EZEKIEL 37 - AMÜSÜH HÜM CL Bible (BSI)

Akung Robo Jindükhün

¹ Atungpuh khah I kheak arü, tüsho Atungpuh me ching I bekhit tüsho jindükhün khülang phulung ching binshih; ju robonü mide alakheah.

² Apinü jurübo mükamde I be; jurübo jindükhün ching khide hihde alakheah, tüsho khide kungde alakheah.

³ Apinü I ki tha, “Mihtsürü tsührü, harü robonü rhangdung lakhukba de?” Inü alo, “ O Atungpuh T H RÜ NPU H , nünü mükheahlah.”

⁴ Judüki apinü I ki tha, “Harü robo ki müchitang tüsho arü ki thaang: O akung robo, Atungpuh yu soang.

⁵ Atungpuh T H RÜ NPU H NÜ harü robo ki thachoh: Inü nüsa kheak sheak yüzahshihbah, tüsho nüsa rhangdung labah.

⁶ Inü nüsa kheak sühbo yihkihbah, tüsho küpnü alüpdobah, tüsho nüsa kheak sheak yukbah, tüsho nüsa rhangdung labah; tüsho I Atungpuh de nüsanü mükheahbah.”

⁷ Jumonü I ki thiyukhüm jihkhi nangde inü müchit; tüsho inü müchitshu, zukleangnü kürakkürak de düsheak khülang lakheah, tüsho robonü ro ki rukhüh shumukhung.

⁸ Inü mürünga kheah, tüsho arü kheak sühbo lakheah, tüsho arü kheak sihtsü yükih, tüsho küpnü arü lüpdo; tüshe arü kheak sheak mülade alakheah.

⁹ Judüki apinü I ki tha, “Sheak ki müchitang, mihtsürü tsührü, müchitang tüsho sheak ki thaang: Atungpuh Thrünpuhnü ha thachoh: Apungbo thrip phüyi chingnü arang, O sheak, tüsho harü alaksahkhibo kheak sheak thsüyukang, junangde arübo rhangdung labah.”

¹⁰ Apinü I ki thiyukhüm jihkhi nangde inü müchit, tüsho arü kheak sheak arü, tüsho arü rhangdung la, tüsho boto ato arü jingnü zhip.

¹¹ Judüki apinü I ki tha, “Mihtsürü tsührü, harü robo ha Israel yamkhün athrünkhi ah. Arünü thachoh, ‘ Isa robo kunga lah, tüsho isa mulonglam dükheaka lah; isa shahde lipshaka bahdo.’

¹² Jumonü müchitang tüsho arü ki thaang, Atungpuhnü ha thachoh: Inü nüsa kiuyukbo khimshuhpü lah, tüsho kiuyukbo chingnü nüsa bemusubah, O I mihtsürü; tüsho inü nüsa Israel lomi ching belodarübah.

¹³ Tüsho inü nüsa kiuyukbo khimshuhchoki, tüsho kiuyukbo chingnü nüsa bemusuchoki, I Atungpuh de nüsanü mükheahbah, O I mihtsürü.

¹⁴ Inü I me nüsa kheak yukjihbah, tüsho nüsa rhangdung labah, tüsho inü nüsa nihbuh lo kheak lashihbah; judüki I Atungpuhnü asukkheah tüsho rhimobah de nüsanü mükheahbah,” Atungpuhnü thachoh.

Juda tüsho Israel Kiulongthsü Khülang

¹⁵ Atungpuh yu I ki arü:

¹⁶ Mihtsürü tsührü, tso khülang luang tüsho ju kheak thrütang, “Juda kiulongthsü.” Jushu tso püpü luang tüsho ju kheak thrütang, “ Israel kiulongthsü”;

¹⁷ tüsho ane tso khülang kamshang, junangde ane nü khah ching khülang kambah.

¹⁸ Tüsho küyimki nü mihtsürübonü nü ki thaba, “Harü amütsan nünü isa ki muhuhba de?”

¹⁹ Arü ki thaang, Atungpuh Thrünpuhnü ha thachoh: Inü Israel mung chingnü tso khülang lubah tüsho ju Juda tso kheak yihkihbah, tüsho ane tso khülang kambah, junangde ane I khah ching khülang labah.

²⁰ Küyimki nünü athrütkihkhi tsobo arü mük ki nü khah ching laba,

²¹ arü ki thaang, Atungpuh Thrünpuhnü ha thachoh: Inü Israel mihtsürübo arü yüpung trükshih bolungnü alubah, tüsho thrip aban chingnü arü bemukhungbah, tüsho arü nihbuh lomi ching bedarübah.

²² Inü Israel müzüngbo kheak, lomi ching arübo trükshih khülang kamshihbah; tüsho arü alala kurungkheak yakzan shuhpü kiulongthsürü khülang labah. Küyimkishe arü trükshih mahne müla, tüsho küyimkishe arü kiulongthsü mahne mücham.

²³ Arünü küyimkishe nihbuh zangrü arü sangthsübo tüsho athraneanbebo yungsho alakmihkhi khürü hode müneana mulu. Arü rholode atsokhi neakbo alala chingnü inü arü khümkhitbah, tüsho inü arü müsühkhitbah. Arü I mihtsürü thsübah, tüsho I arü Thrünpuh thsübah.

²⁴ I yamlarü David arü kurungkheak kiulongthsüpuh labah; tüsho arü alala namfimihnu neakrü khülang labah. Arünü I yuzüngbo ching tsahbah tüsho I yakzan thsükhibo anipü kümkangbah.

²⁵ Inü I yamlarü Jakob kilim jihkhi nüsa jipürü lakhi lo ching arübo labah; arü le arü tsührü tüsho arü tsührü tsührübo lünnü ju ching labah; tüsho I yamlarü David lünnü arü yakzanshuhrü thsübah.

²⁶ Inü arü kheak mungtsü tangzüng khülang thsübah; ju arü kheak akheam mülakhi tangzüng khülang labah; tüsho inü arü müngühjihbah tüsho wüh bushihbah, tüsho arü bolung I arüngakopung lünnü alashihbah.

²⁷ I lapung arü lung labah; tüsho I arü Thrünpuh thsübah, tüsho arü ju I mihtsürü thsübah.

²⁸ Judüki arü bolung I arüngakopung lünnü alachoki, I Atungpuhnü Israel müsühkhitchoh de trükshihbonü mükheahbah.