EZRA 6 - AMÜSÜH HÜM CL Bible (BSI)

Sairusnü Thiyukhüm Jihkhi Yimkhitlokhi

¹ Junangde Darius kiulongthsüpuhnü Babilon ching kiuthsü yakzan hüm zopung ching yimshihpü thiyukhüm jih.

² Tüshe ju Ekbatana kiuto Midia lomi ching küpqiu kheak harü thrüta ngü:

³ “Sairus kiulongthsü atan kam Jirusalem ching arüngyam ju taka kingaünde alapung ching thsüloshang de apinü thiyukhüm jih: Arüngyam ju achanglim limthrip 27 tüsho apunglim limthrip 27 thüne thsübeah.

⁴ Tüsho khimtan ju lung atoto thürün asamnü khimang tüsho ju kheak sang aso thürünkhüh yihkihang; bahzübahdobe alala ju kiuthsü lakhit chingnü bahshang.

⁵ Tüsho suna le yinchi pungphuru küpü kiulongthsüpuh Nebukednezarnü Jirusalem arüngyam chingnü Babilon lim hande ayükheanü Jirusalem arüngyam ching dükde azopungbo ching lulodarü azobeah.”

Rhimokihde Ayüpü Dariusnü Thiyukhüm Jih

⁶ Dariusnü thiyusheak ha ruk yüshih: “Kethripkhüh lakhi kovünor Tattenai, Shethar-bozenai tüsho nü lung rhimorü atorübo arüngyam kinü akhinang;

⁷ tüsho arü kimlak düjih. Juda kovünor le Jihudarü limberünü Thrünpuh arüngyam püpüki yampungnü thsüloshang.

⁸ Arüngyam thsülochoki nüsanü Jihudarü azothsürübo kilim küruk rungbeanü inü thiyu jihchoh; wukhiukyüzahbe alala Aniyüzahlim Euphrarü ki ruk threkhi kiuthsü lakhit chingnü bahjang, junangde rhimo ju müyanshakshih.

⁹ Nimung aban Jirusalem ching amükeamrübo yihnüpü mülakphahde jihang; moshi nunu, mihnu, yungsho namfimihnunü yinmi Thrünpuh kilim taka kingaünpü thsüde, yungsho wheat hi, thimi, yukhu, yungsho oliv müdangkebo jihang.

¹⁰ Jude athsükhinü arünü yinmi Thrünpuh kilim arhümthüneade kingaünshihbah, tüsho Api müngühmühi I tüsho I tsührübo kheak lashihpü tamkhüntamnüshihbah.

¹¹ Ha yakzan manipü larü thsungkheak I yukhüm jihchoh, abinkiu sang ayam chingnü thokhita khimbah ju kheak zhinde asheshihbah, tüsho ayam ju bahyakpung kamshihbah.

¹² Ha yukhüm manirü tüsho arüngyam thsümünimrü kiulongthsürü yungsho mihtsürübo, api kingaünshihpü thsüde Jirusalem dangpung mokhitbuh Thrünpuhnü bahyukshang. I Dariusnü ha yukhüm jihchoh; ha dükde arhimobeah.”

Arüngyam Müsükhitkhi

¹³ Junangde Tattenai kovünor, Shethar-bozenai tüsho atorübonü kiulongthsüpuhnü athiyikhi nangde jinjihde rhimo.

¹⁴ Wukihrü Haggai le Iddo tsührü Zekaria bünenü thsangyude mulong toshihkhi hode, Jihudarü limberübonü arüngyam thsüde jakih. Israel Thrünpuh, Sairus, Darius tüsho Persia kiulongthsüpuh Artazerzes pürünü abekhi nangde arünü arüngyam thsükham.

¹⁵ Arünü ha arüngyam Darius kiulongthsü athurukpü kam Adar khinu nimung asam ni thsükhi.

¹⁶ Tüsho Israel mihtsürü– amükeamrü, Levirü tüsho püpürü ramtso chingnü alungrü alalanü asühde arüngyam müsükhitde mung.

¹⁷ Ha Thrünpuh yam müsüpü thsungkheak arünü moshi 100, namfimihnupung 200, namfimihnu 400, tüsho neak kingaün thsungkheak mihnupung 12, Israel trük aban khülang khülang jih.

¹⁸ Mosa hüm ching lakhi yande, amükeamrü tüsho Levirübo buh rhimomo Thrünpuh khin shuhpü Jirusalem ching zojih.

Phungho-thünio

¹⁹ Ramtsorü tsühsoniusobonü akhuhbe khinu thürükheak phüyi nipü phungho-thünio mung.

²⁰ Amükeamrü tüsho Levirünü nihbuh langzü tsangkhitde müsühkhit. Levirübonü ramtsorü tsührübo, amükeamrübo tüsho arü thsungkheak phungho-thünio arüngpü namfimihnunu laksah.

²¹ Ramtso chingnü alunglorü Israelrü tüsho ju lo ching larü amünean trük kheaknü bahkhibah alarü tüsho sherübo Atungpuh Israel Thrünpuh kingaünpü arükheanü alalanü arüng-jimpung ju tsüh.

²² Arünü phaüm muyukkhi yikhap thünio thüne ni asühde mung, tümüde Atungpuh hode Asiria kiulongthsüpuhnü arü ki muzhode kamshih, junangde apinü Israel Thrünpuh arüngyam thsülochoki arü rung.