EZEKIEL 34 - AMÜSÜH HÜM CL Bible (BSI)

Israel Namfimihnu Neakrübo

¹ Atungpuh yu I ki arü:

² Mihtsürü tsührü, Israel namfimihnu neakrü azhihde müchitang: müchitang, tüsho namfimihnu neakrübo ki thaang: Atungpuh Thrünpuhnü ha thachoh: Nüsa nihbuh tsühyungrü Israel namfimihnu neakrübo are! Namfimihnu neakrübonü namfimihnu yimkipbe yung de?

³ Nüsanü amüdang tsühchoh, nüsanü shihnamkhim phuyuchoh, nüsanü ashih kihkhi laksahchoh; tüshe nüsanü namfimihnu müyimkip.

⁴ Nüsanü ayiuhyiuh müdüküngshih, nüsanü tukthsü müthsüngu, nüsanü yurikhi mürümjih, nüsanü amüzütkhi belode marü, nüsanü adükheakkhi müyim, tüshe nüsanü thsokihde tüsho müküpde arü ki yakzan thsüdo.

⁵ Jumonü arübo hiumüzüt, tümütüsho ju ching namfimihnu neakrü mülakheah; tüsho hiumüzütabah, arübo mütüm shiwüh alala thsungkheak jim kamabah.

⁶ I yo namfimihnubo hiumüzütabah, arübo müzüngbo tüsho awung achang alala kheak rümde tsah; I yo namfimihnubo shenü müyimde yungsho arü thsungkheak majuakheahde alomi alala kheak hiumüzüt.

⁷ Jumonü, nüsa namfimihnu neakrübo, Atungpuh yu aniang:

⁸ I lale, Atungpuh Thrünpuhnü thachoh, tümütüsho I yo namfimihnubo arishih khülang kamdo, tüsho I yo namfimihnubo mütüm shiwühbo alala jim kamdo, tümütüsho ju ching namfimihnu neakrü mülakheah; tüsho I yo namfimihnu neakrübonü I yo namfimihnubo müyim, tüshe namfimihnu neakrübonü nihbuh lang tsühyungdo, tüsho I yo namfimihnu müyimkip;

⁹ jumonü, nüsa namfimihnu neakrübo, Atungpuh yu aniang:

¹⁰ Atungpuh Thrünpuhnü ha thachoh, Inü namfimihnu neakrübo azhihde lah; tüsho inü I yo namfimihnubo arü khah chingnü akheangbah, tüsho arü namfimihnu yimkipkhi chingnü tukloshihbah; namfimihnu neakrünü kheaküa mütsüh. Inü arü mün chingnü I yo namfimihnubo khümkhitbah, junangde arübo ju arü thsungkheak jim müthsü.

Namfimihnu Neakrü Atsü

¹¹ Tümüde Atungpuh Thrünpuhnü ha thachoh: Inü I yo namfimihnubo yimbah, tüsho arübo ajukhitbah.

¹² Namfimihnu neakrünü namfimihnu hiumüzütkhi bolung arü namfimihnu boto ajukhitkhi nangde, inü I yo namfimihnu ajukhitbah. Amobo shokhi tüsho kheahde amitingkhi nimung arü hiumüzütpungbo chingnü inü arü alala khümkhitbah.

¹³ Inü arübo mihtsürübo kheaknü bekhitbah tüsho lomibo chingnü kitmukhungbah, tüsho arü nihbuh lomi ching bedarübah; tüsho inü arübo Israel müzüngbo kheak, keyungbo yean, tüsho mihtsürü lakhi lomi alala ching yimkipbah.

¹⁴ Inü rimkiu atsü arü kipbah, tüsho Israel müzüng achangbo ju arü yimtsühpung thsübah; ju ching arünü yimtsühpung lo atsü ching yapbah, tüsho arünü Israel wungbo rimlopung dangpheang kheak yimtsühbah.

¹⁵ I yo namfimihnubo thsungkheaknü I namfimihnu neakrü thsübah, tüsho inü arübo yapshihbah, AtungpuhThrünpuhnü thachoh.

¹⁶ Inü adükheakkhi yimbah, tüsho inü hiumüzütkhi belode arübah, tüsho inü yurikhi rümjihbah, tüsho tukthsükhi inü düküngshihbah, tüshe amüdangkhi tüsho reangzahkhi inü thsümünimbah. Inü thiyuronü arü yimkipbah.

¹⁷ I yo namfimihnu boto, nüsa thsungkheak Atungpuh Thrünpuhnü ha thachoh: Inü namfimihnu le namfimihnu, tüsho namfimihnupung le mihnupung dükeak mahkhapbah:

¹⁸ Nüsa thsungkheaknü rim atsü tsühkhi musuhdah de, tüshe nüsa jingnü nüsa rim aningkhi junakba de? Küyimki nüsanü ke amüsüh yungbanü, nüsanü nüsa jingnü aningkhi rhuzhihzhihba de?

¹⁹ Tüsho nüsa jingnü junakkhi I yo namfimihnunü atsühba de, tüsho nüsa jingnü rhuzhihzhihkhi ke yungba de?

²⁰ Jumonü, Atungpuh Thrünpuhnü arü ki ha thachoh: Inü amüdangkhi tüsho akukruk namfimihnu dükeak mahkhapbah.

²¹ Tümütüsho nüsanü kebük tüsho dubuhnü khanga tsoshih, tüsho ayiuhyiuh shiwühbo alala limshu tüsho mülihde müyüyi khiungde nü juhnü khua tsoshih,

²² inü I mihnu boto khümkhitbah tüsho arübo küruhkhüh mükheahmüchih; tüsho inü namfimihnu le namfimihnu dükeak mahkhapbah.

²³ Inü arü kurungkheak namfimihnu neakrü, I yamlarü David zojihbah, tüsho apinü arü yimkipbah: apinü arü yimkipbah tüsho arü namfimihnu neakrü thsübah.

²⁴ Tüsho I Atungpuh ju arü Thrünpuh thsübah, tüsho I yamlarü David ju arü bolung yakzanshuhrü thsübah; I, Atungpuhnü asukdo.

²⁵ Inü arü kheak mungtsü tangzüng khülang thsübah tüsho mütüm shiwühbo lomi chingnü ayankhitbah, junangde arünü mütüm tüsho sang-lünkhi ching kuramde alabah.

²⁶ Inü arü le I wung mükamde müngühjihbah. Inü akheahmünchi ching tsüng akishihbah; ju ching müngühmühi tsüng labah.

²⁷ Thulu sangdungbonü aso asobah, tüsho alonü hibo akhiukshihbah; mihtsürübo arü lomi ching kuramde alabah. Inü arü hung kheaknü sangkap yihshakchoki tüsho arü azhorü kamshihrü khah chingnü arü khümkhitchoki, I Atungpuh de arünü mükheahbah.

²⁸ Arübo küruhkhüh trükshihbonü yankhia mulu, yungsho lomi shiwühbonü mumuyu; arübo akhümkhit ching labah, tüsho shenü arü mütreshih.

²⁹ Inü hibo thsungkheak athukhi lo khülang arü kilim jihbah, tüsho arü küruhkhüh lomi ching khümzungnü müthsünü yungsho trükshihbonü mükhemürangkhi mühan.

³⁰ Judüki arünü I Atungpuh arü Thrünpuh, arü lung lah, tüsho arübo, Israel yamkhün ju I mihtsürü ah de mükheahbah, Atungpuh Thrünpuhnü thachoh.

³¹ Nüsa I yo namfimihnu, I rimlopung yo namfimihnu, tüsho I nüsa Thrünpuh, Atungpuh Thrünpuhnü thachoh.