HOSEA 14 - AMÜSÜH HÜM CL Bible (BSI)

Müngühmühipü Mulong Müthrikhi

¹ O Israel, Atungpuh nü Thrünpuh kilim rholoang, tümütüsho nü mülimkhinü nü angakdo.

² Amushukhi lubahle Atungpuh kilim rholode yüang; api ki thaang, “Amülim alala lude tsoang; atsü küpüanü leangkhiang tüsho isanü alokhikhi nangde isanü nü shianü.

³ Asirianü isa mükhümkhit; isanü khorabo kheak mübin; isa khahnü athsükhi ki kheaküa, ‘ Isa thrünpuhbo,’ de mütha. Nü kheak mürerünü mihmüthsüm ngüchoh.”

⁴ “ Inü arü akin-mülakhi thsüngubah; inü akeangnü arü muzhobah, tümüde I bukakhiukkhi arü kheaknü tsodo.

⁵ I ju Israel ki ayinke nangde alabah; api thrilung sangbün nangde abungbah, Lebanon murungbo nangde api aying chinyukbah.

⁶ Api dübitbo akhiukbah; Oliv sangdung nangde api akhamde alabah, tüsho Lebanon nangde arhümthüneabah.

⁷ Kheaküshe I alamme khüp arü labah, arübo hi nangde achinbah; kurungaso nangde arü apungbah, arü rhümthüneakhi ju Lebanon yukhu nangde alabah.

⁸ O Ephraim, inü nü sangthsübo kheak tümü thsüba? Nü ki alorü tüsho nü kümrü ju I ah. I a lünnü aphüyak sang nangde lah; nü thülünde alapü I kilimnü arüchoh.”

⁹ Sherü lümlung lanü harü anikhitchoh; sherünü kheahkhitlanü jurü mükheahlah. Tümüde Atungpuh limrobo ju alungki, tüsho thiyurolungkirünü jurü ching tsahchoh, tüshe alakmihrünü jurü ching jing mükhechoh.