HOSEA 6 - AMÜSÜH HÜM CL Bible (BSI)

Israel Mulong Mümüthrikhi

¹ Arang, isanü Atungpuh kilim rholoanü; tümüde apinü isa thonak, tüshe apinü isa thsüngubah; apinü isa yurijih, tüshe apinü isa mü rümjihbah.

² Nimung mahne dunglim apinü isa thsüphulobah; mahsam nipü apinü isa yihmusubah, junangde api miki isa labah.

³ Isanü Atungpuh mükheahpü müranganü. Tsükjide ani akhiukchoki api akhiukbah; api isa kilim tsüngkam tsüng nangde, mükheankim tsüngnü alo pangkhi nangde arübah.

⁴ Inü nü ki tümü thsüba, O Ephraim? Inü nü ki tümü thsüba, O Juda? Nü muzho a yapsu shumuliu nangde, yapsu ayinke nahde dükheakabahkhi nangde lah.

⁵ Jumonü inü arübo wukihrübo hode lipshaka bahshih, I yubo hode inü arü laksah, tüsho I mahkhapkhi tsün nangde mikhuh yüchoh.

⁶ Tümüde inü mihmüthsüm lunelah tüsho laksah-a kingaünkhi yung, taka kingaünkhi kheaknü Thrünpuh mükheahkhi lunelah.

⁷ Tüshe Adam ching arünü tangzüng lakmih; ju ching arünü akin mülade I ki rhimo.

⁸ Gilead ju amütsü-rhimorü kiuto khülang, mihlaksahrünü milah.

⁹ Jangkhijangrarünü khürü jimde aleangkhi nangde, amükeamrü boto lah; arünü Shekem limro kheak laksahchoh, arünü mütsüdakkhi athsümünim rhimochoh.

¹⁰ Israel yamkhün ching inü mihtrebe khülang ngüdo; Ephraim yüliyürakhi ju ching lah, Israel müneana lah.

¹¹ O Juda, inü I mihtsürü ramtso chingnü belode arüchoki, nü thsungkheak yimlupü akhukhita lah.