mübünkeangpü wu leangkhi, tümütüsho anihbenü alokhibuh ju thiyuro lakhi khejih.

¹² Tüsho api sheabah-a lalashe, mihtsürü khülang kheaknü thüning chiningbo hihdakkhi nangde tüsho kemungyean mükhebinkhi loyi nangde tsühsoniusobo trükkhit.

¹³ Harü mihtsürü alala akin ching lade she. Alokhia lakhi arünü müleangkhi; arünü limshu chingnü lang ngü tüsho leangkhi. Tüsho arübo alomi kheak khiungkerü tüsho hanrü ah de mütsan.

¹⁴ Mihtsürü sherünü hadürü thachonü arü nihbuh lomi kheahde alakhi huhchoh.

¹⁵ Arünü zojihbah arükhi arünü lümde lakhülaa, arü alode ayüpü kim ngüa labah.

¹⁶ Tüshe arünü atsübe, yinmi lomi müshamde la. Jumonü Thrünpuhnü arü Thrünpuh de ajipü machih, tümüde apinü arü kilim kiuto khülang thsakhamjih.

¹⁷ Akin hode Abrahamnü api rükakheahchoki Isak jih, tüsho shepünü alokhikhibo leangkhikheanü api tsührü lapkhiung lakhi jihabahpü thsakhambah alakheah,

¹⁸ shepü dünkheak ha tha, “Isak hode nü tsühsoniuso mung jibah.”

¹⁹ Thrünpuhnü mihtsürü ashe chingnü she arhang kamshihpü kuklah de apinü lüm; jumonü athapüa, apinü ashe chingnü anihbuh ngülo.

²⁰ Akin hode Isaknü Jakob tüsho Esau arübe kuhi müngühjih.

²¹ Akin hode Jakobnü api shechoki, Josep tsührübo abande müngühjih, tüsho api tso kheak atsunglobah kingaün.

²² Akin hode Josepnü api rhangdung akheam ching, Israelrü bekhitpü tha tüsho api mi bahpü dünkheak thaa jih.

²³ Akin hode Mosa zübechoki api bebuhrünü khinu mahsam müyima zo, tümütüsho khungarü ju akheahakham lakheah; tüsho arünü kiulongthsüpuh yukhüm mütrede alakheah.

²⁴ Akin hode Mosanü, api zoshu Pharao tsührübe tsührü ah de athapü arochih.

²⁵ Apinü anükhühkheak neak asühakopü yungde Thrünpuh mihtsürü thsünükhi lung berung.

²⁶ Apinü Ijip rahpungbo kheaknü alü thsüde Khrista dünkheaknü mungchih ngüpü muzho, tümütüsho apinü nihbuh thsambah mikhuh kheahde alakheah.

²⁷ Akin hode apinü kiulongthsüpuh bukakhiukkhi mütrede Ijip bahbah tso; tümüde apinü amüngübuh ngükhinü arümkhuk.

²⁸ Akin hode apinü phungho-thünio tüsho thiyih rhakkihpü rhimo, junangde adüjirü thsümünimrünü Israelrü tsührü adüjirü müqiupü lakheah.

²⁹ Akin hode mihtsürübonü alo akung kheak nangde Amürüm Keto ho; tüshe Ijiprü a ju ruk thsüpü mürangchoki thüraksahabah.

³⁰ Akin hode arünü nimung thüne mükamdo dunglim Jirikho chipi keamabah.

³¹ Akin hode müzammürambe Rahab mihyumanirü lung müdükheakshih, tümütüsho alibenü zütakheahrübo asühde beyuk.

³² Tüsho kheaküshe inü tümü thaba? Inü Gideon, Barak, Samson, Jephtha, David, Samuel tüsho wukihrübo dünkheak thapü kim müla,

³³ sherünü akin hode kiulongthsübo kuk, thiyuro rhimo, tüsho alokhia lakhi leangkhi, kekhüzübo mün tukloshih,

³⁴ mo aniukhi zünmüt, nukshang chingnü tsokhi, yiuhyiuhde sühmüh lakhi kuk, thirithsü ching thrungde kam, khiungkerü thiriribo alihde tsoshih.

³⁵ Aliberübonü arü betsührü asherü arhang kamloa leangkhi. Khürü a atsübe rhangdung ching arhang kamlopü thsüde adükheshihpü reanglode thsümüchide sheshih.

³⁶ Püpübo kheah-a münejih tüsho rhap, tüsho rihyam ching rhüka yukde thsünü.

³⁷ Arübo lungnü rusah, arübo mahne thsüde rhütshak, arübo nukshangnü laksah; arübo zhochihde, thsümüchide, tüsho mükhemükimde namfimihnubo tüsho mihnubo küpbo phuyubah rümde yü.

³⁸ Arünü alomi müthülünde, tsotsahrümtsahrü nangde loshelobo, awungbo, lungkhünbo tüsho alo khünbo ching rümde tsah.

³⁹ Harü alala arü akin hode thiyumütsan atsü thsüde ngü, tütüshe alokhikhi a müleangkhi,

⁴⁰ tümütüsho Thrünpuhnü tümüanü atsübe isa thsungkheak ngüjung, junangde isa rukhühnü lang arü khiukdahde akamshihpü lakheah.