HABAKKUK 1 - AMÜSÜH HÜM CL Bible (BSI)

¹ Ha Atungpuhnü wukihrü Habakkuk ki akhiuka huhkhi yusheak ah.

Habakkuknü Atsangkhi

² O Atungpuh , külokhüh inü arung thsungkheak zhiba tüsho nünü maniba? Yungsho nü ki zhiba, “Thsünimthsüshi!” tüsho nünü mükhümkhitba?

³ Tümüde nünü I amülim rhimo ngüshihcho tüsho küpkhuk kheak kheahshihcho? Athsümünim tüsho thsünimthsüshi I miki lah; shochihkhi tüsho rukachihkhi wusuchoh.

⁴ Jumonü yakzan niukniukabahdo tüsho thiyuro mürhimo. Mihbukmuyuknü thiyurolungkirü mükamdolah–jumonü thiyuro mahkhapkhi bephülapdo.

Atungpuhnü Alojihkhi

⁵ Trükshihbo kheak mürüngang, tüsho kheahang! Tode müyinnimang! Tümüde nü ki thatha she nünü akin mülapü thsüde nü nimungbo ching rhimo rhimodo.

⁶ Tümüde inü mihmukhiuh tüsho mükeamramkhi trükshih, nihbuh yo yungkhi lapungbo lupü alomi mülih hode atsahkhi Kaldearü wusushihchoh.

⁷ Atrebe tüsho atrearangbe arü ah; arü ju lang yakzan ah tüsho arü nihbuh küdahnü wüntrepü shuhkihchoh.

⁸ Arü khorabo ju sangtsung kheaknü athribe, are tsahbe rimre kheaknü alü amüshakbe; arü khorabonü khuchoh. Arü khoraberübo limshu chingnü arüchoh; arünü müleang phinkhi nangde shih tsühpü yungde akichoh.

⁹ Arü alalanü athsümünimpü miro khuhlangbah arüchoh; arünü aramrübo loyi nangde bemukhungchoh.

¹⁰ Arünü kiulongthsürübo ki münejihchoh tüsho yakzanshuhrübo ki keangrümünechoh. Arünü chipi aban kheak kheah-a münejihchoh, tüsho ju lupü alo wumujungchoh.

¹¹ Junangde arünü apung nangde phütchoh; arünü lakmihchoh tüsho amülim kamchoh; arü nihbuh sühmüh ju lang arü thrünpuh ah!

Habakkuknü Atungpuh ki Atsanglokhi

¹² Nü adüsonü lah yung de, O Atungpuh I Thrünpuh, I yo Amüsüh Khülang? Nü müshe. O Atungpuh , mahkhapshihpü nünü arü mokhit; tüsho O Lung, nünü thsünüshihpü arü lashih.

¹³ Nü mükbo ju amütsü ngüpü khide tsangkhitlah, tüsho nünü amülim-rhimo kheak mükheahkhuk; tümüde nünü mülapmüji kheak kheahcho le, tüsho mihbukmuyuknü arü kheaknü thiyurolungkirü lakhi muyuchoki zhikde lacho le?

¹⁴ Nünü mihtsürübo keto ngüh nangde, yakzanshuhrü mülakhi lorilokobo nangde kamshih.

¹⁵ Arü alala thiririnü khoyangnü wuhkhitchoh; apinü arübo keangnü lakkhitchoh, apinü keang-qiuqiu ching arübo hanmukhungchoh; junangde apinü tode asühachihchoh.

¹⁶ Jumonü apinü anihbuh yo keang ki laksah-a kingaünchoh tüsho keang-qiuqiu ki api kingaünbo jihchoh; tümüde jurü hode api müthangmüsün ching lachoh, tüsho api tsühyungpü lakhit lah.

¹⁷ Dale tüsho api keang yeahkeangde mihmüthsüm mülade trükshihbo laksahde alaba shi?