HOSEA 7 - AMÜSÜH HÜM CL Bible (BSI)

¹ Küyimki inü Israel thsüngupü lümbanü, Ephraimnü athsümünimkhi, tüsho Samarianü mihbukmuyuk rhimokhi akhiuka huhchoh; tümüde arünü mülimde rhimochoh, ahührünü chakashungde yüzahchoh, tüsho khukshikrünü wungdo ahühchoh.

² Tüshe inü arü mihbukmuyuk alala lümkhitlah de arünü mülüm. Kheakü arü rhimobonü arü mükamdolah, arü I miki lah.

³ Arü mihbukmuyuknü arü kiulongthsüpuh, tüsho rük-thsükhinü atorübo asühshihchoh.

⁴ Arü alala müzammüramrü ah; arü ju mokin lamlamkhi, yikhap damrünü anungchokinü akhap khiungde mo tsamukpü yihnüpü mülakhi nangde lah.

⁵ Isa kiulongthsüpuh thünio nimung atorübo ju yukhunü müshanga tukthsüshih; apinü luhmünerü lung khah shurün.

⁶ Mokin nangde arü mulong ching taklah; tsüngre amuyung arü bukakhiukkhi aniuchoh; mo ju yapsu trukhitchoh.

⁷ Arü alala mokin nangde lamlamlah, tüsho arünü arü yakzanshuhrübo aniuabahchoh. Arü kiulongthsürü alala lungabahdo; arü shenü she I ki müji.

⁸ Ephraimnü nihbuh zangrü mihtsürü lung düsahchoh; Ephraim a amümülapkhi yikhap khülang ah.

⁹ Khiungkerünü asühmüh muyuabahdo, tüshe apinü ju mümükheah; api kuyü lakride buyiuka lah, tüshe apinü ju mümükheah.

¹⁰ Israel bukmükekhinü api azhihkhi huhchoh; tütüshe arünü ha alala thsungkheak Atungpuh arü Thrünpuh kilim murholo, yungsho api müyim.

¹¹ Ephraim a müthrithrümpü nangde kamdo, makhalah tüsho sulüm müla; arünü Ijip ki jichoh, arünü Asiria lim yüchoh.

¹² Arü yüchoki, arü kheak inü keang jipkihbah; inü apung wuhnubo nangde abekhibah; arünü amütsü rhimokhi dün inü arü thsümüchibah.

¹³ Arü are, tümüde arübo I kheaknü tsodo! Arü athsümünim kamshang, tümüde arünü I azhihdo! Inü arü khümkhitpü künkheah, tüshe arünü I azhihde akeangyu asukchoh.

¹⁴ Arünü mulong chingnü I ki müzhi, tüshe arünü yapkiu kheak tüzhochoh; arünü hi tüsho yukhu thsungkheak nihbuh zangrü tsütchoh; arünü I azhihchoh.

¹⁵ Inü arü bemusu tüsho düküngde kamshih, tütüshe arünü I ki amütsü thsüde azhihchoh.

¹⁶ Arünü alü mülakhi lim rholochoh; arübo ju müdüküngkhi sanglüh nangde kamdo; arü torübo arü mulo mütsükhi hode nukshangnü akeambah. Tüsho Ijiprünü arü ki münejihbah.