EZEKIEL 44 - AMÜSÜH HÜM CL Bible (BSI)

Kiulongthsürü, Levirü, Amükeamrü

¹ Judüki apinü I aleangbe arüngakopung chipiripit, aniakhiuklim abinkhi ki belodarü; tüsho ju rihdoa lakheah.

² Atungpuhnü I ki tha: Ha chipiripit rihdoa labah; ha mükhimshuh, tüsho shenü she ha hode müyüzah; tümüde Atungpuh , Israel Thrünpuh ha chingnü yüzahdo; jumonü ha rihdoa labah.

³ Kiulongthsüpuhnü lang Atungpuh miki tsühyungbe tsühpü yüzahpü kuklah; apinü chipiripit mükü limronü ayüzahbah tüsho ju limronü awukhiukbah.

⁴ Jushu apinü I dukulim chipiripit limronü arüngyam mikhuh bedarü; tüsho inü kheah, tüsho kheahang! Atungpuh müretahkhinü Atungpuh arüngyam mia lakheah; tüsho inü I miro mükhüm.

⁵ Atungpuhnü I ki tha: Mihtsürü tsührü tsüde mütsanang, phünide kheahang, tüsho Atungpuh arüngyam yuzüngbo tüsho yakzanbo alala dünkheak inü nü ki thapü lakhi alala nükhün yukde aniang; tüsho arüngyam ching azahrü tüsho arüngakopung chingnü awukhiukrü tsüde mütsanang.

⁶ Kheakü azhihrü Israel yamkhün ki thaang, Atungpuh Thrünpuhnü ha thachoh: O Israel yamkhün, nüsa athraneanbe rhimokhi akheam thsüang!

⁷ Nüsanü athraneanbe rhimokhi lungnü nüsanü mulong tüsho shih tsütamübahkhi khiungkerü I arüngyam ching beyukde nüsanü tsühyungpü, amüdang tüsho athiyih jihchoki I arüngyam müneanjih tüsho nüsanü I ki tangzüngkhi thsümünim.

⁸ Tüsho nüsanü amüsüh kingaün jihpü mürhimo; tüshe nüsanü nüsa thsung thsüde I yo arüngyam ching rhimoshihpü khiungkerübo ki jih.

⁹ Atungpuh Thrünpuhnü ha thachoh: Israelrü bolung lakhi khiungkerübo mulong tüsho shih tsütamübahrü sheshe I arüngakopung ching müyüzah.

¹⁰ Tüshe Levirübo sherünü I kheaknü limshude chamkhibah Israelrü lung arü sangthsübo dunglim yüa lanü, arünü arü amülim hanbah.

¹¹ Arünü arüngyam chipiripit neakde I arüngyam ching tankihpü kuklah; arünü taka kingaünbe tüsho mihtsürübo thsungkheak laksah-a kingaünbebo laksahpü mihtsürübo miki zhippü tüsho arü tankihpü kuklah.

¹² Tüshe arünü Israelrü thsungkheak sangthsübo miki arüngako thsü tüsho arü yamkhün amülim ching jing mükheshih, jumonü arünü arü thsümüchi hanbah de arü dünkheak inü thiyuchihchimchoh, Atungpuh Thrünpuhnü thachoh.

¹³ Arünü amükeamrü thsüde tankihpü I thüninde marü, yungsho khide amüsüh I yo kingaünbo khürü phünide marü; tüshe arünü ayihbeakkhi athraneanbebo achih hanbah.

¹⁴ Tütüshe arüngyam rhimobo tüsho ju ching rhimobe alala ching arü ki rhimo jihbah.

¹⁵ Tüshe Levirü amükeamrübo Zadok tsühsoniusobo, Israel mihtsürübo tsophülapchoki, sherünü I yo arüngakopung neakchonü, I tankihpü I thüninde arübah; tüsho arünü amüdang tüsho athiyih jihpü I ki zhipbah, Atungpuh Thrünpuhnü thachoh.

¹⁶ I yo arüngakopung ching azahpü, I dükhüm ki I tankihpü arüpü ju arü labah, tüsho arünü I kingaün mukhung bebah.

¹⁷ Küyimki arünü alungbe khikzhakpung ripitbo ching yüzahbanü, arünü khimthünak yihbah; arünü alungbe khikzhakpung ripitbo tüsho ju ching I tankihchoki arü kheak shihnamkhim müyih.

¹⁸ Arünü arü ku kheak kuhingbe athünak tüsho arü chim kheak alungbe-khim thünak lubah; shoke shube tümü she arünü arü kheak mürümkih.

¹⁹ Küyimki arünü mihtsürübo kilim aleangbe khikzhakpung ching wukhiukbanü, arünü tankihpung ching khimthünak arünü ayihkhitbah, tüsho jurü ju amüsüh khiungshakbo ching zobah; tüsho arünü püpü khimmih yihbah, junangde arünü amüsüh-khim yihbah mihtsürübo müsühkhitde mükamshih.

²⁰ Arünü arü kuyü mühüt yungsho ashang she müshangshih; arünü arü kuyü atsükheaknü awobah.

²¹ Amükeamrünü khikzhakpung alungbe ching yüzahchoki yukhu muyung.

²² Arünü khimoberü yungsho abahkhi liberü mulu tüshe Israel yamkhün chingnü atsangkhit yungsho amükeamrü niuberü lang alubah.

²³ Arünü I mihtsürü ki amüsüh tüsho amümüsüh dükeak thsangyubah, tüsho künangde amümüsüh tüsho amüsüh dükeak mütsanmükhibanü arü ki huhbah.

²⁴ Atsangachihkhi ching arünü mahkhaprü nangde arhimobah, tüsho I mahkhapkhi yande arünü khapzhakbah. Akhukhitkhi I yo thüniobo dünkheak arünü I yakzanbo tüsho I yuzüngbo alala zobah, tüsho arünü I yo amunibo müsühde azobah.

²⁵ Arünü ashekhi mihtsürü phünide ayükhi hode arü müneana mulu; judüalalashe abuh yungsho abe, tüsho tsührü yungsho tsührübe tüsho akhiung yungsho mürhangkhi achi thsungkheaknü arü zangrü müneana lupü kuklah.

²⁶ Api amüsüh kamkhi dunglim, arünü anihbuh thsungkheak nimung thüne khebah.

²⁷ Alungbe khikzhakpung ching, amüsüh dangpung ching tankihpü api yüzahkhi nimung, apinü nihbuh neak kingaün jihbah, Atungpuh Thrünpuhnü thachoh.

²⁸ Ha arü yamrüplurüp labah: I ju arü yamrüplurüp; nünü arü kilim Israel ching yamalo müjih; I ju arü yamalo lah.

²⁹ Arünü hi kingaün, neak kingaün, tüsho amülim kingaün tsühbah; tüsho Israel ching kingaünkhi kukruk alala arü yo thsübah.

³⁰ Sangaso bolung akhuh asokhi, tüsho nüsanü amungji aban kingaünkhi alala amükeamrübo yo thsübah; nüsanü akhuhde anungkhi yikhap amükeamrübo kilim jihbah, junangde nüsa yambukbo kheak müngühmühi labah.

³¹ Wuhnu yungsho shiwüh, akeangnü ashekhi yungsho shiwühbonü anguhsahkhi amükeamrübonü mütsüh.