EZRA 5 - AMÜSÜH HÜM CL Bible (BSI)

Arüngyam Rhimo Tankihlokhi

¹ Judüki wukihrü mahne, Iddo tsührü Haggai tüsho Zekaria anenü Israel Thrünpuh mung chingnü Juda le Jirusalem ching larü Jihudarü ki müchitpü tankih.

² Jumonü Shealtiel tsührü Zerubbabel tüsho Jehozadak tsührü Jeshua anenü tsahmusude yübah, Jirusalem ching arüngyam thsülopü tankih, tüsho wukihrü mahne junü arü rung.

³ Judüki Euphra kethripkhüh lakhi kovünor Tattenai, Shetharbozenai tüsho arü rukhüh tankihrübo nungde Jirusalem lim arübah arü ki keokhi: “Ha arüngyam thsülopü tüsho chipi thsükhipü shenü thiyukhüm jihkhea?”

⁴ Arünü arüngyam thsülopü ching arungrü mihtsürü mungbo she keokhi.

⁵ Tüshe Thrünpuhnü Jihudarü limberü kurungkheak kheahde alakheah, tüsho Persia kiulongthsü atorübonü arünü Darius kilim thrütbah alo-hüm müngüyichokia mutuklodü lang rhimoshih.

⁶ Euphra kethripkhüh lakhi Kovünor Tattenai, Shethar-bozenai tüsho api müyamrü kethripkhüh lakhi atorübonü Darius kiulongthsüpuh kilim kihüm thrüt.

⁷ Arünü api kilim thrütkhi kihüm ju ha lakheah: “Kiulongthsüpuh Darius, nü kiulongthsü mungtsü thsang.

⁸ “Nü ki mükheahshihpü lümkhi ju, isa Juda lomi ching Ato Thrünpuh yam ching yüdo. Lung atotonü khimtanbah thrüna lah, tüsho abinkiu kheak rhü zünlah; ha rhimo ching khide jinjihde rhimokhamde yümuroh.

⁹ Tüshe isanü azothsürübo ki, ha arüngyam tüsho chipi thsülopü shenü thiyukhüm jihbah ha banshihcho de keokhi.

¹⁰ Isanü nü kilim mungbo mütsande ajihpü thsüde sherünü aku thsübah arhimokheanü arü mungbo she keokhi.

¹¹ “Tüsho arünü isa ki hade alo, ‘Isa thüning le alo Thrünpuh yamlarü ah, tüsho isa adüso sühmüh larü Israel kiulongthsünü thrünbah bana lakhi arüngyam thrünlochoh.

¹² Tüshe isa jipürü yinmi Thrünpuh bukakhiukshihkhi hode arübo Nebukednezar Babilon kiulongthsüpuh, Kaldeabuh khah ching jihabahbah, jurü hode ha yam thsümünim tüsho mihtsürübo Babilon ramtso ching bede yü.

¹³ Judüalalashe, Babilon kiulongthsüpuh Sairus kiulongthsükhi akhuhbe kam ching apinü Thrünpuh arüngyam thsülopü thiyukhüm jih.

¹⁴ Nebukednezar nü Jirusalem arüngyam chingnü lude yünü Babilon arüngyam ching zokhi suna, arüngyam yinchi pungphurubo Sairusnü yihkhitloa Juda kovünor Sheshbazzar khah ching yukjih.

¹⁵ Kiulongthsüpuhnü pungphurubo ju hanlodarü Jirusalem arüngyam ching zolopü, tüsho adüso yampung ching arüngyam thsülopü Sheshbazzar ki tha.

¹⁶ Junangde Sheshbazzar arübah khimtan khimjih; judükinü khihni khiungde thsüde arüchoh, tüshe ju kheakü khiungde müthsükhiyi.’

¹⁷ “Jumonü, kiulongthsüpuhnü mulonga lasho, Sairus kiulongthsüpuhnü Jirusalem ching ha Thrünpuh arüngyam thsülopü thsungkheak thiyukhüm jih-a lashi müjihnü Babilon kiuthsü hüm zopung ching yimshang, tüsho ju dünkheak kiulongthsüpuh lümkhi isa ki mükheahshang.”