HOSEA 8 - AMÜSÜH HÜM CL Bible (BSI)

Sangthsü Kingaünkhi

¹ Nü münküp kheak hulipungpung dünkihang! Müleang nangde Atungpuh yam kumung khülang lah, tümütüsho arünü I tangzüng thsümünimdo, tüsho I yakzan lakmihdo.

² Israelnü I ki zhichoh, “ I Thrünpuh, isa Israelnü nü mükheahlah!”

³ Israelnü atsü bahyukdo; thiririnü api müshambah.

⁴ Arünü kiulongthsürübo modo, tüshe I hode yung; arünü yakzanshuhrü modo, tüshe inü mükheahde yung. Arünü arü nihbuh thsümünimpü shotoyinchi tüsho sunanü sangthsübo thsüdo.

⁵ Nü moshinunusangthsü bahang, O Samaria! Arü kheak I bukakhiukchoh. Külokhüh arü mütsangkhitde alaba?

⁶ Tümüde ha Israel chingnü, rhimorü khülangnü thsü; ha Thrünpuh yung. Samariarü moshi nunu ju adütre kamde ayihthünakbah.

⁷ Tümüde arünü apung yangchoh, tüsho arünü chitmühean yimlubah. Hidung ju munoyuk, hanü jim makhiuk; khükikhüh akhiuka lasho, khiungkerünü tsühabahbah.

⁸ Israel a muyuabah-a lah; kheakü arü akeangkeang kukruk nangde trükshih bolung lah.

⁹ Tümüde arünü mütüm donki alangzü tsahkhi nangde Asiria lim wutudo; Ephraimnü amuzhorü mulodo.

¹⁰ Arünü nihbuh zangrü trükshihbo lung mulolo she, inü arübo nahde bemukhungbah. Arünü nahde kiulongthsürübo tüsho yakzanshuhrü hahmülang khüp kolahbah.

¹¹ Ephraimnü neak kingaün thsungkheak kingaün sadam ahihdo thsüthsü she, harübo api ki neak yihbeakpung kingaün sadambo kamdo.

¹² Inü arü thsungkheak I yakzan ahihdo thrütjihdo, tüshe arünü jurübo tümükhüh jakso nangde khejihchoh.

¹³ Arünü I kilim laksah-a kingaünkhi jihchoh tüsho arünü shih tsühchoh, tüshe Atungpuhnü jurü müleangkhi. Kheakü apinü arü amülim-rhimo lümkhitbah tüsho arü thsümüchibah; arü Ijip lim yülobah.

¹⁴ Israelnü api Thrünrü mihdo, tüsho kiulongthsürü-yambo thsüa lah; tüsho Judanü kiuto ahihdo chipi ayündo; tüshe inü arü kiutobo kheak mo thsahkihbah, tüsho hanü api chipibo takabahbah.