HAGGAI 1 - AMÜSÜH HÜM CL Bible (BSI)

Arüngyam Thsülopü Atungpuhnü Thiyukhüm Jihkhi

¹ Darius kiulongthsü mahnepü kam khinu thuruk, atan ni wukihbuh Haggai hode Shealtiel tsührü, Juda kovünor Zerubbabel, tüsho Jehozadak tsührü, achangbe amükeambuh Jihusua kilim Atungpuh yu arü:

² Wuto Atungpuhnü ha thachoh: Atungpuhnü yam thsülopü kim marüyi de harü mihtsürünü thachoh.

³ Judüki wukihbuh Haggai hode Atungpuh yu arü:

⁴ Ha yam thsümünima lachoki, nüsa a thüyam atsübo ching lapü ha kim a de?

⁵ Kheakü jumonü Wuto Atungpuhnü ha thachoh: Nüsa limrobo lümakheahang.

⁶ Nüsanü hihde mükheando, tüshe nükde yimludo; nüsanü tsühchoh, tüshe küyimkishe nüsa bukmüthsü; nüsanü yungchoh, tüshe küyimkishe nüsa kethürimüri; nüsanü khim phuyuchoh, tüshe sheshe mülamlam, tüsho nüsanü mulomüthsükhi ju akhün bitkhi qiuqiu ching yukpü mulomüthsüchoh.

⁷ Wuto Atungpuhnü ha thachoh: Nüsa limrobo lümakheahang.

⁸ Müzüngbo ching wutuang tüsho sang hande arang tüsho thüyam thsüang, junangde inü ju ching asühbah tüsho wüntrebah, Atungpuhnü thachoh.

⁹ Nüsanü ahihkhüh thsungkheak kheahdo, tüsho kheahang ha anikhüh arüdo; tüsho küyimki nüsanü ju thüyam lim hande arükheanü, inü müta tsoshih. Wuto Atungpuhnü thachoh, tümü thsükhea? Tümütüsho nüsa alala nihbuh yam ching athsümünim ching lah.

¹⁰ Jumonü achanglim thüningbonü ayinke tukloshihdo, tüsho alominü amukhuhpü tuklodo.

¹¹ Tüsho lomi le müzüngbo kheak, hi kheak, yukhu aso, müdangke, alonü mukhuhshihkhi kheak, mihtsürü tüsho shiwühbo kheak, tüsho nüsa khah rhimo alala kheak kungshihpü inü ji.

Mihtsürünü Atungpuh Yukhüm Ani

¹² Judüki Shealtiel tsührü Zerubbabel, tüsho Jehozadak tsührü achangbe amükeambuh Jihusua, ju lung aningkhi mihtsürü alalanü Atungpuh arü Thrünpuh düsheak, tüsho Atungpuh arü Thrünpuhnü api thiyikhi nangde wukihbuh Haggai yubo ani; tüsho mihtsürübonü Atungpuh tre.

¹³ Judüki Atungpuh yunithsürü Haggainü mihtsürübo ki Atungpuh yusheak asuk, I nüsa lung lah, Atungpuhnü thachoh.

¹⁴ Tüsho Atungpuhnü Shealtiel tsührü, Juda kovünor Zerubbabel me, tüsho Jehozadak tsührü, achangbe amükeambuh Jihusua me, tüsho aningkhi mihtsürü alala me thurumusu; arünü arü tüsho arü Thrünpuh Wuto Atungpuh yam rhimomusu,

¹⁵ kiulongthsüpuh Darius kam mahnepü, khinu thuruk nimung mukukheak phüyi nipü lakheah.