HOSEA 13 - AMÜSÜH HÜM CL Bible (BSI)

Israel Akheam Mahkhap

¹ Küyimki Ephraimnü asukkhea, mihtsürünü ajan; api Israel ching shuhkih; tüshe apinü Baal hode mülimkhi alü kam tüsho sheabah.

² Tüsho kheakü arünü alü neak yihbeakchoh tüsho arü anikhitkhi yande shotoyinchinü sangthsübo thsüchoh, arü alala rhimorünü athsükhi rhimobo lah, “Harü ki laksah-a kingaünang,” arünü tha. Mihtsürübonü moshi nunubo müthsüpchoh.

³ Jumonü arübo ju yapsu shumuliu nangde yungsho mükikde kheamabahkhi ayinke nangde, rhimopung chingnü hitsüt yüna tsoshihkhi nangde yungsho ayinripit ching mokhüh nangde alabah.

⁴ Tütüshe Ijip lomi chingnü I Atungpuh nü Thrünpuh thsüde arüchoh; nünü tümü Thrünpuh mümükheah tüshe I ah, tüsho I hobah akhümkhitrü she müla.

⁵ Akung lo, sunglo ching nü kümbuh ju I lakheah.

⁶ Küyimki inü arü yimkipkheanü, arü reangkeam tüsho arü mulong kükheangde kam; jumonü arünü I mihabah.

⁷ Jumonü I arü ki kekhüzü nangde akambah, sangtsung nangde I lim yean jika labah.

⁸ Anunu dükheakkhi kuto nangde inü arü kheak keamkihbah, tüsho arü khüh chakashungbah; mütüm shiwühnü arü chakthünakkhi nangde, kekhüzü nangde ju ching inü arü tsühbah.

⁹ Inü nü thsümüchibah, O Israel; shenü nü rungkhiba?

¹⁰ Kheakü nü khümkhitpü thsüde nü kiulongthsürü küching la? Nü kiutobo kürü ching nü yakzanshuhrü la, shepü ki nünü tha, “ I kilim kiulongthsürü tüsho yakzanshuhrü jihang?”

¹¹ Inü I bukakhiukkhi ching nü kilim kiulongthsürü khülang jih, tüsho I mulong zhipzhip ching inü api lude tso.

¹² Ephraim amülim rhükdoa lah; api neak zomukhunglah.

¹³ Khungarü zübekhi thsünü api kheak arüchoh, tüshe api lümlung mülakhi tsührü ah; tümüde kim dükdü ching apinü nuyam mün ki marü.

¹⁴ Inü arü Ashe-lomi ching rhokhitba de? Inü arü Ashe chingnü rhokhitba de? O Ashe, nü arüm-tukthsübo küching la? O Ashe-lomi, nü athsümünim küching la? I mük kinü amuzho jika lah.

¹⁵ Api keoniorü bolung lakhitde kamkam she, aniakhiuklim pung Atungpuh kilimnü arübah, sunglo chingnü ayükihbah; tüsho api kenü ngahabahbah, api yungzü kungabahbah. Junü api rahpung, shoto kukruk alala luabahbah.

¹⁶ Samarianü anihbe mülimkhi hanbah, tümütüsho anihbenü Atungpuh azhihdo; arü nukshangnü akeambah, arü tsührü aninibo adütre kamde khapthünakbah tüsho arü mihlakhi liberübo chakphukbah.