FILIPI 1 - AMÜSÜH HÜM CL Bible (BSI)

¹ Jisu Khrista yamlarü, Paul tüsho Timothi kilimnü, Filipi ching Jisu Khrista kheak kinrü, ju lung borü limberü tüsho tankihrübo kilim:

² Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü laang.

Paul Tamkhüntamnü

³ Inü nüsa lümkhitkhi alala ching I Thrünpuh ki makshe jihchoh,

⁴ kamruhroro nüsa thsungkheak I tamkhüntamnü aban ching asühde tamkhüntamnüchoh,

⁵ akhuhbe nimungnü khihni khiungde nüsanü thiyusheak-atsü ching rungachihkhi thsungkheak makshe jihchoh.

⁶ Tüsho shepünü nüsa lung rhimo atsü tankihkheanü Jisu Khrista nimung khiungde akhik thsüde arhimobah de inü mütsanlah.

⁷ Inü nüsa alala thsungkheak lümpü alungki lah, tümütüsho inü nüsa I mulong ching hanlah, tümüde I rihyam ching lachoki tüsho thiyusheak-atsü chilopü le mütsanmükhipü ching I lung nüsa alala amüthsüm shihcham lurü ah.

⁸ Tümüde Jisu Khrista amuzhonü inü künangde nüsa alala thsungkheak mulong dukchonü Thrünpuh ju I thiyumütsan lah.

⁹ Tüsho nüsa amuzho ju mükheahmudu tüsho mütsankhitpü bede alü zokihpü I tamkhüntamnü lah,

¹⁰ junangde tümü atsübeanü nüsanü mütsankhitbah tüsho tsangkhitde Khrista nimung khiungde areak mükihde,

¹¹ Thrünpuh müretahpü tüsho mungshipü, Jisu Khrista hode arükhi thiyuro-lungki sangasonü mide akambah.

Alapü ju Khrista

¹² Keoniorübo, nüsanü mükheahshihnekhi ju, I ki tümü dünjikheanü atsütsü thiyusheak-atsü khin tsahshihdo,

¹³ Junangde kiulongthsürüyam aheangrü tüsho aningkhi alalanü Khrista thsungkheak I rihyam ching lah de mükheah;

¹⁴ tüsho I rihyam ching lakhinü keoniorü ahihdo Atungpuh kheak mulongramde kamshih, tüsho Atungpuh yu mulong tode mütrede thachoh.

¹⁵ Khürünü a mükthsü tüsho müngüh ajinde Khrista thsangyuthsangrachoh, tüshe khürü a atsü lümkhi chingnü ah.

¹⁶ Ashubuh junü I thiyusheak-atsü chilopü ha ching zojihlah de mükheahbah amuzhonü rhimochoh;

¹⁷ akhuhrünü atsüngalim mülade, I rihyam ching lachoki küpkhuk jihpü lümbah achamnak lümkhinü Khrista zhiyukchoh.

¹⁸ Dale tümü a? Limro aban, mülapyukde yungsho thiyuro ching thsüthsü, Khrista zhiyuka lah; tüsho ju ching I asühchoh.

¹⁹ Tümüde nüsa tamkhüntamnü tüsho Jisu khrista Me arung hode I adükhebah de inü mükheahlah,

²⁰ inü mükkin thsükhi tüsho mulonglamkhi yande tümü ching she I achih müngü, tüshe mulong tode, kamruhroro nangde kheaküshe rhangdungnü yungsho ashepünü thsüthsü I pang ching Khrista wüntre labah.

²¹ I thsungkheak a alapü ju Khrista, tüsho ashepü ju alü lah.

²² Shih ching rhangdung lapü thsüsho, ju amütsan I thsungkheaknü akuk ngüde rhimokhi lah. Tüshe küpü mokhitbanü inü athapü mukuk.

²³ I mahne dükeak thoachihchoh. I a chamachihbah Khrista lung lapü künlah, tümüde ju atsübe ah.

²⁴ Tüshe shih ching aninga lapü ju nüsa thsungkheaknü khide yihnüpü lah.

²⁵ Ha lümkihkhinü I aninga labah de inü mükheahlah, tüsho nüsa alü zokihkhi tüsho akin ching asühachihkhi thsungkheaknü nüsa alala lung I mutukzhakde alabah,

²⁶ junangde I nüsa lung alode arükhinü Jisu Khrista ching I thsungkheaknü nüsa asühachihkhi alübe kambah.

²⁷ Nüsa rhangdung yakli ju lang Khrista thiyusheak-atsü thülünde laang, junangde I arübah nüsa shoruru she yungsho mülalashe, thiyusheak-atsü akin thsungkheak lümkhi khülang thsübah thripkhüh thripkhüh mürangde me khülang ching nüsa düküngde azhipkhi inü asobah.

²⁸ Tüsho nüsa azhihrübo hode tümü ching she nüsa mümüzün, ha arü thsümünimpü arü ki mütsandakkhi lah, tüshe nüsa akhümkhit Thrünpuh kilimnü lah.

²⁹ Tümüde Khrista thsung thsüde api kheak kinpü lang nüsa ki mülüjihkhi yung, tüshe api dünkheak thsünüpü she ah,

³⁰ tümütüsho nüsanü angükhi tüsho kheakü I kheak sode alakhi shochihkhi ruk nüsanü dünjide lah.