GALATIA 3 - AMÜSÜH HÜM CL Bible (BSI)

Yakzan yungsho Akin

¹ O makhakhi Galatiarü! Nüsa mük ki Jisu Khrista yümkihkhi mütsande ngübahle shenü nüsa bephülapkhea?

² Inü nüsa kilimnü ha lang anikhitnelah: Nüsanü yakzan anide arhimokhinü Me leangkhikhea shi, dashi nüsanü asokhi kinkhinü a?

³ Nüsa khide makhaa la de? Me kheaknü tankih dunglim mihtsürü khuksahkhinü nüsa mükkheahkih khiungpü mürangcho de?

⁴ Ju atsütsü akeangkeang a sho, nüsanü tümü mülakhi thsungkheak ju dükhüh thsünü khea de?

⁵ Nüsanü yakzan anide arhimokhi hode Thrünpuhnü nüsa kilim api Me jihbah nüsa bolung khinthiyinbe rhimokhea shi, dashi nüsanü asokhi kinmonü a?

⁶ Abraham lümakheahang: “Apinü Thrünpuh kin, tüsho api ju thiyurolungki khejih.”

⁷ Jumonü sherünü kinchonü Abraham tsührübo ah de mükheahang.

⁸ Thrünpuhnü akin hode khiungkerü alim kamshihbah de amüsühyunü müchit, tüsho amüngühnü thiyusheak-atsü Abraham ki mükheahshih: “Trükshih alala nü hode müngühmühibah.”

⁹ Jumonü sherü akin lanü, akin mihtsürü Abraham lungnü müngühmühia lah.

¹⁰ Yakzan rhimo kheak angükihrü alala muthrumünean khüp lah, tümüde ha thrüta lah: “Yakzan hüm ching thrütkhi yande mülarü tüsho ju mürhimorü aban muthrumünean thsang.”

¹¹ Kheakü mihtsürü sheshe yakzan hode Thrünpuh miki alim mükam de mütsanlah; tümüde “Shepü akin hode thiyuro-lungki lanü arhang labah”;

¹² tüshe yakzan ju akin kheak müla, tümüde “Shepünü jurü rhimochonü jurü hode arhang labah.”

¹³ Isa thsungkheaknü muthrumünean kamde yakzan muthrumünean chingnü Khristanü isa rhokhit, tümüde ha thrüta lah: “Shepü sangdung kheak zhinbanü muthrumünean.”

¹⁴ Abraham kilim jihkhi müngühmühi Jisu Khrista hode khiungkerü kheak arüpü thsüde apinü isa rhokhit, junangde akin hode isanü Menü alokhikhi leangkhibah.

Thiyuzüng tüsho Alokhikhi

¹⁵ Keoniorübo, mihtsürü yakli chingnü inü thachoh: Mihtsürünü tangzüngkhi thsüthsü she, adüngakhi thsü dunglima shenü she ju müthsümünim yungsho ju ching muyukajakchoh.

¹⁶ Kheakü Abraham ki alokhikhibo thsü. Ahihkhüh ki thade, “Tüsho nü müjihbo,” de mütha; tüshe khülang ki, “Tüsho nü müjih,” de Khrista ki thalah.

¹⁷ Inü alümkhi ju ha: Kam chi phüyikheak samrü dunglim jihkhi yakzannü akhuhlim Thrünpuhnü tangzüngkhi akeangkeang kamshihpü thsüde müthsümünimkhuk.

¹⁸ Tümüde yamrüplurüp ju yakzan hode lasho, ju kheaküa alokhikhi hode müla; tüshe Thrünpuhnü alokhikhi hode ju Abraham kilim jih.

¹⁹ Dale tüsho yakzan dungtokhi ju tümü a? Alokhia lakhi müjih marüyi khiungde alakmihkhibo dünkheaknü ha yukajakkheah; tüsho yakzan ju limburü hode yunirünü jih.

²⁰ Limburü dükhi ju bo khülang thsung thsüde yung; tüshe Thrünpuh ju khülang ah.

Yakzan Dungtokhi

²¹ Dale tüsho yakzan ju Thrünpuhnü alokhikhibo azhihde a shi? Jude yung; tümüde yakzan ju rhangdung ngüpü thsüde jihkhülaa, dükde thiyuro-lungki ju yakzan hode arüa labah.

²² Tüshe Jisu Khrista kheak akin hode akinrü kilim alokhikhi jihpü thsüde alomiküp alala neak bukkhüp lah de amüsühyunü khipkhitchoh.

²³ Kheakü akin marüyichoki, akin amikheak akhiukpü lakhi khiungde yakzan bukkhüp isa rihdoa zo.

²⁴ Jumonü akin hode alim kampü thsüde Khrista marüyi khiungde yakzan ju isa thorü lakheah.

²⁵ Tüshe kheakü akin arükhinü, isa yakzan bukkhüp müla;

²⁶ tümüde nüsa alala Jisu Khrista ching akin hode Thrünpuh tsührübo ah.

²⁷ Tümüde nüsa alala sherü Khrista ching baptikheanü nüsanü Khrista khümyukdo.

²⁸ Jumonü Jihudarü yungsho Greek, azhorü yungsho zuzu, athrürü yungsho aliberü dükeak tümü büthsüde müla; tümüde nüsa alala Jisu Khrista ching khülang ah.

²⁹ Tüsho nüsa Khrista yo thsüsho, alokhikhi ayannü nüsa ju Abraham müjih tüsho yamrüplurüp lurü ah.