EZRA 4 - AMÜSÜH HÜM CL Bible (BSI)

Arüngyam Müthsüloshihpü Zhipdokhi

¹ Küyimki Juda tüsho Benjamin riribonü, ramtso chingnü alungrü tsührübonü Israel Thrünpuh Atungpuh arüngyam thsülochoh de asokhea,

² arünü Zerubbabel tüsho gukbo ching akubo shorubah tha, “Arüngyam thsülopü thsungkheaknü isa she nüsa lung rukhüh thsanü, nüsanü kingaünkhi Thrünpuh ju lang isanü she kingaünchoh, tüsho Asiria kiulongthsüpuh Esarhaddon nü isa ha ching bedarükhi kim chingnü kingaünchoh.”

³ Tüshe Zerubbabel, Jeshua tüsho Israel guk aban azothsürübonü arü ki alo, “Isa Thrünpuh arüngyam thsüpü nüsa arung yihnüpü müla. Persia kiulongthsüpuh Sairus nü amülükhi yande, Israel Thrünpuh arüngyam ju isanü lang athsübah.”

⁴ Tüshe ju lomi ching larübonü arüngyam müthsüshihpü Jihudarübo mulong ninishihpü müzün,

⁵ tüsho arü lümkhi mukhiungshihpü arü azhihde Persia kiulongthsüpuh Sairus tüsho Darius yakzan shuhkhi kim amuyungnü atorübo buknimde rhimo.

Jirusalem Müthrünloshihpü Zhipdokhi

⁶ Kheakü Zerzes kiulongthsü tankihchoki, arü riribonü Juda tüsho Jirusalem ching larü azhihde amülim jihkhi thrüt.

⁷ Artazerzes Persia kiulongthsüchoki she Bishlam, Mithredath, Tabeel tüsho rukhüh rhimorübonü kiulongthsüpuh kilim kihüm thrüta jih. Kihüm ju Aramik khahthrütnü dokihbah Aramik yuthanü khea huh.

⁸ Junangde limthobuh Rehum tüsho athrütbuh Shimshai anenü Artazerzes kilim Jirusalem azhihde kihüm ha ruk thrüt:

⁹ “Limthobuh Rehum, athrütbuh Shimshai, rukhüh rhimorü, mahkhaprü, tüsho Elam lomi ching mihkhung larü, Erek, Babilon tüsho Susa ching larü ato thsürübo,

¹⁰ püpürü lomi mihtsürü atoashangrü Osnappar, nihbe lo bahbah aramrü thsüde arünü Samaria tüsho kiuto aniyüzahlim Euphra lomi ching larübo kilimnü.”

¹¹ Kihüm thrütkhi ju ha: “Artazerzes kiulongthsüpuh kilim, ayamlarübo aniyüzahlimrü Euphrarü kilimnü.

¹² “ Kiulongthsüpuhnü mükheahshihnekhi ju, Jihudarübo nü kilimnü aturünü Jirusalem ching isa lung arübah ha amünean tüsho yakzanazhih kiuto thrünlochoh. Arübo rhü zünmusudo tüsho banmuroh.

¹³ Kiulongthsüpuhnü ha mükheahang, ha kiuto thrünlode rhübo zünkhamsho, mihtsürübonü nü kilim ruk tüsho wüntre müjihde akambah tüsho nü kiulongthsü rahpung shochip thsübah,

¹⁴ Kheakü, tümü thsükhi isa nü kiuthsü yakzan bukkhüp lamonü, hadürü kiulongthsüpuh mungchih dünjikhi müngüne, jumonü ha kiulongthsüpuh ki mükheahshihpü mühahchoh.

¹⁵ Junangde nüsa jipürünü thrüta zokhi thiyukhüm ha jih-a yimshang. Jude athsükhinü ha kiuto yakzan-azhihrü tüsho adüso kim chingnü lomi ching kiulongthsürü tüsho yakzanshuhrü phümüsüp jihpung ah de nünü ayimkhitbah. Tüsho harü mihtsürübo ha yakzannü mürhükkhukde arüchoh. Ju hode lang kiuto thsümünimkheah.

¹⁶ Jumonü isanü alümkhi ju ha kiuto thrünlosho tüsho chipi ju bansho, nü kiulongthsünü küyimkishe aniyüzahlim Euphrarü mükhümkhuk.”

¹⁷ Kiulongthsüpuhnü ha thaloa yüshih: “Limthobuh Rehum, athrütbuh Shimshai tüsho rukhüh larübo Samaria tüsho aningkhi aniyüzahlim Euphra ching larü kilim, salüm.

¹⁸ “Nüsanü isa kilim mühahkhi kihüm I ki mütsande khea huhdo.

¹⁹ Atsangashua kheahshihpü inü thiyukhüm jihdo, tüsho Jirusalem ha adüso lün chingnü kiulongthsü yakzan-azhihrü tüsho phümüsüp jihrünü lang mibah laa lah de yimkhitdo.

²⁰ Jirusalem ching sühmüh larü kiulongthsürübonü aniyüzahlim Euphrarü kurungkheak ruk threa tsühde wüntre jihshihde laa lah.

²¹ Jumonü inü thiyukhüm müjihyichokia kiuto thrünlokhi ju tukloabahang de thiyuzüng jihang.

²² Ha mülakphahpü nüsa kurhangang. Tümüde kiulongthsüpuhnü amulongkhi thsümünimshihpü thsücho le?”

²³ Ha kihüm Artazerzesnü athrütkhi Rehum, Shimshai tüsho rukhüh larübo ki khea huhkhi yanalünde, arünü nanachihde Jirusalem lim yübah Jihudarübo kiuto thrünlokhi ju thsühnuk shuhbah yankhiabah.

²⁴ Arüngyam rhimokhi tukloabahbah Persia kiulongthsüpuh Darius, kiulongthsü mahnepü kam khiungde zokheam.