IBRI 10 - AMÜSÜH HÜM CL Bible (BSI)

¹ Yakzan ju atsütsü yungde arüpü lakhi atsü kukruk me lang ah. Jumonü kam abande ju ruk lang laksah-a jihkhinü kingaünpü thüninde arürü küyimkishe khiukdahde mükamshihchoh.

² Jude yungkhülaa, arünü kingaünpü mutuklobea de? Kingaünrü ju khülangkinü müsüh-a lakhülaa, arünü kheaküa neak lah de mülüm.

³ Tüshe harü laksah-a kingaünkhibo chingnü kam abande neak lakhi lümkhitshihchoh.

⁴ Tümüde moshipungbo tüsho mihnubo thiyihnü neakbo hande atsopü amukuk ah.

⁵ Jumonü küyimki Khrista alomi ching arükheanü, apinü tha, “Laksah-a jihkhi tüsho kingaünkhibo nünü mümürüh, tüshe nünü I thsungkheak pang khülang thsakhamjih;

⁶ taka kingaünkhi tüsho neak kingaünbo ching nünü masüh.

⁷ Judüki inü tha, ‘Kheahang, I dünkheak küpqiu ching thrüta lakhi nangde nü lümkhi rhimopü I arüdo, O Thrünpuh.’ ”

⁸ Apinü akhuhde tha, “Laksah-a kingaünkhi tüsho taka kingaünkhi le neak kingaünbo nünü mümürüh yungsho masüh” (harü yakzan nangde jihchoh),

⁹ apinü thalo, “Kheahang, I nü mulongkhi rhimopü arüdo.” Mahnepü lashihpü thsüde apinü akhuhbe ju mülade kamshihchoh.

¹⁰ Tüsho ju lümkhinü Jisu Khrista pang rüpde khülangki lang ajihkhi hode isa tsangkhit.

¹¹ Tüsho amükeamrü abannü nimung aban api tankih rhimo ching küyimkishe neak hande mutsokhukbe ju ruk lang laksah-a kingaünkhi alochode jihchoh.

¹² Tüshe küyimki Khristanü kim alala dün neakbo thsungkheak khülangki shuhmülanga jihkheanü api Thrünpuh khah tsülim bin.

¹³ Ju kimnü rünbah api riribo ajing jungpung thsüpü apinü aleanglah.

¹⁴ Tümüde khülangki kingaünkhinü kim alala thsungkheak tsangkhita larü khiukdahde kamshihdo.

¹⁵ Tüsho Amüsüh Menü she I thiyumütsan thsüchoh; akhuhde apinü thachoh,

¹⁶ “Arübe nimungbo ching inü arü ki tangzüngpü ju ha lah, Atungpuhnü thachoh: Inü arü mulongbo ching I yakzanbo yukjihbah tüsho arü lümkhibo ching thrütbah,”

¹⁷ apinü thalochoh, “Inü arü neakbo tüsho amülim rhimobo mülümkhitlo.”

¹⁸ Küching harü neak bahjihkhi lanü ju ching kheaküa neak thsungkheak kingaün müla.

Isanü Thrünpuh Thüninanü

¹⁹ Jumonü keoniorübo, Jisu thiyih hode arüngakopung ching isa yüzahpü lale,

²⁰ api shih, zhindokhim hode apinü isa thsungkheak khimshuhkhi aso tüsho rhangdung limronü,

²¹ tüsho Thrünpuh yam kurungkheak isa amükeamrü ato lale,

²² isanü amülim chingnü atsangkhitkhi mulong tüsho ke amüsühnü amüsühkhitkhi pangnü mulong jihde tüsho akin mütsankhinü Thrünpuh ki thüninde yüanü.

²³ Isanü maphapde isa mulonglam alokhikhi kheak düküngde ramrihanü, tümüde shepünü alokhikheanü thiyuro lah;

²⁴ isanü muzhoachihpü tüsho rhimo atsü rhimopü khülangnü khülang thurumusuachihpü lümanü,

²⁵ khürünü susu thsüde alakhi nangde isanü rukhüh mukhungpü mutuklonü, tüshe Atungpuh nimung thüninde arükhi nüsanü ngülale khülangnü khülang tuthsukachihanü.

²⁶ Thiyuro mükheahmudu leangkhi dunglim isanü khekhungde neak yihbeakde lasho neak dünkheak shuhmülanga jihpü aninga müla,

²⁷ tüshe atrebe mahkhap tüsho thiriribo aniuabahpü motru mükkin thsüpü lang lah.

²⁸ Mihtsürü shepünü Mosa yakzan thsümünimkheanü, mahne yungsho mahsam thiyumütsan hode mihmuzho mülade sheshihdo.

²⁹ Shepünü Thrünpuh tsührü jing khüp jungde, api tsangkhitkhi tangzüng thiyih müneankhea, tüsho amüthsüm Me mükhemükimrü küdükhüh she athsümüchipü thülünba de nüsanü lümcho?

³⁰ Tümüde shepünü athakheanü isanü mükheahlah, “Royimpü I yo, inü athrihlobah.” Tüsho kheaküshe, “Atungpuhnü api mihtsürü mahkhapbah.”

³¹ Arhang Thrünpuh khah ching yüzahpü ju atrebe lah.

³² Tüshe adüso nimungbo ching nüsa ayin ngü dunglim thsümütsü amüküp arümkhi lümkhitang.

³³ Kim khürü ching a nüsa ju boto mikinü mükhemükim tüsho thsümüchi; kim khürü ching a jude arhimorü lung atruachih.

³⁴ Nüsanü aramrü lung thsünürung, tüsho küyimki nüsa kukruk alala yankhia luabahjihkhea, nüsanü asühde adükheakkhi arüm, tümütüsho kheaküshe lünnü tsüpde alabe atsübe lakhi nüsanü mükheah-a lakheah,

³⁵ jumonü thsambah ato lakhi nüsa mulongram dübah.

³⁶ Tümüde nüsanü arümkheampü yihnüpü lah, junangde nüsanü Thrünpuh lümkhi rhimobah tüsho alokhia lakhi leangkhibah.

³⁷ Amüsühyunü thachoh, “Tümütüsho anükhühkheak labah, shepü arüde lanü mashude arübah;

³⁸ tüshe I yo thiyuro-lungkirü akin hode alabah, tüsho apinü tuklode tsosho I menü api kheak masüh.”

³⁹ Tüshe isa a tuklode tsobah adükheakrü yung, tüshe akin lah tüsho khümkhita lah.