EZEKIEL 39 - AMÜSÜH HÜM CL Bible (BSI)

Gog Kukkhi

¹ Tüsho mihtsürü tsührü, Gog azhihde müchitang, tüsho thaang: Atungpuh Thrünpuhnü ha thachoh: Inü nü azhihlah, O Gog, Meshek tüsho Tubal akubeato yakzanshuhrü!

² Inü nü zuhphülapshihbah tüsho mikhuhlim kitbah, tüsho Israel müzüngbo ching marüyi khiungde dukulim limshu chingnü nü bede atubah.

³ Inü nü khah huzulim chingnü nü sanglüh lakkhibah, tüsho nü khah tsülim chingnü nü hühzobo yihkhibah.

⁴ Nü tüsho bonungrü le nü lung lakhi mihtsürü alala Israel müzüngbo kheak keambah. Inü nü shihtsüh wuhnu mungjibo tüsho mütüm shiwühbo tsühshihpü jihbah;

⁵ nü a mükeak ching keambah; tümüde inü asukdo, Atungpuh Thrünpuhnü thachoh.

⁶ Inü Magog tüsho keyean khümkhita larübo kheak mo yüshihbah; tüsho I Atungpuh de arünü mükheahbah.

⁷ Inü I mihtsürü Israel bolung I mung amüsüh mükheahshihbah; tüsho inü kheaküa I mung amüsüh mümüneanshih; tüsho trükshihbonü I Atungpuh Israel ching Amüsüh Khülang de mükheahbah.

⁸ Ha arüdo! Ha dünjido, Atungpuh Thrünpuhnü thachoh. Ha inü asukkhi nimung lah.

⁹ Judüki Israel kiutobo ching larübonü wukhiukbah tüsho mo thsübah thsühnukbo takbah–tsungninibo tüsho tsungbo, sanglühbo tüsho hühzobo, thsühshangbo tüsho thsühbo–tüsho arünü jurünü nimung thüne thsungkheak mo thsübah.

¹⁰ Arünü thulu chingnü sang yihpü yihnüpü müla yungsho murungbo ching sangbo tümü mükiushak, tümüde arünü thsühnukbonü arü mo thsübah; arü jangkhirübo arünü jangkhia lubah, tüsho arü yankhia lurübo arünü yankhia lubah, Atungpuh Thrünpuhnü thachoh.

Gog Mibahkhi

¹¹ Ju nimung Israel ching mibahpung thsüpü Gog kilim dangpung khülang jihbah, keto aniakhiuklim Hantsahrü Jindükhün labah; hanü hantsahrü limro khudobah, tümüde ju ching Gog tüsho api mihbo kiuyuka bahbah; ha Hamon-gog Jindükhün de ajibah.

¹² Lomi müsühkhitpü thsungkheaknü Israel yamkhünnü arübo khinu thüne lude kiuyuka bahbah.

¹³ Lomi mihtsürü alalanü arü kiuyuka bahbah; tüsho inü I müretah huhkhi nimung hanü arü ki wüntre handarübah, Atungpuh Thrünpuhnü thachoh.

¹⁴ Khinu thüne dunglim, alo kheak aninga lakhi yimkhita kiuyuka bahshihpü thsüde lomi hode hantsahshihpü mihtsürü mokhitbah, junangde arünü lomi müsühde kamshihbah.

¹⁵ Ayimrübonü lomi hode yüchoki, khürünü mihtsürü ro ngüsho kiuyuk-kiurünü Hamon-gog Jindükhün ching kiuyuka mübahyi khiungde amütsan khülang süta zhipshihbah.

¹⁶ (Ju phünide bonungrü müshide ajikhi kiuto khülang labah.) Junangde arünü lomi müsühkhitbah.

¹⁷ Mihtsürü tsührü, Atungpuh Thrünpuhnü ha thachoh: Wuhnu mungji tüsho mütüm shiwüh alala ki asukang: Mukhungang tüsho arang, inü nüsa thsungkheak laksah-a thünio thsakhamkhi Israel müzüngbo kheak laksah-a kingaünkhi ato ching mukhungang, tüsho nüsanü shih tsühbah tüsho thiyih yungbah.

¹⁸ Nüsanü athrungrü shih tsühbah tüsho lomi yakzanshuhrübo thiyih yungbah–namfimihnupung, namfimihnunubo, tüsho mihnubo, moshibo nangde arü alala Bashan ching yo amüdangkhi nangde lah.

¹⁹ Inü nüsa thsungkheak laksah-a thünio thsakhamkhi ching nüsanü nüsa bukmüthsüyi khiungde amüdang tsühbah tüsho mümüshangyi khiungde thiyih yungbah.

²⁰ I dükhüm kheak, nüsa khorabo tüsho aberü, thirithsü mihtsürü tüsho bonungrü mungji aban bukmüthsüyi khiungde atsühbah, Atungpuh Thrünpuhnü thachoh.

Israel Lalokhi

²¹ Inü trükshih bolung I müretah huhbah; tüsho inü mahkhapkhi tüsho arü kheak I khah yihkihkhi trükshihbonü angübah.

²² Ju nimungnü ründe I Atungpuh arü Thrünpuh de Israel yamkhünnü mükheahbah.

²³ Tüsho arü mülimkhi dünkheak Israel yamkhün aramkhi ching yükheah de trükshihbonü mükheahbah, tümütüsho arünü I ki mülimde rhimo. Jumonü arü kheaknü inü I miro jik tüsho arü riribo khah ching arübo jih, tüsho arübo nukshangnü keam.

²⁴ Inü arü ki arü mümüsühkhi tüsho arünü alakmihkhibo yande rhimo, tüsho arü kheaknü I miro jik.

²⁵ Jumonü Atungpuh Thrünpuhnü ha thachoh: Kheakü inü Jakob kuhi jihlobah, tüsho Israel yamkhün athrünkhi kheak mihmüthsüm labah; tüsho inü I mung amüsüh kümdobah.

²⁶ Arünü arü achihbe tüsho I azhihde mülimde arhimokhi alala arübo shenü mütreshihde lomi ching kuramde alachoki mihabahbah,

²⁷ ju inü arübo mihtsürübo kilimnü belodarübah, arü riri lomibo chingnü arübo bemukhungde tüsho arü hode trükshih ahihdo mük ki I amüsühkhitkhi huhchoki labah.

²⁸ Judüki arünü I Atungpuh arü Thrünpuh de mükheahbah, tümütüsho inü arübo trükshih bolung aramkhi ching yüshih, tüsho arü nihbuh lomi ching bemukhung. Inü arü sheshe dunglim mübahjih;

²⁹ tüsho inü Israel yamkhün kheak I me dungkihchoki, inü arü kheaknü I miro müjiklo, Atungpuh Thrünpuhnü thachoh.