HOSEA 4 - AMÜSÜH HÜM CL Bible (BSI)

Israel Thürühkhi

¹ Atungpuh yu soang, O Israel mihtsürü; tümüde Atungpuhnü lomi ching larü thürühpü lah. Lomi ching athülünkhi yungsho mihmuzho, tüsho Thrünpuh mükheahkhi müla.

² Thiyuchihchim, akeangyu, mihlaksah, ahühkhi tüsho müzammüram akhiukdo; thiyih bukkhinü thiyih bukkhi yankihlah.

³ Jumonü lomi tüzhochoh, tüsho ju ching larü alala thsünülah; mütüm shiwühbo tüsho apung wuhnubo lung rukhüh, keto ching thüngühbo she dükheakchoh.

⁴ Tütüshe shenü she düneangneangshih, tüsho shenü she düthürüh, tümüde inü atsangpü nü kheak lah, O amükeamrü.

⁵ Nü animuro jing mükhebah; wukihbuh she nü kheaknü azhing ching jing mükhebah, tüsho inü nü be dükheakshihbah.

⁶ I mihtsürübo mükheahmudu mülakhinü dükheaka lah; tümütüsho nünü mükheahmudu bahyuk, inü nü I ki amükeamrü thsüpü chingnü bahyukchoh. Tüsho nünü nü Thrünpuh yakzan mihkhinü, inü she nü tsührübo mihbah.

⁷ Arü küdükhüh hihde akamkhea, judükhüh arünü I azhihde neak yihbeakdo; jumonü inü arü müretah achihbe ching müthrijihbah.

⁸ I mihtsürübo neak chingnü arü tsühyungde lah; jumonü nüsanü alü alü arünü neak yihbeakshihnelah.

⁹ Tüsho mihtsürübo nangde amükeamrübo she alabah; inü arü limrobo thsungkheak arü thsümüchibah, tüsho arü rhimobo dün jihlobah.

¹⁰ Arünü atsühbah, tüshe reangmükeam; arünü müzammüram ahoribah, tüshe wüh mubu; tümütüsho arünü Atungpuh yu anipü arün thsüdo.

¹¹ Müzammüram, yukhu, tüsho yukhu asonü anikhitkhi lude tsodo.

¹² I mihtsürübonü sang ki keokhichoh, tüsho arü müchit-tsonü arü ki müchita jihchoh. Tümüde jilihjikhün menü arü bephülapdo, tüsho arü Thrünpuh mihabahde arünü jilihjikhün ahorido.

¹³ Arünü müzüng mujukbo kheak laksah-a kingaünchoh, tüsho awungbo kheak, thülamsang, müyüh-kibe, tüsho mudungsang khüp kingaün jihchoh, tümütüsho arü alampung tsülah. Jumonü arü tsührübonü jilihjikhün ahorichoh, tüsho nü tsühmeakbebonü müzammüramchoh.

¹⁴ Inü nü tsührübebonü jilihjikhün ahorichoki, yungsho nü tsühmeakbebonü müzammüramchoki arü müthsümüchi; tümüde athrürübonü jilihjikhünrü lung zangrünü yüchoh, tüsho arüngyam beyaprü lung shuhmülanga jihchoh; hanangde anikhitkhi mülarü mihtsürü athsümünim kamchoh.

¹⁵ Nünü yüliyüra ahoriri she, O Israel, Juda amülim dükamshih. Gilgal ching düyüzah, yungsho Beth-aven ching duwutu, tüsho “Atungpuh lale,” de thiyuchihchim düthsü.

¹⁶ Israelrü ju khoranunu nangde yihkhro ah; küde thsah Atungpuhnü rimlopung amülih ching arü yimkippü?

¹⁷ Ephraimnü sangthsübo lung arihdo; api langzü zojang.

¹⁸ Arünü ayungshu she, mutukzhakde beyapchoh; arü yakzanshuhrübonü achihbe limro muzhochoh.

¹⁹ Arübo ju apungnü yünde atsobah, tüsho arünü shuhmülanga kingaünkhibonü arü kheak achih handarübah.