EZRA 9 - AMÜSÜH HÜM CL Bible (BSI)

Khiungkerü Yihluachihkhi

¹ Harü alala rhimokhamshu, Israelrü limberü khürünü arübahle I ki thakhi ju, amükeamrübo le Levirübonü hingrü Amon, Moab, tüsho Ijip yungsho Kananrü, Hitrü, Perizrü, Jebusrü, tüsho Amorrü athraneanbe rhimo chingnü müchamachihde lah de tha.

² Jihudarü athrürübonü khiungkerü liberü yihlu; jumonü Thrünpuh mihtsürü amüsüh müneanabah. Limberü tüsho atorübonü alübe thsüde lakmih.

³ Inü küyimki ha sokhea, inü I khim thorüp tüsho I kuyü le I münnam thokhibah tüzhode bin.

⁴ Judüki Israel Thrünpuh yu ajande atrerü abannü ramtsorünü neak yihbeakkhi dünkheak I mükamdoa bin. Tüsho inü ju ching arelim kingaün kim khiungde tüzhode bin.

⁵ Tüsho arelim kingaün kim ching I atüzhokhi chingnü asürü, tüsho khim rukrüpkhi yihbah tamkhüntamnüde khukning tüsho Atungpuh I Thrünpuh ki I khah chunghuh,

⁶ tüsho inü tha, “O I Thrünpuh, nü miki I miro huhpü khide achihlah. I Thrünpuh, tümüde isa müneannü isa ku alapdo; tüsho athsümünimkhinü thüning khiungdo.

⁷ Isa jipürü nimung chingnü kheakü khiungde isanü tode neak yihbeakde arüdo; tüsho neak hode isa kiulongthsürübo tüsho amükeamrübo püpürü kiulongthsü khah ching, khihni hanangde, thsühnuk ching, ramtso ching, jangkhijangra ching, tüsho achih ngüde lashih.

⁸ Tüshe kheakü adükeak anikhüh kheak, Atungpuh isa Thrünpuhnü isa kheak mihmüthsüm huhdo tüsho isa chamkhüh azhorü kuhi chingnü tsokhitshihbah küma ha amüsüh dangpung ching lashih. Nünü isa azhorü kuhi chingnü zuzu kamshih tüsho isa kilim ayinatrüm rhangdung aso jih.

⁹ Isa azhorü lakheah, tüshe nünü isa azhorü kuhi ching muzojih. Nünü Persia kiulongthsüpuh ki isa muzhode kamshih tüsho isa thsüphuloshihpü, thsümünima lakhi nü arüngyam thsüloshihpü mülüjih tüsho Juda le Jirusalem ching isa kümshihpü mihmuzho jih.

¹⁰ “Tüshe O isa Thrünpuh, jurü alala dünjishu kheakü isanü tümü thakhukba? Tümüde isanü nü yakzan bahyukdo,

¹¹ Küpü nü yamlarübo, wukihrübo hode isa ki ha thashihkhea, ‘ Alo küpü nüsanü amükühpü lanü, mihtsürü neak hode mümüsüh, arü thraneanachihkhi hode akheam thripkhühnü khülim khiungde müneana lah.

¹² Jumonü nüsa tsührübo arü ki dürhangshih yungsho arü tsührü nüsanü dulu, tüsho küyimkishe arü ki mungtsü tüsho lakhit düyim, junangde nüsa sühmüh lade alo chingnü akhiukkhi atsü tsühbah, tüsho ju nüsa tsührübo kilim lünnü yamrüplurüp labah.’

¹³ Jurü alala isa münean tüsho amülim dünkheak dünjialalashe, isanü mükheahlah, isa Thrünpuhnü isa kheak thülünkhi kheaknü nükde thsümüchido tüsho isa khürü rhangdung lashih.

¹⁴ Dale tüsho küde thsah kheaküshe isanü nü yukhüm manide harü amütsü mihtsürü ki yihluachihpü? Isanü rhimosho, nü bukakhiukbah tüsho isa athrünkhi sheshe rhangdung mülashihde adükheakbah.

¹⁵ O Atungpuh Israel Thrünpuh, nü thiyuro, tümüde isa khürü khihni rhangdung lashihlah. Kheahang, isa nü miki isa neak ching lah, jumonü shenü she nü miki müzhipkhuk.”