GALATIA 6 - AMÜSÜH HÜM CL Bible (BSI)

Hahmülang Hanrungachihang

¹ Keoniorübo, mihtsürü khürü neak ramkhitsho, nüsa me-larünü me azhihayih chingnü api beloang. Nüsa she rükaki ching müyüzahpü thsüde kurhangang.

² Khülangnü khülang hahmülang hanrungachihang, tüsho junangde Khrista yakzan dünjishang.

³ Tümüde khürünü tümü mülade api ju tümüanü ah de lümsho, apinü küdah thsüde mülapyukchoh.

⁴ Tüshe mihbüm abannü nihbuh rhimo akea kheahang, tüsho apinü kükheangkhi amütsan yamhingrü kheak yungde anihbuh kheak lang alabah.

⁵ Tümüde mihtsürü abannü nihbuh hah hanbeah.

⁶ Shepü ki thiyu thsangyukhea, api kukruk atsü alala thsangyurü ki chamachihang.

⁷ Nüsa küdah thsüde dümülapyuk; Thrünpuh keangrüpü mukuk, tümüde mihtsürünü tümüpürü hiuchonü apinü ju lang yimlubah.

⁸ Tümüde shepünü nihbuh shih ching hiuchonü shih chingnü athsümünim yimlubah; tüshe shepünü Me ching hiuchonü Me chingnü lün rhangdung yimlubah.

⁹ Tüsho isanü atsü rhimokhi ching mükeaksahnü, tümüde isanü mahiungsho kim dükdü ching yimlubah.

¹⁰ Jumonü isa kim lakhi ching, isanü mihtsürü alala ki, adungto thsüde akinrü yamkhünbo ki atsü rhimoanü.

Akheam Atünadoyu tüsho Salüm

¹¹ I khahnü tümü müzhido thrüta lanü kheahang.

¹² Sherünü amikheak atsü huhpü künlanü nüsa reangkiha tsütabahshihpü mürangchoh. Arünü ha rhimokhi amütsan ju Khrista sangkim dünkheaknü thsümüchi tsokhitpü lah.

¹³ Tümütüsho tsütabahrünü she yakzan muzochoh tüshe nüsa shih ching arünü kükheangpü thsüde arünü nüsa tsütabahshihpü künlah.

¹⁴ Tüshe küpü hode alomi I lung, tüsho l alomi lung yümkihkhea, isa Atungpuh Jisu Khrista sangkim kheak hode akükheangpü I kheaknü limshuang.

¹⁵ Tsütabahkhi yungsho tsütamübahkhi tümü she yung; aso thrünlokhi ju lang khechoh.

¹⁶ Ha yuzüng hode atsahrü alala, Thrünpuh mihtsürübo kheak mungtsü tüsho mihmüthsüm laang.

¹⁷ Kheakünü rünbah mihtsürü shenü she I küpkhuk düjihshih; tümüde inü I pang kheak Jisu yo areakbo hanlah.

¹⁸ Keoniorübo, isa Atungpuh Jisu Khrista amüthsüm nüsa me lung laang. Amen.