EZEKIEL 4 - AMÜSÜH HÜM CL Bible (BSI)

Jirusalem Yanpü Mütsankhitkhi

¹ Mihtsürü tsührü, kheakü lungbeak khülang luang, ju nü miki zoang tüsho ju kheak Jirusalem kikihang.

² Tüsho ju yanpü thsang: ju kheak ayanpü rhimobo thsang, ju khiungde alo wukihang, ju kheak binkheampungbo thsang tüsho ju mükamde chipi-yümkheambe zoang.

³ Jushu yinchi phuru khülang luang tüsho nü le kiuto dükeak yinchi chipi thsüde zoang tüsho nü miro ju thrip abinang. Ju ayankhi khüp labah tüsho ju yankhi ju nü labah. Ha Israel yamkhün ki amütsan labah.

⁴ Jushu nünü huzulim peang yapang tüsho Israel yamkhün neak ju kheak zobah. Nü ju ching yapkhi nimung khekhi yande arü neak hanbah.

⁵ Arü neak kambo nangde inü nü ki ju nimung khekhi rukhühnü jihdo. Jumonü nünü nimung 390 thsungkheak Israel yamkhün neak hanbah.

⁶ Nünü ha banshu, ha kim ching a nünü tsülim peang yapang, tüsho Juda yamkhün neak hanang; kam aban thsungkheak nimung khülang, nimung yirü inü nü kilim jihchoh.

⁷ Nü miro Jirusalem yankhi lim abinang tüsho nü khah hitde kiuto azhihde müchitang.

⁸ Inü liunü nü rhükbah, junangde nü yankhi nimung mübankhityi khiungde nünü thripkhühnü khülim manguhkhuk.

⁹ Wheat tüsho barli, hühkeangbo tüsho müngrhüh, danji tüsho khiungün luang; jurübo zowupung phüh ching yukang tüsho nü thsungkheaknü yikhap dampü thsang. Nünü ju nimung 390 nü rheangnü ayapchoki tsühbah.

¹⁰ Nimung aban tsühpü tsühyungpü düpüt 230 adünang tüsho akhukhi kim ching tsühang.

¹¹ Nü yungpü nimung khülang ching ke pung 2 adüna labah.

¹² Barli yikhap nangde nünü tsühyungpü tsühang; ju mihtsürü khihnü mokhih thsübah mihtsürübo mikinü khapang.

¹³ Atungpuhnü tha, “Hanangde Israelrünü inü arü yanabahpung trükshih bolung amünean tsühyungpü tsühbah.”

¹⁴ Judüki inü tha, “Jude yung, Wuto Atungpuh ! Inü küyimkishe I müneana mükheah. I athunu kinü kheakü khiungde inü küyimkishe ashekhi yungsho mütüm shiwühbonü athonakkhi mütsühakheah. Mümüsühkhi shih tümü she I mün ching yüzah-a mükheah.”

¹⁵ “ Khide tsülah,” apinü tha, “ Inü nü a mihtsürü khih müthri moshi khih kumungnü nü yikhap khapshihbah.”

¹⁶ Judüki apinü I ki tha: “Mihtsürü tsührü, Jirusalem ching tsühyungpü ngükhi inü tukloshihbah. Arünü adünarade tüsho trede yikhap tsühbah tüsho ke yungbah.

¹⁷ Jim tüsho ke musuhkhinü arü khülangnü khülang kheahachihbah müyinsahbah tüsho arü neak hode tümü mülade akambah.”