GALATIA 1 - AMÜSÜH HÜM CL Bible (BSI)

¹ Amüsüh-thsangyurü Paul–mihtsürü kilimnü yungsho mihtsürü hode yung, tüshe Jisu Khrista tüsho api ashe chingnü arhang kamloshihkhi Abuh Thrünpuh hode–

² tüsho I lung lakhi keoniorü alala kilimnü, Galatia borübo kilim:

³ Isa Abuh Thrünpuh tüsho Atungpuh Jisu Khristanü nüsa kilim amüthsüm tüsho mungtsü jihshang,

⁴ shepünü isa Thrünpuh tüsho Abuh lümkhi yande ha amütsü lün chingnü isa zuzu kamshihpü isa neakbo dünkheak api jihabah;

⁵ api kilim lünnü lün müretahkhi thsang! Amen.

Thiyusheak-atsü Khülang

⁶ Khrista amüthsüm ching nüsa jibuh nahde bahkhibah püpü thiyusheak-atsü lim tsokhi inü müyinsahchoh–

⁷ dükdüa püpü thiyusheak-atsü müla, tüshe nüsa küpkhuk jihpü tüsho Khrista thiyusheak-atsü bephülappü khürü lah.

⁸ Tüshe isa, yungsho yinmi ching yunirü thsüthsü, isanü thiyusheakatsü thsangyuthsangrakhi kheaknü püpü thiyusheak-atsü nüsa ki thsangyuthsangrasho, api muthrumüneanshang.

⁹ Isanü püpüki thakhi nangde, kheaküshe inü thalochoh, nüsanü leangkhikhi kheaknü püpü thiyusheak-atsü khürünü nüsa ki thsangyuthsangrasho, api muthrumüneanshang.

¹⁰ Kheakü inü mihtsürü asühshihpü a shi Thrünpuh asühshihpü mürangcho? Yungsho inü mihtsürü asühshihpü mürangcho de? Inü mihtsürü asühshihchokhülaa, I Khrista yamlarü müthsüde alabah.

Amüsüh-thsangyurü thsüpü Jikhi

¹¹ Tüshe keoniorübo, inü thsangyuthsangrakhi thiyusheak-atsü ju mihtsürü yo yung de inü nüsa ki mükheahshihnelah.

¹² Tümüde inü ju mihtsürü kilimnü müleangkhi, yungsho I ki müthsangyu, tüshe Jisu Khrista amikheak akhiukkhi hode arü.

¹³ Tümütüsho inü Thrünpuh borü münchi hode thsümüchi tüsho ju thsümünimpü mürangkhi, Judea ching adüso I rhimo nüsanü sodo.

¹⁴ I thülün Jihudarü ahihdo kheaknü Judea ching I müngüh ajindo tüsho I buh pürü lalim-yakli thsungkheak khide mulong jihdo.

¹⁵ Tüshe küyimki api amüthsüm hode I be buk chingnü I mokhitde ajibuh Thrünpuh asühkhinü,

¹⁶ inü khiungkerü bolung api thsangyuthsangrapü api tsührü I kheak akhiukpü lakhea, inü mihtsürü ki keokhikeorapü müniokheam,

¹⁷ yungsho I müngüh larü amüsüh-thsangyurübo kilim Jirusalem ching muwutu tüshe inü Arabia lim yü tüsho Damaska lim alode arü.

¹⁸ Jushu kam mahsam dunglim Kephas rhua kheahpü I Jirusalem lim wutu, tüsho api lung nimung thürükheak phüngü mung.

¹⁹ Tüshe Atungpuh niurü Jakob kheak hode inü püpürü amüsüh-thsangyurü sheshe müngü.

²⁰ (Inü nüsa ki tümü thrütchonü akeangyu yung de Thrünpuh miki lungdode thachoh.)

²¹ Jushu I Siria tüsho Kilikia lomibo ching yü.

²² Tüsho Judea ching Khrista borübonü I mümükheahyide alakheah;

²³ arünü ha lang thade so, “Shepünü isa thsümüchikheanü kheakü apinü khülangki athsümnimpü mürangkhi akin thsangyuthsangrachoh.”

²⁴ Tüsho I dünkheaknü arünü Thrünpuh müretah.