GALATIA 4 - AMÜSÜH HÜM CL Bible (BSI)

¹ Inü yamrüplurüp lurü dünkheak thakhi ju, api azürü lachoki khiungdüa, api alala yo aputungrü thsüthsü she azhorü kheaknü büthsüde müla,

² tüshe abuhnü akhukhi kim mukhiungyikia akümrü tüsho atoathüprü bukkhüp lah.

³ Junangde küyimki isa azürü lakheanü alomi yuzüng bukkhüp lakheah.

⁴ Tüshe küyimki kimkhiukkhi arükhea, Thrünpuhnü api tsührü, aliberünü azübekhi, yakzan bukkhüp zübekhi,

⁵ isa ju Thrünpuh tsührübo kampü thsüde yakzan bukkhüp larü rhokhitpü arü.

⁶ Tüsho nüsa ju api tsührübo thsükhinü, Thrünpuhnü api tsührü Me nüsa mulongbo ching thiyibah, “Abuh, Abuh!” de zhichoh.

⁷ Jumonü kheakü nüsa ju azhorü yung tüshe tsührü ah, tüsho tsührü a sho, Khrista hode Thrünpuh yamrüplurüp lurü ah.

Paulnü Galatiarü thsungkheak Lümjihkhi

⁸ Akhuhlim nüsanü Thrünpuh mümükheahchoki, nüsa ju thrünpuhbo yungde püpürü bukkhüp azhorü lakheah;

⁹ tüshe kheakü, nüsanü Thrünpuh mükheahdo, yungsho Thrünpuhnü mükheahdo, küde thsah nüsanü jurü bukkhüp azhorü kamlopü reangmüzahkhi tüsho achimudo yuzüngbo lim rholoba?

¹⁰ Nüsanü nimungbo, khinubo, akheahmünchibo, tüsho kambo arüngchoh!

¹¹ Nüsa thsungkheak I akeangkeang ching rhimoa lashi de I mulong sansanlah.

¹² Keoniorübo, inü nüsa ki mushuchoh, I nangde kamang, tümüde I she nüsa nangde kamdo, nüsanü I ki tümü amülim müthsü;

¹³ pang ching thsünü lakhi hode akhuhlim inü nüsa ki thiyusheakatsü thsangyudo de nüsanü mükheahlah;

¹⁴ tüsho I lalim ju nüsa ki rükaki khülang nangde lalashe, nüsanü mükheahmüchih yungsho mübahyuk, tüshe Thrünpuh yunirü khülang, Jisu khrista nangde I leangkhi.

¹⁵ Nüsa asühkhi tümü kama la? Kukkhülaa nüsanü nüsa mükjibo khünkhita I kilim jihbah de inü nüsa ki thiyumütsan thsüchoh.

¹⁶ Dale tüsho nüsa ki thiyuro thakhinü I nüsa riri kamdü de?

¹⁷ Mihtsürübonü nüsa kheak khide tsülah, tüshe atsü thsungkheak yung; arünü nüsa bekhibah arü kheak tsüshihnelah.

¹⁸ Atsü ching a, I nüsa lung lachoki lang yungde kamruhroro tsüpü yihnüpü lah.

¹⁹ Amuzho I tsührübo, Khrista yakli nüsa kheak mülayi khiungde kheaküshe nüsa lung I zübe-thsünü ching lah!

²⁰ Kheakü I nüsa miki labah I düsheak müthrinelah; tümüde nüsa dünkheaknü I yingyingde lah.

Hagar tüsho Sara Amütsan

²¹ Nüsa sherünü yakzan bukkhüp lanechonü I ki thaang, nüsanü yakzan musocho de?

²² Abraham tsührü mahne, khülang azhorü kheaknü tüsho püpü khülang zuzu liberü kheaknü alakheah de thrüta lah.

²³ Azhorü tsührü ju püpüki ruk lang zübe, tüshe zuzu liberü tsührü ju a alokhikhi hode alakheah.

²⁴ Ha müchityu ah: aliberübo ju tangzüng mahne ah. Khülang Sinai Müzüng chingnü, azhorü tsührübo zübecho; alibe ju Hagar.

²⁵ Kheakü Hagar ju Arabia ching Sinai Müzüng ah; alibenü kheakü lakhi Jirusalem thapü ayelah, tümüde alibe ju atsührübo lungnü azhorü kuhi ching lah.

²⁶ Tüshe Jirusalem akube zuzu lah, tüsho alibe ju isa abe ah.

²⁷ Tümüde ha thrüta lah, “Asühang, O tsührü mülabe bünkeangberü; nü shepü tsührü zübe-thsünü ching mülanü asühde zhiang; tümüde arhangberü tsührü kheaknü a abahyukkhi liberü tsührü ahihbe lah.”

²⁸ Kheakü keoniorübo, Isak nangde nüsa ju alokhikhi tsührübo ah.

²⁹ Ju kim ching püpüki ruk lang azübekhi tsührünü Me wu hode azübekhi thsümüchi. Kheakü ju rukhüh ah.

³⁰ Tüshe amüsühyunü tümü thacho? “Azhorü liberü tüsho atsührü yankhita bahang, tümüde azhorü liberü tsührünü zuzu liberü tsührü lung küyimkishe yamrüplurüp ching shihcham mulu.”

³¹ Jumonü keoniorübo, isa ju azhorü liberü yungde zuzu liberü tsührü ah.