FILIPI 2 - AMÜSÜH HÜM CL Bible (BSI)

Khrista Azhihayih tüsho Ato Kamkhi

¹ Jumonü Khrista ching mulong toshihkhi, amuzho sühakhim, Me ching arihako tüsho tsüyihde muzhoachihkhi lasho,

² ju lümkhi, amuzho, arihako tüsho lümkhi khülangnü I asühkhi banthsangshang.

³ Yihnelune yungsho shilode tümü she düthsü, tüshe azhihayih chingnü nü kheaknü püpürü atsübe khejang.

⁴ Nüsa mihbüm abannü nihbuhnü amulongkhi lang dükheah, tüshe püpürünü amulongkhi she kheahang.

⁵ Nü yakli ju Khrista nangde alabeah:

⁶ api Thrünpuh nangde lalashe, apinü Thrünpuh akede rukhüh kampü mülüm,

⁷ tüshe mihtsürü nangde zübebah, yamlarü khülang kamde api akeangkeang kam.

⁸ Tüsho mihtsürü shihphü nangde azhihayihde kambah ashepü ching, sangkim kheak shepü she mihyuani.

⁹ Jumonü Thrünpuhnü api changde shuhkih tüsho mung alala kurungkheak atobe mung api kilim jih,

¹⁰ junangde yinmi ching, alomi kheak tüsho lüpdükhi mukhuknü Jisu mung ki khukningbah,

¹¹ tüsho Abuh Thrünpuh müretahpü Jisu Khrista ju Atungpuh de thiyutha alalanü alokhibah.

Alomiküp ching Ayin nangde Atahkhi

¹² Jumonü amuzho müyamrübo, nüsanü kamruhroro mihyuanikhi nangde kheaküshe I lachoki lang yung tüshe alü thsüde I mülachoki trede tüsho ajande nüsa akhümkhit rhimokhitang;

¹³ tümüde amulongpü tüsho api lümkhi atsü rhimopü nü kheak rhimokhi ju Thrünpuh ah.

¹⁴ Matsangde yungsho mükeokhide lüpdükhi rhimoang,

¹⁵ junangde nüsa areak mükihde tüsho amülim mülade, ha akhürang tüsho bephülap lün ching Thrünpuh tsührübo thsüde, arü bolung alomiküp ching ayin nangde tahde,

¹⁶ rhangdung yu kheak düngde aramrihbah, junangde Khrista nimung ching I akeangkeang ching malih yungsho akeangkeang ching mükhisah de inü akükheangbah.

¹⁷ Tüshe nüsa akinnü Thrünpuh kilim jihkhi shuhmülanga kingaünkhi kheak I thiyih bukkihkih she, inü nüsa alala kheak asühlah tüsho asühachihchoh.

¹⁸ Junangde nüsanü she I lung asühbeah tüsho asühachihbeah.

Timothi tüsho Epaphrodita

¹⁹ Inü nüsa kilim nahde Timothi thiyipü Atungpuh Jisu kheak mulonglam lah, junangde nüsa yusheaknü I reangzahbah.

²⁰ Nüsa arung thsungkheak atsütsünü amulongrü I lung api nangde she müla.

²¹ Arü alalanü Jisu Khrista thsungkheak yungde arü nihbuh künkhi yimchoh.

²² Tüshe künangde tsührü thsüde buhrü ki thiyusheakatsü ching I tankihkheanü Timothi thülünkhi nüsanü mükheahlah.

²³ Junangde I künangde alabanü mükheah akede inü api thiyibah;

²⁴ tüsho nahde I she nüsa kilim arüpü Atungpuh kheak kinlah.

²⁵ I keoniorü rukhüh rhimorü tüsho rukhüh bonungrü, tüsho nüsa yunithsürü tüsho I yihnüpü ching tankihrü Epaphrodita nüsa kilim thiyipü yihnüpü lah de inü lüm,

²⁶ tümüde apinü nüsa alala thsungkheak mürheangde lüm, tüsho nüsanü api tukthsülah de asokhi hode api lümthsünü.

²⁷ Atsütsü api ashepü thsüde tukthsüde alakheah. Tüshe Thrünpuhnü api le I kheak mihmüthsüm huhdo, jude yungkhülaa I a mulong rozhaknü mulong rozhak lapü lakheah.

²⁸ Jumonü api thiyipü inü alü thsüde mulonglah, junangde nüsanü api ngülochoki asühachihbah tüsho I mulong sansan nükde alabah.

²⁹ Jumonü Atungpuh lung asühde api leangkhiang; tüsho hadürü mihtsürü ki wüntre jihang,

³⁰ tümütüsho nüsanü mukukkhi, api rhangdung jihde I rungpü ching, Khrista rhimo thsungkheaknü api shemüchihdo.