HAGGAI 2 - AMÜSÜH HÜM CL Bible (BSI)

Atsüdak Thüyam Aso

¹ Ju kam mahnepü, khinu thüne, nimung mukukheak khülang nipü, wukihbuh Haggai hode A TU N GPU H yu arü:

² Kheakü Shealtiel tsührü, Juda kovünor Zerubbabel, tüsho Jehozadak tsührü, achangbe amükeambuh Jihusua tüsho aningkhi mihtsürü alala ki thaang,

³ Nüsa bolung ha yam adüso tsüdakkhi ngürü sherü aninga la? Nüsanü kheakü küde kheahcho? Nüsa mük ki ha tümü nangde yung de?

⁴ Tütüshe kheakü mulong toang, O Zerubbabel, Atungpuhnü thachoh; mulong toang, O Jihusua, Jehozadak tsührü, achangbe amükeambuh; mulong toang, nüsa lomi mihtsürü alala, Atungpuhnü thachoh; rhimoang, tümüde I nüsa lung lah, Wuto Atungpuhnü thachoh,

⁵ nüsa Ijip chingnü akhiukchoki inü nüsa ki alokhikhi nangde. I me nüsa lung lah; dütre.

⁶ Tümüde Wuto Atungpuhnü ha thachoh: Khülang ki, anükhüh kheak, inü thüningbo le alomi tüsho keto le akung lomi niukbah;

⁷ tüsho inü trükshih alala niukbah, junangde trükshih rahpungbo arübah, tüsho lakhitnü ha yam inü amishihbah, Wuto Atungpuhnü thachoh.

⁸ Shotoyinchi I yo, tüsho suna I yo, Wuto Atungpuhnü thachoh.

⁹ Ha yam ashulim lakhit ju adüso kheaknü atobe labah, Wuto Atungpuhnü thachoh; tüsho ha dangpung ching inü lalim atsü jihbah, Wuto Atungpuhnü thachoh.

Wukihrünü Amükeamrü ki Keokhikhi

¹⁰ Darius kam mahnepü ching, khinu tuku, nimung mukukheak phüyi nipü, wukihbuh Haggai hode Atungpuh yu arü:

¹¹ Wuto Atungpuhnü ha thachoh: Ha yakzan mütsanmükhipü amükeamrü ki keokhiang:

¹² Khürünü khim napkhi ching amüsühkhitkhi shih hansho, tüsho anapkhinü yikhap, yungsho awo, yungsho yukhu, yungsho müdangke, yungsho tsühyungpü khürü qiusho, ju amüsüh kamcho de? Amükeamrübonü alo, “ Yung.”

¹³ Judüki Haggainü tha, “ Khürünü ashemi qiubahle mümüsühkhinü harü khürü qiusho, ha amümüsüh kamcho de?” Amükeamrübonü alo, “Am, ha amümüsüh kamchoh.”

¹⁴ Haggainü tha, junangde ha mihtsürü tüsho I miki lakhi trükshihbo kheak hade lah, Atungpuhnü thachoh; tüsho arü khah rhimo aban kheak lah; tüsho arünü ajihkhi ching amümüsüh lah.

Müngühmühi Alokhikhi

¹⁵ Tüshe kheakü, khihninü tümü dünjibanü lümakheahang. Atungpuh arüngyam ching lung khülang kheaknü lung khülang kheangkih-a lang lachoki,

¹⁶ nünü hi wumujung ching khahngak 200 ngüpü mükkin thsüde yü, tüshe 100 lakheah. Nünü pangjiphüh chingnü yukhu pungdüchi 100 khippü yü, tüshe 40 lang alakheah.

¹⁷ Inü nüsa le nüsa khah rhimo alala tukthsü-mü le mokri tüsho arunü shik; tütüshe nüsanü I kilim murholo, Atungpuhnü thachoh.

¹⁸ Ha nimung, khinu tuku, nimung mukukheak phüyi ninü lümakheahang. Atungpuh arüngyam khimtankhi nimungnü ründe, lümakheahang:

¹⁹ Jakam ching müjih khürü aninga la shi? Kurungaso, khubasodung, tsarümkiu tüsho oliv-dungnü kheaküshe tümü maso de? Khihninü ründe inü nüsa müngühjihbah.

Atungpuhnü Zerubbabel ki Alokhikhi

²⁰ Ju khinu, nimung mukukheak phüyi nipü Atungpuh yu mahne kipü Haggai kilim arü:

²¹ Juda kovünor, Zerubbabel ki thaang, Inü thüningbo tüsho alomi niukpü thsüchoh,

²² tüsho kiulongthsübinkiubo lah-a bahpü lah; inü trükshih kiulongthsübo sühmüh thsümünimbah tüsho khoralolungbe le aberübo lah-a bahpü thsüchoh; tüsho khorabo le aberübo nihbuh zangzang mihbüm aban keoniorü nukshangnü akeambah.

²³ Wuto Atungpuhnü thachoh, ju nimung, inü nü bea lubah, O I yamlarü Zerubbabel, Shealtiel tsührü, Atungpuhnü thachoh, tüsho nü ju mütsanyüm yingkhüm nangde akamshihbah; tümüde inü nü mokhitdo, Wuto Atungpuhnü thachoh.