GALATIA 2 - AMÜSÜH HÜM CL Bible (BSI)

Paul tüsho Püpürü Amüsüh-thsangyurübo

¹ Jushu kam thürükheak phüyi dunglim I lung Tita bebah Barnaba lungnü Jirusalem lim wutu.

² Tüsho amikheak akhiukkhi hode I wutu, tüsho inü khiungkerü bolung thsangyuthsangrakhi thiyusheakatsü, I akeangkeang ching rhimode yungsho rhimoa labah mütsüle de limberübo ki mükhingde thanaka huh.

³ Tüshe I lung bekhi Tita she api Greekrü thsüa lalashe tsütabahpü müreangkih.

⁴ Arükchih keoniorü khürünü isa rukhüh ah de thsübah Khrista ching isa zuzu lakhi yimkhitpü tüsho isa azhorü kamshihpü rhimokhi dünkheaknü hadürü akhiukkheah.

⁵ Nüsa kheak thiyusheak-atsü thiyuro mutukzhakde alashihpü thsungkheaknü kim anükhüh thsungkheak lang she isanü arü ki manijih.

⁶ Sherü adungto nangde lanü, arü küruk küruk lalashe I kheaknü tümü büthsüde müla; Thrünpuhnü aleanglim kheahde mahmükhapchoh–jurü mihtsürübonü I athsunganah aso tümü she müjih.

⁷ Ju müthri, Jihudarü kilim Peter yükhi nangde, khiungkerü ki thiyusheak-atsü thsangyuthsangra rhimopü I thiyikhi arünü ngü.

⁸ Tümüde Jihudarü kilim athiyikhi-rhimo thsungkheak shepünü Peter hode arhimokheanü, khiungkerü thsungkheak she I hode rhimo.

⁹ Limberübo nangde alarü, Jakob, Peter, tüsho Johan arünü ha adungto rhimo Thrünpuhnü I kilim jih-a lah de kheahkhit; jumonü isa rungachihrü ah dükhi amütsan arünü Barnaba le I kheak salüm thsü. Barnaba le I khiungkerü bolung tüsho arünü Jihudarü bolung rhimopü isanü mulungachih.

¹⁰ Arünü akeokhikhi ju inü arhimopü mulongde alakhi isanü mutukzhakde zhochihrü lümkhitpü lakheah.

Antiok ching Paulnü Peter Thürühkhi

¹¹ Küyimki Peter ju Antiok ching arükhea, inü api mikinü azhih, tümütüsho api ju mütsande amülim lakheah.

¹² Jakob kilimnü mihtsürü khürü marüyiki apinü khiungkerü lung yimtsüh. Tüshe küyimki arü arükheanü, apinü tsütabahrü boto trekhinü khiungkerü kheaknü ashitlo tüsho chamkhi.

¹³ Api lung Jihudarü püpürübonü mulong müzahde rhimo, jumonü Barnaba she arü mulong müjihkhinü bekhide tsoabah.

¹⁴ Tüshe küyimki arünü thiyusheak-atsü thiyuro dünkheak langde mütsahkhi inü angükhea, inü arü alala mikinü Peter ki tha, “Nü Jihudarü thsübah khiungkerü nangde lachoh tüsho Jihudarü nangde yung, dale küde thsah nünü khiungkerü ju Jihudarü nangde alashihkhukpü?”

Jihudarü tüsho Khiungkerü Akin hode Khümkhit

¹⁵ Isa sherü zübekhinü Jihudarü la tüsho aneakrü khiungkerü yungnü,

¹⁶ yakzan yande arhimokhinü mihtsürü khülang ju alim mükamshih, tüshe Jisu Khrista kheak kinkhi hode ah de mükheahlah. Jumonü isa she Khrista kheak kinkhi hode alim kampü thsüde Jisu Khrista kheak kinchoh, tüsho yakzan rhimokhinü yung, tümütüsho yakzan rhimokhinü sheshe alim mükamshih.

¹⁷ Tüshe isanü Khrista hode alim kampü yimchoki, isa ju aneakrü nangde kamchoh, ju amütsan Khristanü neak bushihcho de? Jude yung!

¹⁸ Inü thsümünimbah ju thsülosho, I yakzan thsümünimrü ah de mütsanchoh.

¹⁹ Tümüde inü Thrünpuh thsungkheak lapü thsüde yakzan hode yakzan ching I shedo.

²⁰ I Khrista lung yümkih tüsho kheaküa I müla, tüshe Khrista I kheak lah. Pang ching I rhangdung lakhi ju, I muzhobuh tüsho I thsungkheaknü api jihabahbuh Thrünpuh tsührü lung akin hode lah.

²¹ Inü Thrünpuh amüthsüm akeangkeang mükamshih; tümüde alim mütsankhi ju yakzan hode lakhülaa, Khrista shekhi amütsan mülabah.