EZRA 7 - AMÜSÜH HÜM CL Bible (BSI)

Ezra Jirusalem Khiungkhi

¹ Kam ahihkhüh dunglim, Artazerzes Persia kiulongthsürü thsüchoki, mihtsürü khülang amung Ezra lakheah. Apinü anihbuh jipürü Aron, Achangbe Amükeambuh yande khean: Ezra ju Seraia tsührü, Azaria tsührü, Hilkia tsührü,

² Shallum tsührü, Zadok tsührü, Ahitub tsührü,

³ Amaria tsührü, Azaria tsührü, Meraioth tsührü,

⁴ Zerahia tsührü, Uzzi tsührü, Bukki tsührü,

⁵ Abishua tsührü, Phinehas tsührü, Eleazar tsührü, Aron amükeambuh tsührü lakheah.

⁶ Babilon chingnü arübuh Ezra ha Israel Thrünpuhnü Mosa kilim jihkhi yakzan thrütakhinrü ayeanzo lakheah. Thrünpuh müngühmühi Ezra kheak lamonü, apinü akheangkhi athrünkhi kiulongthsüpuhnü jih.

⁷ Artazerzes kiulongthsü athünepü kam, Ezra Babilon chingnü, Israel boto, amükeamrü, Levirü, khün thsürü, ripit aheangrü, tüsho arüngyam tankihrü lung Jirusalem lim atu.

⁸ Arünü kiulongthsüpuh kam thünepü, khinu phüngü ching Jirusalem lim atu,

⁹ tümüde khinu akhuhbe atan ni Babilon chingnü tsahmusu, tüsho Thrünpuh arung hode khinu phüngü atan ni Jirusalem khiung.

¹⁰ Tümüde Ezranü Atungpuh yakzan yimde arhimopü tüsho api yakzan le thiyuzüngbo Israelrü ki thsangyupü mulongkhit.

Artazerzesnü Mütsan-hüm Ezra kilim Jih

¹¹ Ezra, amükeamrü tüsho athrütakhinrü, shepü Atungpuhnü Israelrü kilim yakzan jihkhi achiaying yüzahde mükheahkhea, api kilim Artazerzesnü mütsan-hüm ha jih:

¹² “Artazerzes kiulongthsübo kurungkheak kiulongthsüpuh kilimnü Ezra amükeambuh, yinmi Thrünpuh yakzan thrütakhinbuh kilim.

¹³ “I kiulongthsü aban ching Israelrü amükeamrü tüsho Levirü sherü nü lung Jirusalem ching yünelanü ayüpü kuklah de mülüjihchoh.

¹⁴ I tüsho lümlung-jihrü thünenü, Jirusalem tüsho Juda ching Thrünpuh yakzan künangde anichonü phüzüphüdoa kheahshihpü nü yüshihchoh.

¹⁵ I tüsho lümlungjihrübonü Jirusalem ching lakhi Israel Thrünpuh kilim akeangnü ajihkhi suna tüsho shotoyinchibo she hanjihbah yüang.

¹⁶ Babilon kiuthsübo chingnü suna tüsho shotoyinchi thremukhungkhi tüsho Israelrü le amükeamrübonü Jirusalem ching arü Thrünpuh arüngyam thsungkheak mulongde kingaünkhibo she hanang.

¹⁷ “Ha shonü moshibo, namfimihnubo, namfimihnunu, hi, tüsho yukhubo kümkangde thuloang tüsho Jirusalem ching nüsa Thrünpuh kingaün sadam kheak zojang.

¹⁸ Aningkhi suna le shotoyinchibo Thrünpuhnü amulongkhi nangde tüsho nüsa le nüsa keoniorübonü alümkhi rhimoang.

¹⁹ Mukhungmüdan ching ahoripü jihkhi pungphurubo küdükhüh nü kilim jihdünü Jirusalem ching Thrünpuh miki zojang.

²⁰ Tüsho tümüpürü arüngyam thsungkheaknü yihnüpü labanü kiuthsü rahpung chingnü luang.

²¹ “Aniyüzahlim Euphrarü lomi ching sho-zhimrübo ki Ezra, amükeambuh tüsho yinmi Thrünpuh yakzan thrütakhinbuh kilim apinü akheangkhi alala jihang de thiyukhüm müküpde inü jihchoh,

²² shotoyinchi khahngak 3400, wheat hi khahngak 10,000, yukhu pungdüchi 2000, oliv müdangke pungdüchi 2000, tüsho thimi akukthülün jihang.

²³ Yinmi Thrünpuhnü arüngyam thsungkheak yihnüpü lakhi akukthülün khide kümkangde jihang, jude müthsüsho I le I tsührübo kheak Thrünpuh bukakhiukbah.

²⁴ Tüsho amükeamrübo, Levirübo, khün thsürü, aheangrü, rhimorü, yungsho püpürü arüngyam ching tankihrü she kheak she ruk müthrepü thiyukhüm jihchoh.

²⁵ “Nü Ezra, nü Thrünpuhnü ajihkhi lümlung yande, yakzanshuhrü tüsho mahkhaprübo sherünü Aniyüzahlim Euphrarü mihtsürü limbekhukbanü, nünü arü rhimo ching yüzahshang. Amükeamrü aban hoju yakzan nünü thsangyuang.

²⁶ Mürangkhüh khürünü nü Thrünpuh yakzan yungsho kiulongthsü yakzan manisho, api ju mülangde thsümüchibeah, ashenü athsüpü yungsho yankhita bahpü yungsho lakhit luabahjihpü yungsho rihyam ching ramyukbeah.”

Ezranü Thrünpuh Mung Shikhi

²⁷ Ezranü tha, “Isa jipürü Thrünpuh! Atungpuh shiang, shepünü Jirusalem ching Atungpuh arüngyam akheahakhamde kamshihpü kiulongthsüpuh mulong ching asukachih.

²⁸ Thrünpuh mihmüthsüm hode, kiulongthsürü, api ki lümlungjihrü, tüsho wulakhi atorübonü I muzhode kamshih; Atungpuh I Thrünpuhnü I mulong toshih, tüsho Israel trük ching akuthsürü ahihkhüh I yande alodarüpü mulongkhitshih.”