EZEKIEL 36 - AMÜSÜH HÜM CL Bible (BSI)

Israel kheak Atungpuh Müngühmühi

¹ Tüsho, nü mihtsürü tsührü, Israel müzüngbo ki müchitang, tüsho thaang: O Israel müzüngbo, Atungpuh yu soang.

² Atungpuh Thrünpuhnü ha thachoh: Tümütüsho thiririnü nüsa ki tha, “Aha!” tüsho, “Jipü wung achangbo isa yamalo kamdo,”

³ jumonü müchitang, tüsho thaang: Atungpuh Thrünpuhnü ha thachoh: Tümütüsho arünü nüsa zhikrangkhündo kamshih, tüsho thrip alala chingnü nüsa züthünak, junangde nüsa ju aningkhi trükshihbo yamalo kam, tüsho mihtsürü bolung nüsa ju dünthamungtha tüsho jipjiprara kam;

⁴ jumonü, O Israel müzüngbo, Atungpuh T H RÜ NPU H yu soang: Atungpuh Thrünpuhnü aninga lakhi mühirü trükshih alala ki yankhia lukhi tüsho keangrümüne kukruk khülang kamkhi Israel müzüngbo, awungbo, ayungbo, jindükhün, azhik tüsho abahkhi le abahkhitkhi kiutobo ki ha thachoh;

⁵ jumonü Atungpuh Thrünpuhnü ha thachoh: Inü aningkhi trükshihbo tüsho Edom alala azhihde mükthsükhi chingnü inü asukchoh. Arünü mulong athrünkhinü asühachih tüsho bahyukde I lomi yankhia lu tüsho ha rimlopung arü yamalo thsüpü lu.

⁶ Jumonü Israel lomi dünkheak müchitang, tüsho müzüngbo le awungbo, ayungbo tüsho jindükhünbo ki thaang, Atungpuh Thrünpuhnü ha thachoh: Inü mükthsüde mulong zhipzhipkhi chingnü asukchoh, tümütüsho trükshihbo mükhemükim ching nüsa thsünüdo;

⁷ jumonü Atungpuh Thrünpuhnü ha thachoh: Nüsa mükamde alakhi trükshihbo alala arü zangrünü thsünübah de inü nüsa ki I khah shuhkihde thiyuchihchimchoh.

⁸ Tüshe, nüsa, O Israel müzüngbo, nü khahbo chinkhitba shi, tüsho I mihtsürü Israel kilim aso asojihba shi; tümüde arübo nahde thüyam lim arübah.

⁹ Kheakü kheahang, I a nüsa thsungkheaknü lah; I nüsa kilim rholobah, tüsho nüsa wochakbah tüsho mükheanbah;

¹⁰ tüsho inü nüsa kheak mihtsürübo wüh bushihbah, Israel yamkhün athrünkhi lashihbah; kiutobo ching lalobah tüsho athsümünimkhi dangpungbo thsülobah;

¹¹ tüsho inü nüsa kheak mihtsürü tüsho shiwühbo wüh bushihbah. Arübo alü kambah tüsho aso asobah; tüsho akhuhlim kimbo ching nangde inü nüsa kheak laloshihbah, tüsho püpüki kheaknü alü nüsa ki tsüde arhimobah. Judüki I Atungpuh de nüsanü mükheahbah.

¹² Inü nüsa kheak I mihtsürü Israel tsahshihbah tüsho arünü nüsa mükühbah, tüsho nüsa ju arü yamrüplurüp thsübah. Tüsho nüsanü küyimkishe arü tsührübo dünkheak arü ki mimütrip.

¹³ Atungpuh Thrünpuhnü ha thachoh: Tümütüsho arünü nüsa ki tha, “ Nüsanü mihtsürü muyuchoh, tüsho nüsanü nüsa trükshihbo tsührü tüzhoshihchoh,”

¹⁴ jumonü nüsanü küyimkishe nüsa trükshih mihtsürübo mümuyu tüsho mütüzhoshih, Atungpuh Thrünpuhnü thachoh;

¹⁵ tüsho trükshihbonü mükhemükimkhi inü nüsanü musoshih, mihtsürübo achihahean nüsanü kheaküa mühan; tüsho kheaküa nüsanü nüsa trükshihbo jing mümükheshih, Atungpuh Thrünpuhnü thachoh.

Israel Rhangdung Aso

¹⁶ Atungpuh yu I ki arü:

¹⁷ Mihtsürü tsührü, küyimki Israel yamkhün arü nihbuh lo kheak lakheanü, arünü arü limrobo tüsho arü rhimobonü ju müneanjih; I miki arü limro ju aliberü nihbe khinushihcham yüchoki mümüsühkhi nangde alakheah.

¹⁸ Jumonü arünü lomi kheak thiyih bukkhi tüsho arünü bede müneankhi sangthsübo dünkheaknü arü kheak I mulong zhipzhip dungkih.

¹⁹ Inü arübo trükshih bolung hiumüzütshih, tüsho arübo lomibo ching müzütshih; arü limro tüsho rhimobo yande inü arü mahkhap.

²⁰ Küyimki arünü trükshihbo kilim arükheanü, arü yüpungbo ching, arünü I mung amüsüh müneanjih, ju ching arü dünkheak tha, “Harü ha Atungpuh mihtsürübo, tütüshe arünü api lomi chingnü awukhiukpü kam.”

²¹ Tüshe Israel yamkhünnü arü arüpung trükshih bolung müneanjihkhi I mung amüsüh dünkheak inü lümrhih.

²² Jumonü Israel yamkhün ki thaang, Atungpuh Thrünpuhnü ha thachoh: Ha nü thsülimnü inü arhimopü thsüchoh yung, O Israel yamkhün, tüshe nü arüpung trükshih bolung nünü müneanjihkhi I mung amüsüh thsülimnü ah.

²³ Trükshih bolung nünü müneankhi I mung ato inü müsühkhitbah, tüsho nü hode arü mük ki inü I amüsüh huhchoki trükshihbonü I Atungpuh de mükheahbah, Atungpuh Thrünpuhnü thachoh.

²⁴ Inü nü trükshihbo chingnü alubah, tüsho lomibo alala chingnü bemukhungbah, tüsho nihbuh lo ching nü beyukbah.

²⁵ Inü nü kheak ke amüsüh rhakkihbah, tüsho mümüsühkhibo chingnü nü müsühbah, tüsho nü sangthsübo alala chingnü inü nü müsühbah.

²⁶ Inü mulong aso khülang nü kilim jihbah, tüsho me aso khülang nü kheak yukjihbah; tüsho inü nü pang chingnü lungto mulong yihkhitbah tüsho nü kilim shihtsü mulong khülang jihbah.

²⁷ Inü I me nü kheak yukjihbah, tüsho I yakzan thsükhibo ching tsahbah tüsho I yuzüngbo rhimopü kümkangshihbah.

²⁸ Judüki inü nüsa jipürü ki jihkhi lo ching nü labah; tüsho nü I mihtsürü thsübah, tüsho I nü Thrünpuh thsübah.

²⁹ Inü nü mümüsühkhibo alala chingnü nü khümkhitbah, tüsho inü hi jihbah tüsho muzhomopungde akamshihbah tüsho nü kheak khümzung mülashih.

³⁰ Inü sangaso tüsho thulu chingnü akhiukkhi muzhomopungde akamshihbah, junangde trükshih bolung nü khümzungnü achih ngükhi küyimkishe müthsünülo.

³¹ Judüki nü amütsü limrobo tüsho amütsü rhimobo nünü alümkhitbah; tüsho nünü nü amülimbo tüsho athranean rhimobo dünkheak thraneanbah.

³² Ha nü thsülimnü inü arhimopü thsüchoh yung, Atungpuh Thrünpuhnü thachoh; ju nünü mükheahang. Nü limrobo thsungkheak achihang tüsho lümchihyuk ngüang, O Israel yamkhün.

³³ Atungpuh Thrünpuhnü ha thachoh: Inü nü mülimkhibo alala chingnü nü müsühkhit nimung, inü kiutobo ching laloshihbah, tüsho athsümünimkhi dangpungbo thsülobah.

³⁴ Atsahhorü alala mük ki zhikrangkhündo lakhi lo wochakbah.

³⁵ Tüsho arünü athabah, “Ha lo zhikrangkhündo alakhi thsü Eden shahwün nangde kamdo; tüsho abahkhi, azhikkhi tüsho athsümünim kiutobo ching kheaküa lalolah tüsho chipi ayünlah.”

³⁶ Judüki nü mühide alakhi trükshihbo alalanü I Atungpuhnü , athsümünim dangpungbo thsüloa lah tüsho abahkhi khimloa lah de mükheahbah; I Atungpuhnü asukdo, tüsho inü ju rhimobah.

³⁷ Atungpuh Thrünpuhnü ha thachoh: kheaküshe Israel yamkhün mihtsürübo namfimihnu boto nangde akamshihpü rhimopü thsüde arünü I ki keokhibah.

³⁸ Laksah-a kingaünpü namfimihnu boto nangde, thünio kim ching Jirusalem ching namfimihnu boto nangde, mihtsürübonü athsümünimkhi kiutobo mibah. Judüki I Atungpuh de arünü mükheahbah.